ភ្នំពេញ ៖ យោងតាមរបាយការណ៍របស់មជ្ឈមណ្ឌលជាតិផ្តល់ឈាមបានឲ្យដឹងថា សម្រាប់ឆ្នាំ២០១៨នេះ មជ្ឈមណ្ឌលជាតិផ្តល់ឈាម ទទួលបានឈាមទូទាំងប្រទេសបានចំនួន៨៣.៩៨៤ប្លោកក្នុងនោះនៅភ្នំពេញ មានចំនួន៥៨.៣៩៧ប្លោក ខណៈឆ្នាំ២០១៧កន្លងទៅ ទទួលបានអំណោយឈាមតែ៧៦.៥១១ប្លោក ប៉ុណ្ណោះ។
លោកវេជ្ជបណ្ឌិត ហុក គឹមចេង ប្រធានមជ្ឈមណ្ឌលជាតិផ្តល់ឈាមបានឲ្យដឹងថា នៅរាជធានីភ្នំពេញមជ្ឈមណ្ឌលជាតិផ្ដល់ឈាម ទទួលខុសត្រូវក្នុងការផ្គត់ផ្គង់ឈាមជាង៧០% ខណៈការទទួលខុសត្រូវ តាមបណ្ដាខេត្តដែលមានមជ្ឈមណ្ឌលផ្តល់ឈាមចំនួន២១កន្លែង មានត្រឹមតែ១% ទៅ៥% ប៉ុណ្ណោះ ព្រោះអ្នកជំងឺដែលត្រូវការឈាម ភាគច្រើនបញ្ជូនមកភ្នំពេញ ដូច្នេះហើយទើបអត្រាភាគរយនៅភ្នំពេញ ខ្ពស់ជាងនៅតាមបណ្ដាខេត្ត។
លោកវេជ្ជបណ្ឌិតបានបន្តថា នេះជាបន្ទុកមួយដ៏ធ្ងន់ធ្ងររបស់មជ្ឈមណ្ឌលជាតិផ្ដល់ឈាម សម្រាប់ការផ្គត់ផ្គង់ឈាមនេះ ដើម្បីជួយដល់អាយុជីវិតរបស់ពលរដ្ឋ ដែលបានមកទទួលសេវា ការព្យាបាលនៅតាមបណ្ដាមន្ទីរពេទ្យជាតិ និងមន្ទីរពេទ្យឯកជននានាផ្សេងទៀតទៅតាមតម្រូវការរបស់ពលរដ្ឋផងដែរ។
លោកវេជ្ជបណ្ឌិត ហុក គឹមចេង បានបន្តទៀតថា «សព្វថ្ងៃនេះ យើងមិនទាន់មានឈាមគ្រប់គ្រាន់សម្រាប់ជួយសង្គ្រោះជីវិតមនុស្ស ដែលត្រូវការឈាមបន្ទាន់នៅឡើយទេ។ ដូចនេះ យើងត្រូវការឈាម បន្ថែមទៀត ដើម្បីសង្គ្រោះជីវិតមនុស្សបន្ទាន់»។
លោកវេជ្ជបណ្ឌិតបានឲ្យដឹងទៀងថា ក្នុងមួយថ្ងៃគ្រាន់តែនៅរាជធានីភ្នំពេញ ត្រូវការឈាមចន្លោះពី ៨០ ទៅ១០០ប្លោក សម្រាប់ជួយសង្គ្រោះ ជនរងគ្រោះផ្សេងៗ ហើយ ទូទាំងប្រទេសត្រូវការឈាមប្រមាណ១៥០ប្លោករៀងរាល់ថ្ងៃ ពិសេសអ្នកជំងឺទាក់ទិននឹងជំងឺការហូរឈាមតាមប្រដាប់រំលាយអាហារ ការវះកាត់ជំងឺបេះដូង គ្រោះថ្នាក់ចរាចរណ៍ ករណី នៃការហូរឈាមមិនប្រក្រតីនៅមុន និងក្រោយពេលសម្រាលកូន ករណីជំងឺខ្សោយតម្រង់នោម និងករណី នៃការព្យាបាលថែទាំ ជំងឺមហារីក..។ល..។
លោកវេជ្ជបណ្ឌិតបានបន្ថែមទៀតថា ដើម្បីទទួលបានអំណោយឈាម មជ្ឈមណ្ឌលជាតិផ្ដល់ឈាមតែងតែសហការជាមួយនឹងក្លឹប នៃក្ដីស្រឡាញ់ ក្លឹបរបស់សហភាព សហព័ន្ធយុវជនកម្ពុជា នៅក្នុងការរៀបចំធ្វើយុទ្ធនាការ នៅតាមសាកលវិទ្យាល័យទាំងអស់ ក្នុងគោលបំណងដើម្បីប្រមូលបានអំណោយឈាមជួយដល់អាយុជីវិតមនុស្ស ដែលសម្រាកព្យាបាលនៅតាមមន្ទីរពេទ្យទាំងអស់។
លោកវេជ្ជបណ្ឌិតបានបញ្ជាក់ថា « បើសិនជាគ្មានការចូលរួមចំណែកពីសប្បុរសជនទាំងឡាយនោះ មជ្ឈមណ្ឌលក៏មិនអាចទ្រទ្រង់ និងផលិតឈាម បានឡើយ ដូច្នេះការចូលរួមរបស់បងប្អូន ពិតជាមានសារសំខាន់យ៉ាងខ្លាំង»។
លោកវេជ្ជបណ្ឌិតបានបន្ថែមឲ្យដឹងទៀតថា ការផ្ដល់សេវាផ្គត់ផ្គង់ឈាម គឺជាសេវាមនុស្សធម៌មួយ ដោយនៅក្នុងពេលបច្ចុប្បន្ន ជាបន្ទុករបស់រាជរដ្ឋាភិបាលទាំងស្រុង ក៏ដូចជាក្រសួងសុខាភិបាល ដោយសមាសភាពឈាម ទាំងអស់ត្រូវបានផ្គត់ផ្គង់ នៅតាមបណ្ដាមន្ទីរពេទ្យទូទាំងប្រទេស ដោយមិនឲ្យពលរដ្ឋបង់ថ្លៃសេវាឡើយដោយរដ្ឋជាអ្នករ៉ាប់រងទាំងអស់។
លោកវេជ្ជបណ្ឌិត ហុក គឹមចេង បានជំរុញ និងអំពាវ ទៅកាន់ប្រជាពលរដ្ឋខ្មែរ ទូទាំងប្រទេស ជាពិសេសក្រុមយុវជនបន្តចូលរួមបរិច្ចាគឈាមដើម្បីឲ្យមជ្ឈមណ្ឌលជាតិយកទៅជួយសង្គ្រោះដល់ជនរងគ្រោះ ដែលត្រូវការឈាមជាចាំបាច់ ហើយសកម្មភាពទាំងនេះពិតជាបានចូលរួម ចំណែកយ៉ាងខ្លាំង លើការជួយសង្គ្រោះជីវិតអ្នកដទៃ៕
Source: Kampuchea Thmey Daily
0 Comments