កណ្តាល ៖ សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជាបានផ្ញើសារនយោបាយទៅកាន់អតីតមេគណបក្សសង្គ្រោះជាតិដែលកំពុងនិរទេសខ្លួននៅក្រៅប្រទេសថា សម្តេចបានត្រៀមខ្លួនរួចស្រេចហើយដែរសម្រាប់ទទួលអ្នកដែលបានត្រៀមខ្លួនចូលស្រុក ជាមួយខ្នោះនិងគុក។ សម្តេចតេជោ ហ៊ុន សែន បានចាត់ទុកមនុស្សសម រង្ស៊ី ថា ជាមនុស្សកំសាក និង អគុណធម៌។
សម្តេចតេជោនាយករដ្ឋមន្ត្រី ហ៊ុន សែន បានផ្ញើសារនយោបាយនេះនៅក្នុងពិធីសំណេះសំណាលជាមួយកម្មកររោងចក្រជាង ១,៥ ម៉ឺននាក់ នៅខេត្តកណ្ដាលកាលពីព្រឹកថ្ងៃទី២៦ ខែធ្នូនេះ។ សម្ដេចនាយករដ្ឋមន្ត្រីផ្ដាំឲ្យ លោកសម រង្ស៊ី ចូលស្រុកតាមការសន្យាហើយសម្ដេចក៏បានត្រៀមខ្នោះនិងគុកសម្រាប់ លោក សម រង្ស៊ី ផងដែរ។
សម្តេចបន្តថា បើសិនជាហ៊ានចូលស្រុកអ្នកឯងនឹងបានចូលគុកក្នុងថ្ងៃចូលឆ្នាំហើយអ្នកឯងប្រហែលក្លាយជាវីរបុរសនៃការជាប់គុក ប៉ុន្តែសម្តេចជឿថា មនុស្សនេះកំសាកបំផុតមិនហ៊ានចូលមកស្រុកទេ។ សម្តេចតេជោនាយករដ្ឋមន្ត្រី ហ៊ុន សែន ក៏បានប្រកាសប្រាប់ទៅអាកាសចរណ៍ទាំងអស់ទទួលលោកសម រង្ស៊ី ចូលមកស្រុកផងដែរ បើសិនអតីតមេដឹកនាំបក្សប្រឆាំងរូបនេះចង់ចូលមកហើយមានព្រលានយន្តហោះដល់ទៅ៣ដែលសម រង្ស៊ី អាចជ្រើសមួយណាក៏បាន ចុះនៅភ្នំពេញ ចុះនៅសៀមរាប និង ចុះនៅកំពង់សោម កន្លែងណាក៏បាន។
សម្តេចតេជោ ហ៊ុន សែន បានមានប្រសាសន៍ថា «ខ្ញុំក៏បានត្រៀមខ្លួនរួចស្រេចហើយដែរសម្រាប់អ្នកដែលបានត្រៀមខ្លួនចូលស្រុកខ្ញុំក៏បានត្រៀមខ្នោះ និងគុករួចហើយដែរ។ សូមអញ្ជើញអ្នកក្លាហានមកកាន់ទឹកដីកម្ពុជាមុនក៏បានក្រោយក៏បានបន្ទាប់ពីឱសានវាទនៃការភ្នាល់គ្នាគឺក្រោយថ្ងៃ១ ខែមីនា។ សូមអញ្ជើញបើមិនមកអ្នកឯងមិនមែនជាមនុស្សទេគឺជាសត្វតិរច្ឆាន។ អញ្ជើញមកព្រៃស ឬ ត្រពាំងថ្លុង ឬព្រះវិហារ ឬឧត្តរមានជ័យ ឬកន្លែងណា Everywhere សូមអញ្ជើញអ្នកក្លាហានចូលស្រុក ដើម្បីទទួលទោសដែលអ្នកមានរួចទៅហើយមិនចាំបាច់រត់ចោលស្រុកហើយប្រកាសផ្តល់ក្តីសង្ឃឹមថានឹងចូលស្រុក»។
សម្តេចបានបញ្ជាក់ថា «ខ្ញុំបានប្រាប់អាកាសចរណ៍ កុំឲ្យហាមឃាត់អាកាសចរណ៍ទាំងអស់ដឹកអាជនហ្នឹង គឺឲ្យគេដឹកមក ខ្ញុំក៏ចង់ជម្រះបញ្ជីជាមួយអាជននេះឲ្យបានច្បាស់។ ខ្ញុំបានប្រាប់អាកាសចរណ៍ស៊ីវិលកុំហាមឃាត់ក្នុងការដឹកអាចង្រៃនេះចូលស្រុក ព្រោះយើងត្រូវដាក់ខ្នោះវា ព្រោះយើងតាមចាប់វាយូរហើយចាប់មិនបាន