សហរដ្ឋអាមេរិកនិងអង់គ្លេសបានចោទប្រកាន់រុស្ស៊ីកាលពីថ្ងៃសុក្រពីបទប្រឌិតរឿងរ៉ាវអំពីអាវុធគីមីដែលប្រើប្រាស់ដោយពួកឧទ្ទាមស៊ីរី ហើយបានព្រមានទីក្រុងមូស្គូប្រឆាំងនឹងការបំផ្លាញបទឈប់បាញ់ដ៏ផុយស្រួយមួយ។
ក្រសួងការពារជាតិរបស់ប្រទេសរុស្ស៊ីបាននិយាយថា ក្រុមឧទ្ទាមបានបាញ់អាវុធដែលផ្ទុកសារធាតុក្លរីននៅថ្ងៃទី២៤ខែវិច្ឆិកាក្នុងទីក្រុង អាឡេប៉ូ ដែលកាន់កាប់ដោយរបបស៊ីរីខណៈដែលប្រព័ន្ធផ្សព្វផ្សាយរដ្ឋស៊ីរីបានបានរាយការណ៍ថា ជនជាតិស៊ីរីប្រហែល១០០នាក់ត្រូវបានសម្រាកព្យាបាលនៅមន្ទីរពេទ្យដោយសារតែពិបាកដកដង្ហើម។
ប្រទេសរុស្ស៊ីបានឆ្លើយតបទៅនឹងការវាយប្រហារនោះដោយការវាយប្រហារពីអាកាសនៅខេត្ត អ៊ីដលីប ដែលជាមូលដ្ឋានរឹងមាំចុងក្រោយបង្អស់របស់ពួកឧទ្ទាមនិងជីហាដនិយមដែលកំពុងប្រយុទ្ធនឹងលោកប្រធានាធិបតី Bashar al-Assad ។
សហរដ្ឋអាមេរិកបាននិយាយថា ខ្លួនមានព័ត៌មានគួរអោយទុកចិត្តដែលថា ការអះអាងអំពីសារធាតុក្លរីនគឺពិតជាខុសហើយថា កងកម្លាំងរុស្ស៊ីនិងស៊ីរីបានជំនួសដោយឧស្ម័នបង្ហូរទឹកភ្នែក។
អ្នកនាំពាក្យក្រសួងការបរទេសលោក Robert Palladino បាននិយាយនៅក្នុងសេចក្តីថ្លែងការណ៍មួយថា “សហរដ្ឋអាមេរិកមានក្តីព្រួយបារម្ភយ៉ាងជ្រាលជ្រៅថា ក្រុមមន្ដ្រីដែលគាំទ្ររបបនេះបានបន្តការគ្រប់គ្រងទីតាំងវាយប្រហារភ្លាមៗក្រោយហេតុការណ៍នោះដែលអនុញ្ញាតអោយពួកគេអាចប្រឌិតគំរូនិងសារធាតុពុលមុនពេលមានការស៊ើបអង្កេតដ៏ត្រឹមត្រូវមួយដោយអង្គការហាមឃាត់អាវុធគីមី”។
លោកបាននិយាយថា ប្រទេសរុស្ស៊ីនិងស៊ីរីបានប្រើប្រាស់វាជាឱកាសមួយដើម្បីធ្វើអោយប៉ះពាល់ដល់ការជឿទុកចិត្តនៅក្នុងបទឈប់បាញ់នៅខេត្តអ៊ីដលីប។
មហាអំណាចលោកខាងលិច អង្គការសហប្រជាជាតិនិងអង្គការសិទិ្ធមនុស្សបានចង្អុលម្តងហើយម្តងទៀតដាក់កងកម្លាំងរបស់លោក Assad សម្រាប់ការវាយប្រហារដោយអាវុធគីមី។
យោងតាមអង្គការសហប្រជាជាតិបានអោយដឹងថា ការវាយប្រហារដោយឧស្ម័នសារីនកាលពីខែមេសាឆ្នាំ២០១៧នៅក្នុងទីក្រុង Khan Sheikhun បានសម្លាប់មនុស្សចំនួន៨៣នាក់។ ប្រធានាធិបតីអាមេរិកលោក Donald Trump បានឆ្លើយតបវិញដោយបញ្ជាអោយបាញ់មីស៊ីលចំនួន៥៩គ្រាប់ដើម្បីវាយប្រហារមូលដ្ឋានអាកាសស៊ីរី៕ AFP
Source: Kampuchea Thmey Daily
0 Comments