ភ្នំពេញ ៖ បុរសជាសន្តិសុខក្រុមហ៊ុនឯកជនម្នាក់ ត្រូវបានចោរអារ.ក សម្លាប់ ប្លន់យកម៉ូតូទៅបាត់ដោយសុវត្ថិភាព កាលពីវេលាម៉ោង១កន្លះរំលងអធ្រាត្រ ឈានចូលថ្ងៃទី២៩ ខែធ្នូ ឆ្នាំ២០១៨ នៅមុខវត្តក្រាំងធ្នង់ សង្កាត់ក្រាំងធ្នង់ ខណ្ឌសែនសុខ។
សាកសពជនរងគ្រោះរងគ្រោះឈ្មោះ នុត ចន្ថន អាយុ៥៩ឆ្នាំ មុខរបរជាសន្តិសុខក្រុមហ៊ុនឯកជនមួយ នៅរាជធានីភ្នំពេញ និងមានស្រុកកំណើតនៅភូមិរោទ៍ ឃុំញរ ស្រុកកំពង់រោទ៍ ខេត្តស្វាយរៀង។
មូលហេតុ នៃការស្លាប់នេះ ត្រូវបានសមត្ថកិច្ចស្រាវជ្រាវរកឃើញថា នៅមុនពេលកើតហេតុ ជនរងគ្រោះ នុត ចន្ថន បានបញ្ចប់ម៉ោងយាមប្រចាំការនៅរោងចក្រផលិតបារីមួយ មានទីតាំងនៅទល់មុខប៉ុស្តិ៍នគរបាលរដ្ឋបាលសង្កាត់ទឹកថ្លា នៅម៉ោង២៤យប់។ ជាទម្លាប់ក្រោយពេលបញ្ចប់ម៉ោងស៊ីឈ្នួលយាមកាមឲ្យគេរួច គាត់តែងតែឆ្លៀតចេញមករត់ម៉ូតូឌុប។ នៅយប់ថ្ងៃកើតហេតុ គាត់ក៏ត្រូវចោរល្បួង
ហៅជិះយកទៅសម្លាប់ប្លន់យកម៉ូតូតែម្ដង នៅចំណុចមុខវត្តក្រាំង មានចម្ងាយជាង២០០ម៉ែត្រប៉ុណ្ណោះពីទីស្នាក់ប៉ុស្តិ៍នគរបាលរដ្ឋបាល សង្កាត់ក្រាំងធ្នង់។
ក្រោយពេលចោរប្លន់ទៅបាត់ ទើបមានប្រជាជនធ្វើដំណើរឆ្លងកាត់ទីនោះ ប្រទះឃើញសាកសពជនរងគ្រោះនៅតាមផ្លូវ ក៏នាំគ្នាផ្អើលមករាយការណ៍ប្រាប់ប៉ូលិសមូលដ្ឋានឲ្យមកមើល។
សាកសពមានស្នាមរបួសដោយស្នាមអារ.ក នឹងកាំបិត ឬ ឡាម(វត្ថុរឹង) ស្លាកស្នាមនេះប៉ូលិសសន្និដ្ឋានជនល្មើសបានចាប់អារ.ក ជនរងគ្រោះ ឲ្យស្លាប់មុនពេលប្លន់យកម៉ូតូ ដែលតាមការបំភ្លឺពីកូនប្រុសរបស់សពម្នាក់ ឈ្មោះ ឡាំ រិទ្ឋី ភេទប្រុស អាយុ៣០ឆ្នាំ បានប្រាប់ថា ម៉ូតូដែលចោរប្លន់យកទៅបាត់នោះ ម៉ាកហុងដាឌ្រីម សេ១២៥ ស៊េរីឆ្នាំ២០១៥។
នេះមិនមែនជាលើកទី១ទេដែលអំពើប្លន់សម្លាប់កើតឡើងនៅក្បែរប៉ុស្តិ៍នគរបាលរដ្ឋបាលសង្កាត់ក្រាំងនោះ កាលពីប៉ុន្មានឆ្នាំ គឺនៅក្បែរប៉ុស្តិ៍តែម្ដង ចម្ងាយប្រហែលតែជាង១០០ម៉ែត្រពីប៉ុស្តិ៍ប៉ុណ្ណោះ។
ទោះបីយ៉ាងណា ប៉ូលិសភ្នំពេញ ក៏កំពុងតែប្រឹងប្រែងធ្វើការស្រាវជ្រាវតាមរកចាប់ខ្លួនជនល្មើសយកមកផ្ដន្ទាទោសតាមច្បាប់ ដែលកន្លងមកអំពើប្លន់សម្លាប់ភាគច្រើនត្រូវគេចាប់បាន អំពើអាក្រក់ជាកម្មពៀរ ឈាមស្រែកស្បែកហៅ៕
Source: Kampuchea Thmey Daily
0 Comments