បាត់ដំបង ៖ នៅក្នុងតំបន់បឹងទន្លេសាប ក្នុងទឹកដីខេត្តបាត់ដំបង ជាពិសេសក្នុងស្រុកឯកភ្នំ ស្រុកសង្កែ និងស្រុកមោងឬស្សី តាមការសង្កេតឃើញថា នៅពេលមន្ត្រីពាក់ព័ន្ធចុះបង្ក្រាបម្តងៗ តែងមានពលរដ្ឋជាច្រើនបានសាទរ និងត្រេកអររាល់លើក ហើយមើលទៅហាក់ដូចជា ពួកគាត់នាំគ្នាសប្បាយនឹងសកម្មភាពបង្ក្រាបលើករណីនេះណាស់ រហូតដល់ពួកគាត់នាំគ្នានិយាយប្រាប់អ្នកយកព័ត៌មានយើងថា ការចុះបង្ក្រាបបទល្មើសនេសាទ ពួកគាត់សប្បាយចិត្ត និងត្រេកអរ ជាងចែកអំណោយដល់ពួកគាត់ទៅទៀត។
ការនិយាយរបស់ប្រជាពលរដ្ឋបែបនេះជាមួយនឹងអ្នកសារព័ត៌មាន នៅខណៈដែលមន្ត្រីពាក់ព័ន្ធបានចុះបង្ក្រាបបទល្មើសនេសាទកាលពីថ្ងៃទី២៧ ខែធ្នូ ឆ្នាំ២០១៨ថ្មីនេះ។
គួរបញ្ជាក់ផងដែរថា ការចុះបង្ក្រាបបទល្មើសនេសាទកាលពីថ្ងៃទី២៧ ខែធ្នូ ឆ្នាំ២០១៨ កន្លងថ្មីៗនេះមាន លោក អ៊ុយ សុធារី ជាអភិបាលរង នៃគណៈអភិបាលខេត្តបាត់ដំបង ជាអ្នកដឹកនាំកម្លាំង ដោយបានសហការជាមួយកងកម្លាំងគណៈបញ្ជាការឯកភាពស្រុកឯកភ្នំ រួមនឹងលោកប្រធានមន្ទីរបរិស្ថានខេត្ត លោកប្រធានមន្ទីរមុខងារសាធារណៈខេត្ត អធិការដ្ឋានរដ្ឋបាលជលផលខាងត្បូងបឹងទន្លេសាបព្រមទាំងអាជ្ញាធរដែនដី ឃុំកោះជីវាំង និងសហគមន៍នេសាទព្រែកទាល់ផង បានចុះប្រតិបត្តិការបង្ក្រាបបទល្មើសនេសាទខុសច្បាប់នៅចំណុចមួយចំនួន ក្នុងភូមិសាស្ត្រស្រុកឯកភ្នំ។
តាមសេចក្ដីរាយការណ៍មកថា ចំណុចដែលបានចុះបង្ក្រាបក្នុងភូមិសាស្ត្រស្រុកឯកភ្នំនោះរួមមានចំណុចពាមព្រែកព្រះដើមឈើ,ចំណុចដៃអូរពាក់កន្ទេល,និងចំណុចចែងឡូត៍២ អតីតឡូត៍នេសាទលេខ២។
ចំពោះលទ្ធផលក្នុងការបង្ក្រាបខាងលើនេះ សមត្ថកិច្ច បានរឹបអូសឧបករណ៍ខុសច្បាប់ដូចជា សាច់មងប្រវែង២.៤០០ម៉ែត្រ,ឡុកចំនួន១២ឡុក,បង្គោលឈើចំនួន១.៣០០ដើម ត្រូវបានដុតបំផ្លាញចោលភ្លាមៗ ចំណែកកូនត្រីត្រូវបានដោះលែងឲ្យមានសេរីភាពវិញ មានចំនួនសរុប២០០គីឡូក្រាមផងដែរ៕
Source: Kampuchea Thmey Daily
0 Comments