ខ្មាន់កាំភ្លើងម្នាក់ ដែលបានសម្លាប់មនុស្ស៣នាក់នៅផ្សារបុណ្យណូអែលក្នុងទីក្រុង Strasbourg ត្រូវបានបាញ់សម្លាប់ដោយប៉ូលិសបារាំងកាលពីថ្ងៃព្រហស្បតិ៍ ខណៈពេលក្រុមជីហាដនិយមរដ្ឋឥស្លាមបានអះអាងថា គាត់ជាទាហានម្នាក់ក្នុងចំណោមទាហានរបស់ខ្លួន។
កងកម្លាំងសន្តិសុខបារាំងជាង៧០០នាក់កំពុងតាមប្រមាញ់លោក Cherif Chekatt អាយុ២៩ឆ្នាំចាប់តាំងពីការបង្ហូរឈាមកាលពីយប់ថ្ងៃអង្គារដែលជាការវាយប្រហារចុងក្រោយបង្អស់ក្នុងការវាយប្រហារដោយពួកជីហាដនៅក្នុងប្រទេសបារាំង។
រដ្ឋមន្ត្រីក្រសួងមហាផ្ទៃលោក Christophe Castaner បាននិយាយថា ប៉ូលិសចំនួន៣នាក់បានព្យាយាមសាកសួរលោក Chekatt បន្ទាប់ពីឃើញគាត់នៅតាមដងផ្លូវក្នុងតំបន់ Neudorf នៃទីក្រុងភាគខាងជើងប្រទេសបារាំងមួយនេះដែលជាកន្លែងគាត់បានធំធាត់។ គាត់មិនបានឆ្លើយសំណួរទេប៉ុន្តែបានបើកការបាញ់ប្រហារវិញ។
លោក Castaner បាននិយាយថា “ភ្លាមៗនោះ ពួកគេបានបាញ់តបតវិញហើយសម្លាប់អ្នកវាយប្រហារ”។
បណ្តាញឃោសនារបស់ក្រុមរដ្ឋឥស្លាមបានប្រកាសទទួលខុសត្រូវចំពោះការវាយប្រហារកាលពីថ្ងៃអង្គារ។
ភ្នាក់ងារ Amaq បាននិយាយនៅក្នុងសារមួយដែលបង្ហោះលើ Twitter ថា ជនល្មើសនៃការវាយប្រហារក្នុងទីក្រុង Strasbourg គឺជាទាហានម្នាក់នៃក្រុមរដ្ឋឥស្លាមហើយបានធ្វើប្រតិបត្តិការដើម្បីឆ្លើយតបទៅនឹងការអំពាវនាវអោយកំណត់គោលដៅលើប្រជាជាតិរបស់ក្រុមចម្រុះដែលប្រឆាំងនឹងក្រុម IS ។
យោងតាម AFP បាននិយាយថា ប្រទេសបារាំងត្រូវរងគ្រោះដោយរលកនៃការវាយប្រហារពីមនុស្សដែលអះអាងថាមានភក្ដីភាពចំពោះក្រុមអាល់កៃដាឬក្រុម IS ចាប់តាំងពីឆ្នាំ២០១៥មកដោយបានសម្លាប់មនុស្សជិត២៥០នាក់។
វាក៏មិនមែនជាលើកទីមួយដែរដែលទីផ្សារបុណ្យណូអែលត្រូវបានកំណត់គោលដៅនៅក្នុងទ្វីបអឺរ៉ុប។
កាលពីឆ្នាំ២០១៦ ជនជីហាដម្នាក់បានវាយលុកទីផ្សារបុណ្យណូអែលនៅក្នុងទីក្រុងប៊ែរឡាំងហើយបានរត់តាមប្រទេសហូឡង់និងបារាំងមុនពេលត្រូវបានបាញ់សម្លាប់នៅបីថ្ងៃក្រោយមកក្នុងប្រទេសអ៊ីតាលីភាគខាងជើង។
អាជ្ញាធរក្នុងតំបន់របស់បារាំងបានអះអាងថា ទីផ្សារបុណ្យណូអែលនៅទីក្រុង Strasbourg នឹងបើកឡើងវិញនៅថ្ងៃសុក្រ៕ AFP
Source: Kampuchea Thmey Daily
0 Comments