ភ្នំពេញ ៖ ជនសង្ស័យ៤នាក់ ត្រូវបាននគរបាលប៉ុស្តិ៍ចោមចៅទី៣ឃាត់ខ្លួនបានភ្លាមៗ បន្ទាប់ពីធ្វើសកម្មភាពឆក់ទូរស័ព្ទពីស្ត្រីម្នាក់បានសម្រេច ពេលគាត់កំពុងអង្គុយមើលហ្វេសប៊ុក តែដោយសារទូរស័ព្ទជាប់លេខសម្ងាត់ និងភ្ជាប់ប្រព័ន្ធតាមដានសុវត្ថិភាព ទើបម្ចាស់ និងសមត្ថកិច្ចតាមរកឃើញវិញ និងចាប់ខ្លួនបាន៤នាក់នៅក្នុងផ្ទះសំណាក់មួយកន្លែងកាលពីវេលាម៉ោង២រំលងអធ្រាត្រឈានចូលថ្ងៃទី៣១ ខែធ្នូ ឆ្នាំ២០១៨ នៅផ្ទះសំណាក់ ឋានសួគ៌នៅភូមិជំពូវ័ន្ដ សង្កាត់ចោមចៅ៣ ខណ្ឌពោធិ៍សែនជ័យ។
ស្ត្រីជនរងគ្រោះឈ្មោះ ម៉េង សេរីរ័ត្ន ភេទស្រី អាយុ២៧ឆ្នាំ មុខរបរបើកផ្ទះសំណាក់ខាងលើ ដែលស្ថិតនៅភូមិ ក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។ ទូរស័ព្ទ ដែលជនសង្ស័យ ឆក់បាន ម៉ាកអាយហ្វូន អេចផ្លើស ពណ៌ស តម្លៃ៩០០ដុល្លារ។
ជនសង្ស័យធ្វើសកម្មភាពទី១.ឈ្មោះ បុល សុខ ជាតិ ភេទប្រុស អាយុ ១៧ឆ្នាំមុខរបរ ជាងម៉ាស៊ីនត្រជាក់ ស្នាក់នៅភូមិចាក់ជ្រូក សង្កាត់សំរោងក្រោមខណ្ឌពោធិ៍សែនជ័យរាជធានីភ្នំពេញមានស្រុកកំណើតនៅភូមិកៀនស្វាយ ឃុំ កៀនស្វាយ ស្រុកស្អាង ខេត្តកណ្ដាល ទី២. ឈ្មោះ ថន មករា ភេទប្រុសអាយុ ១៨ឆ្នាំមុខរបរ ជាងជាងម៉ាស៊ីនត្រជាក់ មានទីលំនៅស្រុកកោះធំខេត្តកណ្តាល ទី៣.ឈ្មោះ ស្រែន ស្រេង ភេទប្រុសអាយុ ១៨ឆ្នាំមុខរបរ អ៊ុតម៉ូតូ មានទីលំនៅស្រុកស្អាងខេត្តកណ្ដាលនិងទី ទី៤.ឈ្មោះសម្បត្តិ បូរិន ភេទប្រុស អាយុ១៨ឆ្នាំមុខរបរ កម្មកររោងចក្រ ស្នាក់នៅភូមិភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។ ម៉ូតូជនសង្ស័យ ២គ្រឿង ទី១ម៉ាក វ៉េវ ពណ៌ខ្មៅ ពាក់ស្លាកលេខភ្នំពេញ 1J-9553 និងម៉ូតូម៉ាកហុងដាឌ្រីមសេ១១០ពណ៌ខ្មៅពាក់ស្លាកលេខភ្នំពេញ 1BH-4101។
តាមប្រភពព័ត៌មានពី ស្ត្រីរងគ្រោះ បាននិយាយប្រាប់ថា នៅមុនពេលកើតហេតុរូបគាត់កំពុងអង្គុយមុខផ្ទះសំណាក់របស់ខ្លួនយីហោ ផៃសុខុម ដែលស្ថិតនៅភូមិក្បាលដំរី២សង្កាត់កាកាបទី២ខណ្ឌពោធិ៍សែនជ័យរាជធានីភ្នំពេញ ខណៈកំពុងតែមើលហ្វេសប៊ុកក្នុងទូរស័ព្ទ ស្រាប់តែ ឃើញជនសង្ស័យ២នាក់ជិះម៉ូតូម៉ាកវ៉េវ ពណ៌ខ្មៅមកធ្វើសកម្មភាពឆក់ទូរស័ព្ទដៃរបស់គាត់ ហើយជិះម៉ូតូគេចខ្លួនបាត់។
ប្រភពព័ត៌មានបានបន្តទៀតថា ពេលឆក់ទូរស័ព្ទស្ត្រីរងគ្រោះបានភ្លាមៗ ដោយទូរស័ព្ទនោះ ជាប់អាយខ្លោត បន្ទាប់មកជនរងគ្រោះ បានដឹងថាទូរស័ព្ទដៃរបស់ខ្លួនអោយសញ្ញា នៅផ្ទះសំណាក់ឋានសួគ៌នៅភូមិជម្ពូវ័នសង្កាត់ចោមចៅទី៣ខណ្ឌពោធិ៍សែនជ័យ។ បន្ទាប់មកជនរងគ្រោះ បានទាក់ទង សមត្ថកិច្ចនគរបាលប៉ុស្តិ៍ចោមចៅទី៣ ដោយនាំសមត្ថកិច្ចទៅដល់ផ្ទះសំណាក់នោះ បានឃើញម៉ូតូជនសង្ស័យខាងលើ នៅក្នុងផ្ទះសំណាក់នោះហើយបានឃាត់ជនសង្ស័យ នៅក្នុងផ្ទះ សំណាក់យីហោឋានសួគ៌ បាន៤នាក់ និងម៉ូតូចំនួន២គ្រឿង យកមក ប៉ុស្តិ៍ដើម្បី ប្រគល់អោយសមត្ថកិច្ចនគរបាលប៉ុស្តិ៍កាកាបទី២វិញដែលជាម្ចាស់ករណី។ បន្ទាប់ពីសមត្ថកិច្ចនគរបាលប៉ុស្តិ៍ចោមចៅ៣ឃាត់ខ្លួនជនសង្ស័យបានហើយ ទើបបញ្ជូនទៅឲ្យខាងនគរបាលប៉ុស្ដិ៍ កាកាបទី២វិញដើម្បីកសាងសំណុំរឿងបញ្ជូនទៅជំនាញព្រហ្មទណ្ឌខណ្ឌពោធិ៍សែនជ័យដើម្បីចាត់ការតាមនីតិវិធីច្បាប់៕
Source: Kampuchea Thmey Daily
0 Comments