ភ្នំពេញ ៖ ក្រុមយុវជនស្ម័គ្រចិត្តដើម្បីសុខភាព និងក្រុមនិស្សិត នៃសាកលវិទ្យាល័យធនធានមនុស្សបានសម្ដែងនូវព្រួយបារម្ភចំពោះឥទ្ធិពលអាក្រក់ នៃគ្រឿងស្រវឹង ហើយបានសំណូមពរឲ្យរាជរដ្ឋាភិបាលកម្ពុជា ជួយពន្លឿនការអនុម័តច្បាប់ ស្ដីពីការត្រួតពិនិត្យគ្រឿងស្រវឹងឲ្យបានឆាប់ ហើយអនុវត្តច្បាប់នេះឲ្យបានតឹងរ៉ឹងបំផុត ខណៈការសេពគ្រឿងស្រវឹងកាន់តែមានការកើនឡើងនៅក្នុងសង្គមគ្រួសារ ក៏ដូចជានៅក្នុងសង្គមជាតិនាពេលបច្ចុប្បន្ននេះ។
នៅក្នុងសន្និសីទសារព័ត៌មានស្ដីអំពី «ផលប៉ះពាល់ នៃគ្រឿងស្រវឹង» ក្រោមការរៀបចំដោយក្រុមយុវជនស្ម័គ្រចិត្តដើម្បីសុខភាព ព្រឹកថ្ងៃទី១៤ធ្នូនេះ នៅសាកលវិទ្យាល័យធនធានមនុស្ស ក្រុមយុវជនយើងយល់ឃើញថា ការសេពគ្រឿងស្រវឹងនាពេលបច្ចុប្បន្ននេះ កាន់តែមានការកើនឡើង តាមរយៈការផ្សព្វផ្សាយអវិជ្ជមានមួយចំនួនអូសទាញឲ្យសេពគ្រឿងស្រវឹងមានភាពផុលផុសយ៉ាងខ្លាំង ក៏ប៉ុន្តែការអប់រំ និងការផ្សព្វផ្សាយអំពីផលប៉ះពាល់ នៃគ្រឿងស្រវឹង នៅមានការខ្វះខាត។
លោក ណាល់ វិឆៃ ក្រុមយុវជនស្ម័គ្រចិត្តដើម្បីសុខភាព បានលើកឡើងថា ការផ្សព្វផ្សាយពាណិជ្ជកម្មគ្រឿងស្រវឹង ដែលមានលក្ខណៈអូសទាញតាមរយៈបំប៉ោងរង្វាន់ពង្វក់ស្មារតី បានធ្វើឲ្យប្រជាពលរដ្ឋខ្មែរ ជាពិសេសយុវជន ដែលជាសសរទ្រូងជាតិ ឈ្លក់វង្វេងនឹងការសេពគ្រឿងស្រវឹង ធ្វើឲ្យប៉ះពាល់ដល់អនាគតរបស់ពួកគេ។
គ្រឿងស្រវឹងមិនត្រឹមតែបង្កផលប៉ះពាល់ដល់បុគ្គលដែលសេពប៉ុណ្ណោះទេ វាក៏បង្កផលប៉ះពាល់ដល់ក្រុមគ្រួសារ និងសង្គមជាតិ បង្កឲ្យមានជំងឺរ៉ាំរ៉ៃ អំពើហិង្សា ភាពក្រីក្រ និងគ្រោះថ្នាក់ចរាចរណ៍ជាដើម។
លោកបន្ដថា ក្នុងនាមជាយុវជន គឺមិនពេញចិត្តចំពោះការបើកទូលាយហួសហេតុ ដល់ការផ្សព្វផ្សាយគ្រឿងស្រវឹង តាមរយៈគ្រប់រូបភាពនៅក្នុងប្រទេសកម្ពុជា ដូចជា ការផ្សព្វផ្សាយគ្រឿងស្រវឹង ដោយភ្ជាប់ជាមួយនូវមោទនភាពជាតិ បេតិកភណ្ឌជាតិ និងការផ្ដល់រង្វាន់លើកទឹកចិត្តយ៉ាងគគ្រឹកគគ្រេងផងដែរ។
លោក ឈុន ណុច សកលវិទ្យាធិការរង នៃសាកលវិទ្យាល័យធនធានមនុស្សបានមានប្រសាសន៍លើកឡើងថា គ្រឿងស្រវឹងជាផ្នែកមួយ នៃផលប៉ះពាល់ដល់សង្គមជាតិ យើងអាចចូលរួមក្នុងការកាត់បន្ថយបាន ទី១-ទាមទារការយល់ដឹងពីបុគ្គលគ្រប់រូបពីផលប៉ះពាល់ដល់សុខភាព នៃគ្រឿងស្រវឹងឲ្យបានទូលំទូលាយ។ ទី២-ពាក់ព័ន្ធនឹងយន្តការគ្រប់គ្រងគ្រឿងស្រវឹងតាមរយៈពង្រឹងប្រព័ន្ធច្បាប់គ្រប់គ្រងគ្រឿងស្រវឹងឲ្យបានល្អប្រសើរ។ ទី៣-កុំឲ្យមានការផ្សព្វផ្សាយមានលក្ខណៈអូសទាញបែបឆបោកបញ្ឆោតខ្លាំងពេក ថាមានរង្វាន់រាប់លានដុល្លារជាដើមនោះ លោកមិនគាំទ្រទេ។
លោកបន្តថា វេទិកាសន្និសីទសារព័ត៌មានស្ដីអំពី «ផលប៉ះពាល់ នៃគ្រឿងស្រវឹង»ថ្ងៃនេះ សំខាន់ណាស់ ដើម្បីផ្តល់នូវចំណេះដឹងមួយចំនួន ក្នុងន័យអប់រំបុគ្គលិកលក្ខណៈសម្បត្តិរបស់បងប្អូននិស្សិតយើងផង ហើយក៏អាចជាសារមួយទៅដល់សង្គមកម្ពុជាទាំងមូល ពាក់ព័ន្ធនឹងឥរិយាបថ នៃការប្រើប្រាស់គ្រឿងស្រវឹង ដែលធ្វើឲ្យមានផលប៉ះពាល់ទៅដល់បុគ្គលអ្នកប្រើប្រាស់ ក៏ដូចជាប៉ះពាល់ដល់សង្គមកម្ពុជា។
បើតាមឯកសារនៅក្នុងសន្និសីទសារព័ត៌មានបានឲ្យដឹងថា រាជរដ្ឋាភិបាលកម្ពុជា បានធ្វើសេចក្ដីព្រាងច្បាប់ ស្តីពី ការត្រួតពិនិត្យគ្រឿងស្រវឹង កាលពីឆ្នាំ២០១៥ ក៏ប៉ុន្តែការអនុម័តច្បាប់នេះ ត្រូវបានបន្លាយពេលរហូតមកដល់បច្ចុប្បន្ននេះ។
សេចក្ដីព្រាងច្បាប់ ស្តីពី ការត្រួតពិនិត្យគ្រឿងស្រវឹងនោះ គឺផ្តោតទៅលើការតំឡើងពន្ធគ្រឿងស្រវឹង ការផ្សព្វផ្សាយពាណិជ្ជកម្ម ការកំហិតកន្លែងលក់ និងការកំណត់អាយុអ្នកសេពគ្រឿងស្រវឹងជាដើម៕
Source: Kampuchea Thmey Daily
0 Comments