សៀមរាប ៖ នាថ្ងៃទី១៤ ខែធ្នូ ឆ្នាំ២០១៨ នៅសាលប្រជុំសណ្ឋាគារសុខាល័យអង្គរ ខេត្តសៀមរាប, សមាគមមីក្រូហិរញ្ញវត្ថុកម្ពុជា បានរៀបចំអង្គសន្និសីទមីក្រូហិរញ្ញវត្ថុប្រចាំឆ្នាំ ស្តីពី “ការគ្រប់គ្រងបម្រែបម្រួលដើម្បីអនាគតប្រកបដោយនិរន្តរភាពក្រោមប្រធានបទ ៖ បន្តផ្ដល់សេវាហិរញ្ញវត្ថុ ដែលមានឥទ្ធិពលជាវិជ្ជមាន” ក្រោមអធិបតីភាពលោក រ័ត្ន សុវណ្ណនរៈ ឧបការីទេសាភិបាល និងជាអគ្គនាយកត្រួតពិនិត្យ នៃធនាគារជាតិនៃកម្ពុជា និងវត្តមានតំណាងស្ថាប័នរាជរដ្ឋាភិបាល ប្រតិបតិ្តករ វិនិយោគិន និងម្ចាស់ជំនួយនានា ទាំងជាតិ និងអន្តរជាតិ ជាច្រើនផងដែរ។
សន្និសីទប្រចាំឆ្នាំនេះឡើង ដើម្បីរំលឹកពីសមិទ្ធផលដែលសម្រេចបាននាពេលកន្លងមក និងដើម្បីចែករំលែកនូវបទពិសោធន៍ និងព័ត៌មានផ្សេងៗដែលពាក់ព័ន្ធនឹងវិស័យ ហិរញ្ញវត្ថុទាំងក្នុងប្រទេសនិងអន្តរជាតិ ក៏ដូចជា បង្កើនបរិយាកាសរីករាយ និងភាពស្និទ្ធស្នាលរវាងស្ថាប័នរាជរដ្ឋាភិបាល ប្រតិបតិ្តករ វិនិយោគិន និងម្ចាស់ជំនួយនានា បានជួបប្រាស្រ័យទាក់ទងគ្នា ព្រមទាំងជាឱកាស ផ្តល់នូវធាតុចូលសំខាន់ៗទាំងទ្បាយ ដើម្បីឱ្យវិស័យហិរញ្ញវត្ថុ បានត្រៀមលក្ខណៈសម្បត្តិគ្រប់គ្រាន់ និងទាន់ពេលវេលាសម្រាប់ឆ្លើយតបទៅនឹងការប្រឈម និងបម្រែបម្រួលនានា នាពេលអនាគត។
ក្នុងរបាយការណ៍ស្វាគមន៍របស់ លោក គា បូរាណប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា បានបង្ហាញថា៖ គិតមកត្រឹមត្រីមាសទីបី នៅឆ្នាំ២០១៨នេះ ប្រជាពលរដ្ឋប្រមាណជិត២លានគ្រួសារបានទទួលសេវាហិរញ្ញវត្ថុពីគ្រឹះស្ថានមីក្រូហិរញ្ញវត្ថុមានដូចជា សេវាកម្ចី សេវាសន្សំ សេវាផ្ទេរប្រាក់ និងទូទាត់ជាដើម។
ជាក់ស្តែងវិស័យនេះបានផ្តល់ប្រាក់កម្ចីដល់ប្រជាពលរដ្ឋប្រមាណ ៥,០០០លានដុល្លារសហរដ្ឋអាមេរិក តាមរយៈការិយាល័យតំណាងចំនួន១,៣៩១កន្លែង និងមានបុគ្គលិកបម្រើការងារសរុបប្រមាណ ៣០,៥៣៩នាក់ នៅទូទាំង២៥ រាជធានី-ខេត្ត នៃព្រះរាជាណាចក្រកម្ពុជា។
