ក្រុមរដ្ឋអាជ្ញាអាមេរិកបានបង្ហាញកាលពីថ្ងៃសុក្រថា ជនជាតិរុស្ស៊ីម្នាក់បានផ្តល់កិច្ចសហប្រតិបត្តិការដល់យុទ្ធនាការរបស់លោក Donald Trump នៅដើមឆ្នាំ២០១៥។ រដ្ឋអាជ្ញាប្រកាសថា អតីតមេធាវីរបស់លោកប្រធានាធិបតីគឺលោក Michael Cohen បានផ្តល់ជំនួយ “ពាក់ព័ន្ធ” និង “សំខាន់” ដល់ការស៊ើបអង្កេតអំពីបញ្ហារុស្ស៊ី។
នៅក្នុងករណីដាច់ដោយឡែកមួយ រដ្ឋអាជ្ញាសហព័ន្ធបានទាមទារអោយមានការដាក់ពន្ធនាគារក្នុងរយៈពេលចន្លោះពី៥១ទៅ៦៣ខែពោលគឺពី៤ទៅ៥ឆ្នាំសម្រាប់លោក Cohen ពីបទក្លែងបន្លំធនាគារនិងការរំលោភបំពានហិរញ្ញវត្ថុយុទ្ធនាការដែលគាត់បានសារភាពថាមានកំហុសកាលពីខែសីហា។
មេធាវីអាមេរិកឈ្មោះ Robert Khuzami បានចោទប្រកាន់បុរសអាយុ៥២ឆ្នាំរូបនេះថា ត្រូវបានជំរុញដោយ “ភាពលោភលន់ផ្ទាល់ខ្លួន” និងប្រើប្រាស់អំណាចនិងឥទ្ធិពលរបស់គាត់ “ម្តងហើយម្តងទៀត” ចំពោះ “ការបោកបញ្ឆោត”។
ការរំលោភបំពានផ្នែកហិរញ្ញវត្ថុក្នុងយុទ្ធនាការឃោសនាដែលលោក Cohen បានសារភាពកាលពីខែសីហានោះគឺពាក់ព័ន្ធនឹងការចំណាយប្រាក់បំបិទមាត់ដែលគាត់បានធ្វើឡើងក្នុងនាមលោក Trump ទៅអោយអតីតមនុស្សជាទីស្រឡាញ់របស់លោកប្រធានាធិបតីដោយរួមទាំងតារាសិចនាង Stormy Daniels ផងដែរ។
លោក Robert Mueller ដែលជារដ្ឋអាជ្ញាពិសេសដឹកនាំការស៊ើបអង្កេតចូលក្នុងការជ្រៀតជ្រែករបស់រុស្ស៊ីក្នុងការបោះឆ្នោតឆ្នាំ២០១៦គឺបានបន្តដាក់ឯកសារដាច់ដោយឡែកមួយដោយនិយាយថា លោក Cohen បានធ្វើកិច្ចខិតខំប្រឹងប្រែងគួរអោយកត់សម្គាល់ដើម្បីជួសជុលកំហុសវិជ្ជាជីវៈរបស់គាត់ ទទួលយកការទទួលខុសត្រូវចំពោះសកម្មភាពរបស់គាត់និងជួយដល់ការស៊ើបអង្កេតពិសេស។
នៅខែវិច្ឆិកាឆ្នាំ២០១៥ លោក Cohen បាននិយាយទៅកាន់មនុស្សម្នាក់ដែលគួរអោយទុកចិត្តនៅក្នុងសហព័ន្ធរុស្ស៊ីដែលបានផ្តល់ឥទ្ធិពលនយោបាយនិងឥទ្ធិពលលើកម្រិតរដ្ឋាភិបាលដល់យុទ្ធនាការឃោសនា។
លោក Cohen បាននិយាយថា មនុស្សម្នាក់នោះបានស្នើម្តងហើយម្តងទៀតអោយមានកិច្ចប្រជុំមួយរវាងលោក Trump និងប្រធានាធិបតីរុស្ស៊ីលោក Vladimir Putin ដោយអះអាងថា វាអាចមានឥទ្ធិពល “មិនគួរអោយជឿ” មិនត្រឹមតែនយោបាយប៉ុណ្ណោះទេប៉ុន្តែថែមទាំងក្នុងទំហំអាជីវកម្មទៀតផង។
ទោះបីជាយ៉ាងណាក៏ដោយ លោក Cohen មិនបានធ្វើតាមការអញ្ជើញនោះទេ។
គួរបញ្ជាក់ជាថ្មីថា កាលពីសប្តាហ៍មុន លោក Cohen បានសារភាពកំហុសថាបាននិយាយកុហកទៅសភាទាក់ទងនឹងកិច្ចព្រមព្រៀងអចលនទ្រព្យក្រុងមូស្គូដែលត្រូវបានបន្តរហូតដល់មួយខែមុនពេលលោក Trump ក្លាយជាបេក្ខជនគណបក្សសាធារណរដ្ឋសម្រាប់តំណែងប្រធានាធិបតីជាផ្លូវការ៕ AFP
Source: Kampuchea Thmey Daily
0 Comments