ឥឡូវវាចូលឲ្យចាប់ហើយវាមិនស្រួល។ សូមអញ្ជើញមកខ្ញុំក៏បានត្រៀមខ្លួនហើយដែរ ប៉ុន្តែបើសិនអ្នកឯងមិនមក ថ្ងៃទី០១ ខែមីនា ដែលជាឱសានវាទនៃការភ្នាល់គឺអ្នកឯងជាសត្វឆ្កែសុទ្ធ ខ្ញុំហៅអ្នកឯងជាឆ្កែគ្រាន់តែព្រុះបើពូកែណាស់ ! ពេលណាក៏រត់ដែរឲ្យតែមានរឿងគឺរត់មិនថារឿងតូច ឬរឿងធំ គឺដឹងតែរត់ រួចហើយតាំងប្រកាសមកហើយ»។
សម្តេចតេជោនាយករដ្ឋមន្ត្រីបានបន្តទៀតថា «លើកមុន ខ្ញុំលើកលែងទោសឲ្យអ្នកឯងចំថ្ងៃឪពុកខ្ញុំទទួលមរណភាព តែលើកនេះខ្ញុំមិនបានលើកលែងទោសអ្នកឯងទេខ្ញុំបញ្ជាឲ្យដាក់ខ្នោះអ្នកឯង ព្រោះរដ្ឋបាលត្រូវអនុវត្តសាលដីកាតុលាការ នរណាចង់ថាអីថាចុះល្អដែរ សូមអញ្ជើញមកជាប់គុក ហើយចូលឆ្នាំខ្មែរសូមមកចូលឆ្នាំនៅក្នុងគុកប្រហែលជាក្លាយជាវីរបុរស ប៉ុន្តែតាមការយល់ដឹងនៃមនុស្សជាច្រើនគឺថាមនុស្សនេះជាមនុស្សកំសាក។ ខ្ញុំនិយាយបែបនេះគឺខ្ញុំចង់រុញដើម្បីឲ្យអ្នកឯងចូលមក»។
សម្តេចតេជោនាយករដ្ឋមន្ត្រីបានថ្លែងបែបចំអកទៅឲ្យលោកសម រង្ស៊ី ថា ជាមនុស្សអគុណធ៌មបំផុតដែលហ៊ានយកសេរីភាពរបស់បុគ្គលដែលជាដៃគូនយោបាយមកភ្នាល់ជាល្បែង។ ជាមួយនេះសម្តេចតេ ជោ ហ៊ុន សែន ក៏បានចាត់ទុកសម រង្ស៊ីថា ជាមនុស្សកំសាកបំផុត ព្រោះជននេះបានតែអួតតែមិនដែលហ៊ានធ្វើតាមការសន្យានោះទេ។
សម្ដេចតេជោ ហ៊ុន សែន បានមានប្រសាសន៍ថា «នៅសុខមិនសុខទៅយកសិទ្ធិសេរីភាពរបស់អ្នកដទៃយកមកភ្នាល់ បើខ្ញុំមិនភ្នាល់ទេគឺគេថាខ្ញុំនឹងកំសាកអន់។ ប៉ុន្តែគេចាប់ចំណុចខុសបំផុតពេលដែលខ្ញុំប្រកាសភ្នាល់គេថាយើងសម្រេចជំនួសតុលាការ ក៏ប៉ុន្ដែសុំស្ដាប់សម្ដីខ្ញុំឡើងវិញៗដែលពាក្យថាបើមិនទាន់កាត់ទោសផង តើមានទោសឯណាសម្រាប់ការលើកលែងទោះបីដល់សេះដុះស្នែងក៏រឿងនេះមិនអាចកើតបានដែរ។
សម្ដេចតេជោបន្ដថា «អ្វីដែលហួសចិត្តគឺនៅត្រង់ថា យកសេរីភាពបុគ្គលដែលជាដៃគូនយោបាយរបស់គេយកមកធ្វើជាល្បែងភ្នាល់ ឯខ្ញុំបានបញ្ជាក់ហើយខ្ញុំមិនភ្នាល់មិនបានប៉ុន្ដែវាអគុណធម៌ តែត្រូវតែភ្នាល់។ ចឹងទេសង្ឃឹមថា បើមានសេចក្ដីក្លាហានគេប្រកាសហើយគេថាគេនឹងមកឆាប់ៗសូមអញ្ជើញខ្ញុំក៏ត្រៀមអាឆាប់នឹងហើយដែរ Everytime»។
យ៉ាងណាក៏ដោយសម្រាប់ការចាប់វ៉ៃខ្នោះលោក សម រង្ស៉ីនេះ ត្រូវបានសម្តេចបញ្ជាក់ថា ការវ៉ៃខ្នោះ សម រង្ស៊ី នឹងធ្វើឡើងតាមរបៀបរបស់អាមេរិកដែលចងស្លាបសេកមិនដាក់ពីមុខនោះទេ៕
Source: Kampuchea Thmey Daily
0 Comments