កំពង់ឆ្នាំង ៖ មនុស្សប្រុស/ស្រីចំនួន២០នាក់ ជាមុខសញ្ញាប្រើប្រាស់ និងជួញដូរថ្នាំញៀន ត្រូវបានសមត្ថកិច្ចនគរបាលខេត្ត ចុះបង្ក្រាប និងចាប់ខ្លួនបានជាបន្តបន្ទាប់ រួមទាំងដកហូតបានថ្នាំញៀនចំនួន៩៦កញ្ចប់ និង១៨២គ្រាប់។
ជនពាក់ព័ន្ធនឹងគ្រឿងញៀនខាងលើនេះ ត្រូវបានបង្ហាញមុខជាសាធារណៈនៅក្នុងស្នងការដ្ឋាននគរបាលខេត្តកំពង់ឆ្នាំង នាល្ងាចថ្ងៃទី០៧ ខែធ្នូ ឆ្នាំ២០១៨ នេះ។
លោកឧត្ដមសេនីយ៍ទោ ឡុច វណ្ណារ៉ា ស្នងការនគរបាលខេត្តកំពង់ឆ្នាំង បានឲ្យដឹងថា អនុវត្តន៍តាមការណែនាំរបស់អគ្គស្នងការនគរបាលជាតិ និងការណែនាំរបស់ គណៈបញ្ជាការឯកភាពខេត្ត សមត្ថកិច្ចនគរបាលក្រុង ស្រុក និងខេត្ត បានចុះប្រតិបត្តិការបង្ក្រាបបទល្មើស ចែកចាយ និងប្រើប្រាស់ថ្នាំញៀន ជាបន្តបន្ទាប់ ដើម្បីទប់ស្កាត់ និងបង្ក្រាបដោយប្រសិទ្ធភាព ក្នុងការចែកចាយ ការប្រើប្រាស់ ថ្នាំញៀនដែលតែងតែធ្វើសកម្មភាពចែកចាយលក់ដូរ ពង្វក់ស្មារតីយុវជន ដែលជាកូនចៅប្រជាពលរដ្ឋនៅក្នុងខេត្ត។ ធ្វើការចាប់ខ្លួនជាបន្តបន្ទាប់ ពីថ្ងៃទី០៤ រហូតដល់ថ្ងៃទី០៦ធ្នូ កន្លងទៅថ្មីៗនេះ។
នៅក្នុងកិច្ចប្រតិបត្តិការនេះ ជនសង្ស័យជាអ្នកជួញដូរ ចែកចាយ និងប្រើប្រាស់ថ្នាំញៀនចំនួន២០ នាក់ (ស្រី៤នាក់) ត្រូវបានបង្ហាញមុខឲ្យអ្នកសារព័ត៌មានថតផ្សាយព័ត៌មានជាសាធារណៈ ដោយនៅក្នុងចំណោមជនសង្ស័យទាំង២០នាក់នេះ មាន៥នាក់ ជាមេខ្លោងជួញដូរ និងចែកចាយថ្នាំញៀន គឺមាននៅស្រុកទឹកផុសចំនួន២នាក់ ស្រុករលាប្អៀរចំនួន១នាក់ និងក្រុងកំពង់ឆ្នាំង ចំនួន៤នាក់ ចំណែក ១៥នាក់ទៀត គឺជាអ្នកប្រើប្រាស់ថ្នាំញៀន ដែលចាប់មកពីស្រុក និងក្រុងទាំង៣ខាងលើនេះ។
លោកស្នងការនគរបាលខេត្តកំពង់ឆ្នាំងបានបន្តថា ចំពោះវត្ថុតាងដែលរឹបអូសបាននៅក្នុងកិច្ចបង្ក្រាបខាងលើនេះ មានថ្នាំញៀនប្រភេទម៉ាទឹកកក (ICE )ចំនួន៩៦កញ្ចប់ ស្មើនឹង២៧០,១៥ ក្រាម .ថ្នាំញៀនប្រភេទWY. ចំនួន១៨២គ្រាប់ ស្មើនឹង១៩,៦០ក្រាម និងដកហូតបាន ម៉ូតូចំនួន២គ្រឿង និងទូរស័ព្ទដៃចំនួន៤គ្រឿង។
ដោយឡែកជនសង្ស័យទាំង២០នាក់ រួមទាំងវត្ថុតាងទាំងអស់ ត្រូវបានសមត្ថកិច្ចនគរបាលជំនាញកសាងសំណុំរឿងតាមនីតិវិធី និងបញ្ជូនទៅតុលាការចាត់ការតាមច្បាប់។
ចំណែកទិសដៅចំពោះមុខ ស្នងការដ្ឋាននគរបាលខេត្ត នឹងដាក់ចេញនូវវិធានការណ៍បង្ក្រាបគ្រឿងញៀននេះឲ្យកាន់តែខ្លាំងបន្ថែមទៀត ដោយប្រើវិធានការ ឆែកឆេរអាវុធជាតិផ្ទុះនៅពេលយប់ ក៏ដូចជាការឆែករកសារធាតុញៀនផងដែរ។
ក្រៅពីនោះ នឹងធ្វើរដ្ឋបាលត្រួតពិនិត្យនៅពេលថ្ងៃ តាមផ្ទះសំណាក់ និងសណ្ឋាគារជាដើម។ បូករួមជាមួយការដាក់កម្លាំងភ្នែកត្រចៀកឃ្លាំមើល អ្នកប្លែកមុខដែលចេញចូលតាមមូលដ្ឋាននិមួយៗ និងចំណុចសំខាន់មួយទៀត និងត្រូវតាមដានមុខសញ្ញាចាស់ ដែលធ្លាប់ប្រើប្រាស់ និងចែកចាយថ្នាំញៀន និងមុខសញ្ញាចាស់ដែលទើបចេញពីពន្ធនាគារខេត្ត ទៅរស់នៅតាមមូលដ្ឋានរបស់ពួកគេវិញ ៕
Source: Kampuchea Thmey Daily
0 Comments