ប្រទេសជប៉ុនកាលពីថ្ងៃសុក្រ បានចាប់ផ្តើមឡើងវិញនូវការងារដើម្បីរើមូលដ្ឋានអាកាសរបស់យោធាអាមេរិកដ៏ចម្រូងចម្រាសមួយលើកោះអូគីណាវ៉ា ដែលជាហេតុជំរុញអោយមានការតវ៉ានិងបង្កជា “កំហឹងយ៉ាងខ្លាំង” ពីសំណាក់អភិបាលក្នុងស្រុក។
អ្នកកោះអូគីណាវ៉ាជាច្រើននាក់បានអំពាវនាវជាយូរឆ្នាំមកហើយអោយរើមូលដ្ឋានអាមេរិកនៅផ្នែកភាគខាងត្បូងដែលមានប្រជាជនច្រើនរបស់កោះមួយនេះប៉ុន្តែពួកគេចង់អោយវាត្រូវផ្លាស់ប្តូរទៅនៅកន្លែងផ្សេងទៀតនៅក្នុងប្រទេសនេះជាជាងទៅតំបន់ដាច់ស្រយាលលើកោះអូគីណាវ៉ាតាមការចង់បានរបស់រដ្ឋាភិបាល។
លោកអភិបាល Denny Tamaki បានប្រាប់ក្រុមអ្នកយកព័ត៌មានថា “ខ្ញុំមិនអាចជួយបានទេប៉ុន្តែមានអារម្មណ៍ខឹងខ្លាំងណាស់នៅពេលចាប់ផ្តើមការចាក់ដីបំពេញដោយមិនអើពើទៅនឹងឆន្ទៈរបស់ប្រជាជនកោះអូគីណាវ៉ា”។
អភិបាលដែលទើបជាប់ឆ្នោតរូបនេះបានជំទាស់យ៉ាងដាច់ខាតចំពោះមូលដ្ឋានដែលនឹងត្រូវបានផ្លាស់ទីតាំងនៅក្នុងកោះអូគីណាវ៉ាដដែលនេះហើយបានលើកយកបញ្ហានេះកាលពីដើមឆ្នាំទាំងជាមួយមន្ត្រីរដ្ឋាភិបាលជប៉ុននិងអំឡុងការធ្វើដំណើរទៅកាន់សហរដ្ឋអាមេរិក។
រូបភាពទូរទស្សន៍ពីលើអាកាសបានបង្ហាញអោយឃើញដីមួយគំនរធំនៅលើឆ្នេរ Henoko ក្នុងទីក្រុង Nago របស់កោះអូគីណាវ៉ាដែលត្រូវបានធ្លាក់ចូលទៅក្នុងសមុទ្រជាផ្នែកមួយនៃការចាក់ដីបំពេញដើម្បីសាងសង់ទីតាំងថ្មីនេះ។
ប្រព័ន្ធផ្សព្វផ្សាយក្នុងស្រុកបាននិយាយថា បាតុករបានធ្វើបាតុកម្មនៅកន្លែងនោះរួមទាំងអ្នកខ្លះដែលជិះទូកទៅសមុទ្រផងដែរដើម្បីព្យាយាមរារាំងការងារនេះ។
គួរបញ្ជាក់ថា កោះអូគីណាវ៉ាមានដីតិចជាងមួយភាគរយនៃផ្ទៃដីសរុបរបស់ប្រទេសជប៉ុនប៉ុន្តែកោះនេះបានទទួលកងទ័ពអាមេរិកជាងពាក់កណ្តាលនៃកងទ័ពអាមេរិកប្រហែល៤៧,០០០នាក់ដែលកំពុងឈរជើងនៅប្រទេសជប៉ុន៕ AFP
Source: Kampuchea Thmey Daily
0 Comments