បន្ទាយមានជ័យ ៖ គ្រោះថ្នាក់ចរាចរណ៍ដោយខ្លួនឯង បណ្តាលឲ្យមេកាំកុងត្រូលថ្មី នៃច្រកតំបន់បឹងត្រកួនស្លាប់ កៀបក្នុងរថយន្តរហូតពេលព្រឹកទើបពលរដ្ឋដឹង។
ហេតុការណ៍នេះ កើតឡើង កាលពីថ្ងៃទី២៨ ខែធ្នូ ឆ្នាំ២០១៨ ចន្លោះពីម៉ោង២២និង០០នាទី ដល់ម៉ោង០៦និង៣០នាទី ថ្ងៃទី២៩ធ្នូ លើផ្លូវជាតិលេខ៥៨ មកដល់ត្រងចំណុចខាងជើងខ្លោងទ្វារមណ្ឌលអភិវឌ្ឍន៍យោធិនពិការ៣១៧ តេជោភ្នំឆ័ត្រ ភូមិចំការគរ្រុកស្វាយចេក ខេត្តបន្ទាយមានជ័យ។
លោក ជា ឆ្លូញ អធិការស្រុកស្វាយចេកបានឲ្យដឹងថា ជនរងគ្រោះក្នុងហេតុការណ៍នេះមានឈ្មោះ សំ សុធារ័ត្ន ប្រធានកាន់កុងត្រូលច្រកបឹងត្រកួន ស្រុកថ្មពួក បានបើកបររថយន្តម៉ាក LEXUS 300 ពណ៌ខ្មៅ ពាក់ស្លាកលេខភ្នំពេញ2S.9669 ដែលបើកបរពីត្បូងទៅជើង លើផ្លូវជាតិលេខ៥៨ មកដល់ត្រងចំណុចខាងជើងខ្លោងទ្វារមណ្ឌលអភិវឌ្ឍន៍យោធិនពិការ៣១៧តេជោភ្នំឆ័ត្រ មានចម្ងាយប្រមាណជា៥០០ម៉ែត្រ រថយន្តក៏បានធ្លាក់ចូលប្រឡាយទឹកបណ្តាលឲ្យផ្ងារជើងឡើងលើ ដោយគ្មានអ្នកណាដឹងឡើយ លុះព្រឹកឡើងទើបមានពលរដ្ឋបានឃើញរាយការណ៍មកសមត្ថកិច្ចចុះទៅពិនិត្យឃើញសពជនរងគ្រោះក្នុងរថយន្តតែម្ដង។
តាមការស្រាវជ្រាវ មុនកើតហេតុ ជនរងគ្រោះបានត្រឡប់ពីប្រជុំនៅសាខាក្រុងប៉ោយប៉ែត ហើយក៏បើកត្រឡប់ទៅស្នាក់ការវិញ ក៏ជួបគ្រោះថ្នាក់តែម្ដង៕
Source: Kampuchea Thmey Daily
0 Comments