ប្រទេសអូស្ត្រាលីនៅថ្ងៃសុក្របានព្រមានប្រជាពលរដ្ឋអោយយកចិត្តទុកដាក់នៅពេលធ្វើដំណើរទៅប្រទេសឥណ្ឌូនេស៊ីដែលជាប្រទេសជិតខាងមានជនមូស្លីមភាគច្រើនមុនពេលការទទួលស្គាល់ក្រុងយេរូសាឡឹមថាជារដ្ឋធានីរបស់ប្រទេសអ៊ីស្រាអែល។
លោកនាយករដ្ឋមន្ត្រី Scott Morrison ត្រូវបានគេរំពឹងថានឹងប្រកាសនៅថ្ងៃសៅរ៍នេះថា រដ្ឋាភិបាលរបស់គាត់នឹងធ្វើតាមការដឹកនាំរបស់ប្រធានាធិបតីអាមេរិក Donald Trump ហើយទទួលស្គាល់ទីក្រុងដែលមានជម្លោះមួយនេះថាជារដ្ឋធានីរបស់ប្រទេសអ៊ីស្រាអែល។
ក្រសួងការបរទេសបានព្រមានថា ប្រជាជនអូស្ត្រាលីដែលកំពុងត្រៀមលក្ខណៈដើម្បីជិះយន្តហោះទៅកោះបាលីនិងគោលដៅកោះត្រូពិកផ្សេងទៀតសម្រាប់ថ្ងៃឈប់សម្រាករដូវក្តៅនាពេលខាងមុខនេះគួរតែ “មានការប្រុងប្រយ័ត្នខ្ពស់”។
មន្ត្រីនៅទីក្រុងកង់បេរ៉ាបានប្រាប់ AFP ថា ពួកគេរំពឹងថាការប្រកាសនេះនឹងកើតឡើងនៅថ្ងៃសៅរ៍ដែលជាថ្ងៃឈប់សម្រាករបស់ជនជាតិជ្វីហ្វឬគេហៅថា Jewish Sabbath ប៉ុន្តែបានព្រមានថា ព្រឹត្តិការណ៍ណាមួយអាចនឹងផ្លាស់ប្តូរផែនការទាំងនោះ។
ទាំងអ៊ីស្រាអែលនិងប៉ាឡេស្ទីនបានអះអាងថា ក្រុងយេរូសាឡឹមគឺជារដ្ឋធានីរបស់ពួកគេ។ ក្រុមអ្នករិះគន់បាននិយាយថា ការប្រកាសថាក្រុងយេរូសាឡឹមគឺជារដ្ឋធានីរបស់ប្រទេសណាមួយនោះបានបង្កអោយមានភាពតានតឹងនិងប៉ះពាល់ដល់លទ្ធផលនៃការចរចាសន្តិភាពស្ថានភាពចុងក្រោយ។
ការសម្រេចចិត្តរបស់លោក Trump ក្នុងការផ្លាស់ទីស្ថានទូតអាមេរិកពីទីក្រុងតែលអាវីវកាលពីខែឧសភាបានជំរុញអោយប្រជាជនប៉ាឡេស្ទីនរាប់ម៉ឺននាក់ចូលទៅជិតរបងព្រំដែនអ៊ីស្រាអែលដែលមានការការពារយ៉ាងខ្លាំង។
ជនជាតិប៉ាឡេស្ទីនយ៉ាងតិច៦២នាក់ត្រូវបានសម្លាប់ដោយការបាញ់ប្រហាររបស់អ៊ីស្រាអែលនៅថ្ងៃនៃការរើស្ថានទូតរបស់អាមេរិក។
លោក Morrison ត្រូវបានគេរំពឹងថានឹងបញ្ឈប់ការផ្លាស់ទីក្រុមការទូតរបស់អូស្ត្រាលីទៅកាន់ទីក្រុងបរិសុទ្ធមួយនេះស្របពេលមានការភ័យខ្លាចអំពីការចំណាយនិងបញ្ហាសន្តិសុខ។
ប៉ុន្តែការទទួលស្គាល់ក្រុងយេរូសាឡឹមនឹងជួយលោកនាយករដ្ឋមន្ត្រីអូស្ត្រាលីអោយទទួលបានការគាំទ្រពីអ្នកបោះឆ្នោតជ្វីហ្វនិងគ្រិស្តសាសនិកអភិរក្សហើយទទួលបានប្រជាប្រិយភាពនៅសេតវិមាន៕ AFP
Source: Kampuchea Thmey Daily
0 Comments