ប៉ូលិស​ក្នុងប្រទេស​ម៉ា​ល់​ឌី​វ​ស៊ើបអង្កេត​អតីត​ប្រធានាធិបតី​ជុំវិញ​ការសង្ស័យ​លើ​កិច្ចព្រមព្រៀង “​ខុសច្បាប់​”

ប៉ូលិស​នៅក្នុង​ប្រទេស​ម៉ា​ល់​ឌី​វ​បាន​កោះហៅ​អតីត​ប្រធានាធិបតី​លោក Abdulla Yameen ដើម្បី សាកសួរ​ជា​ផ្នែក​មួយ​នៃ​ការស៊ើបអង្កេត​ចូល​ទៅក្នុង​កិច្ចព្រមព្រៀង​ដែល​លោក​បានធ្វើ​អំឡុងពេល​កាន់អំណាច​ដែល​ភាគច្រើន​នៃ​ពួកគេ​គឺ​ពាក់ព័ន្ធ​នឹង​គម្រោង​ហេដ្ឋារចនាសម្ព័ន្ធ​ចិន។

​លោក Yameen បាន​ចាញ់​ការបោះឆ្នោត​ប្រធានាធិបតី​កាលពី​ខែកញ្ញា​ហើយ​រដ្ឋាភិបាល​ថ្មី​នៃ​អ្នក​កាន់តំណែង​បន្ត​របស់គាត់​គឺ​លោក Mohamed Ibrahim Solih កំពុង​ព្យាយាម​កំណត់​អំពី​វិសាលភាព​នៃ​ប្រាក់កម្ចី​របស់​ប្រទេស​ចិន​ដែល​ផ្តល់​ហិរញ្ញប្បទាន​ដល់​ផ្នែក​សំណង់​នៅក្នុង​ប្រជាជាតិ​កោះ​មហាសមុទ្រ​ឥណ្ឌា​មួយ​នេះ​។​
​
ប៉ូលិស​បាន​និយាយ​នៅក្នុង​សេចក្តីថ្លែងការណ៍​មួយ​កាលពី​ថ្ងៃ​ព្រហស្បតិ៍​ថា “​សេវា​នេះ​កំពុង​ស៊ើបអង្កេត​របាយការណ៍​ដែល​ដាក់​ដោយ​ស្ថាប័នរដ្ឋ​ដែល​បាន​ចោទប្រកាន់​អតីត​ប្រធានាធិបតី​លោក Abdulla Yameen ថា​បានធ្វើ​ប្រតិបត្តិការ​ហិរញ្ញវត្ថុ​ខុសច្បាប់​ខណៈ​គាត់​កាន់តំណែង​ជា​ប្រធានាធិបតី​”​។​
​
ទោះបីជា​យ៉ាងណាក៏ដោយ លោក Yameen បាន​បដិសេធ​រាល់​ការប្រព្រឹត្ត​ខុស​ហើយ​បាន​និយាយថា គាត់​បាន​ខ្ចី​ប្រាក់កម្ចី​ដើម្បី​ព​ន្លឿ​ន​ការអភិវឌ្ឍន៍​សេដ្ឋកិច្ច​។​
​
ក្រុម​អ្នក​រិះគន់​បាន​និយាយថា កិច្ចសន្យា​ត្រូវបាន​ផ្តល់អោយ​ក្រុមហ៊ុន​ចិន​ក្នុងតម្លៃ​ខ្ពស់​ដូចជា​ស្ពាន​ភ្ជាប់​ពី​រដ្ឋធានី Male ទៅ​អាកាសយានដ្ឋាន​ដ៏​ធំ​នៃ​ប្រទេសមួយ​នេះ​ជាដើម​។​
​
លោក Mohamed Hussain Shareef អគ្គលេខាធិការ​នៃ​គណបក្ស Progressive Party of Maldives របស់លោក Yameen បាន​ថ្លែងថា ប៉ូលិស​បានស្នើ​អោយ​អតីត​ប្រធានាធិបតី​បង្ហាញខ្លួន​នៅ​ទីស្នាក់ការ​កណ្តាល​របស់​ពួកគេ​នៅ​ថ្ងៃ​សៅរ៍​។​
​
ប្រទេស​ម៉ា​ល់​ឌី​វ​បានក្លាយ​ទៅជា​សមរភូមិ​ចុងក្រោយបង្អស់​សម្រាប់​ឥទ្ធិពល​រវាង​គូប្រជែង​ចាស់​គឺ​ឥណ្ឌា​និង​ចិន​។​
​
លោក Yameen បាន​ដឹកនាំ​ប្រទេស​ដែលមាន​ប្រជាជន​ត្រឹមតែ​ជាង​៤០០,០០០​នាក់​មួយ​នេះ​អោយខិត​ទៅជិត​ប្រទេស​ចិន​ឆ្ងាយ​ពី​ដៃគូ​ប្រពៃណី​ឥណ្ឌា​។​
​ប៉ុន្តែ​ចាប់តាំងពី​ការ​ចាញ់ឆ្នោត​ដ៏​គួរអោយភ្ញាក់ផ្អើល​របស់​លោក Yameen មក ប្រទេស​ឥណ្ឌា​បាន​បញ្ចេញ​ឥទ្ធិពល​របស់ខ្លួន​ឡើងវិញ​៕ REUTERS

​

Source: Kampuchea Thmey Daily