លោក គា បូរាណបញ្ជាក់ថា ៖ រហូតមកដល់បច្ចុប្បន្ននេះ សមាគមមានសមាជិកសរុបចំនួន១០៣គ្រឹះស្ថាន ក្នុងនោះមានគ្រឹះស្ថានមីក្រូហិរញ្ញវត្ថុទទួលប្រាក់បញ្ញើចំនួន៧ គ្រឹះស្ថានមីក្រូហិរញ្ញវត្ថុចំនួន៦៥ គ្រឹះស្ថានភតិសន្យាហិរញ្ញវត្ថុចំនួន៨ និងគ្រឹះស្ថានឥណទានជនបទចំនួន២៣។
ថ្លែងបើកអង្គសន្និសីទនាឱកាសនោះ លោករ័ត្ន សុវណ្ណនរៈ ឧបការីទេសាភិបាល និងជាអគ្គនាយកត្រួតពិនិត្យ នៃធនាគារជាតិនៃកម្ពុជា មានប្រសាសន៍ថា ៖ វិស័យមីក្រូហិរញ្ញវត្ថុកម្ពុជាឆ្នាំ២០១៨ជារួម វិស័យនេះនៅតែបន្តការរីកចម្រើនទាំងវិសាលភាព និងផ្តល់នូវផលិតផលមីក្រូហិរញ្ញវត្ថុថ្មីៗ និងច្រើនបែបដោយប្រើប្រាស់បច្ចេកវិទ្យាហិរញ្ញវត្ថុទំនើបៗ ព្រមទាំងបានប្រកាន់ខ្ជាប់នូវតួនាទីរបស់ខ្លួនក្នុងការលើកកម្ពស់ហិរញ្ញប្បទានជនបទគួរជាទីមោទនៈផងដែរ។
លោក រ័ត្ន សុវណ្ណនរៈ បន្តថា ៖ ក្នុងនាមអាជ្ញាធរត្រួតពិនិត្យ ធនាគារជាតិនៃកម្ពុជាចាំបាច់ត្រូវតែថ្លឹងថ្លែងរវាងការដាក់ចេញនូវក្របខ័ណ្ឌបទបញ្ញត្តិប្រុងប្រយ័ត្នដែលគាំទ្រសល់ស្ថិរភាពហិរញ្ញវត្ថុក្នុងការប្រកួតប្រជែង ភាពបទបែននៃបច្ចេកវិទ្យានិងការជំរុញបរិយាប័ន្នហិរញ្ញវត្ថុ។ទន្ទឹមនឹងគោលបំណងលើកកម្ពស់បរិយាប័ន្នហិរញ្ញវត្ថុ ធនាគារជាតិនៃកម្ពុជាក៏បានចូលរួមជាសមាជិកពេញលេញរបស់សហព័ន្ធបរិយាប័ន្នហិរញ្ញវត្ថុ ហៅកាត់ថាAFI និងជាសមាជិកនៃគណៈកម្មាធិការជាន់ខ្ពស់នៃការលើកកម្ពស់បរិយាប័ន្នហិរញ្ញវត្ថុសម្រាប់ស្ត្រីរបស់សហព័ន្ធAFIផងដែរ ។
លោកបញ្ជាក់ផងដែរថា ៖ សមាគមធនាគារនៅកម្ពុជាបានរៀបចំសេចក្តីព្រាងនៃសេចក្តីនែនាំក្នុងការផ្តល់ហិរញ្ញប្បទានប្រកបដោយនិរន្តរភាព ហើយសង្ឃឹមថាសេចក្តីណែនាំនេះនឹងត្រូវដាក់ឱ្យអនុវត្តជាផ្លូវការក្នុងពេលឆាប់ៗខាងមុខ។សេចក្តីណែនាំនេះផ្តោតសំខាន់លើការផ្តល់ហិរញ្ញប្បទានបៃតង ដោយយកចិត្តទុកដាក់លើផលប៉ះពាល់ បរិស្ថាន សន្តិសុខសង្គម និងនិរន្តរភាពរបស់អតិថិជន។ល។ ៕
Source: Kampuchea Thmey Daily
0 Comments