ក្រុមអ្នកការទូតបាននិយាយកាលពីថ្ងៃសុក្រថា សហរដ្ឋអាមេរិក បានបោះបង់ចោលការជំរុញអោយក្រុមប្រឹក្សាសន្តិសុខអង្គការសហប្រជាជាតិរៀបចំកិច្ចប្រជុំប្រចាំឆ្នាំលើកទី៥របស់ខ្លួនស្តីពីការរំលោភសិទ្ធិមនុស្សនៅប្រទេសកូរ៉េខាងជើងក្នុងខែនេះ ដោយសារតែខ្លួនមិនមានការគាំទ្រគ្រប់គ្រាន់។
យ៉ាងហោចណាស់ក៏ត្រូវការសំឡេងគាំទ្រពីប្រទេសចំនួន៩ដែរនៅក្នុងស្ថាប័នដែលមានសមាជិក១៥ប្រទេសមួយនេះដើម្បីគាំទ្រសំណើមួយសម្រាប់កិច្ចប្រជុំនេះដែលសម្ព័ន្ធមិត្តក្រុងព្យុងយ៉ាងគឺប្រទេសចិនបានព្យាយាមទប់ស្កាត់មិនបានសម្រេចអស់រយៈពេល៤ឆ្នាំមកហើយ។ ប៉ុន្តែក្រុមអ្នកការទូតបាននិយាយថា មានសមាជិកត្រឹមតែ៨ប្រទេសប៉ុណ្ណោះដែលគាំទ្រការអំពាវនាវអោយកោះប្រជុំនៅពេលនេះ។
មន្ត្រីអាមេរិកម្នាក់បាននិយាយថា “ប្រសិនបើយើងមិនអាចរៀបចំកិច្ចចរចាដ៏សំខាន់នេះនៅខែនេះទេនោះ យើងសង្ឃឹមថានឹងបើកកិច្ចប្រជុំឡើងវិញនៅឆ្នាំថ្មី។ សហរដ្ឋអាមេរិកនៅតែមានក្តីព្រួយបារម្ភយ៉ាងខ្លាំងចំពោះស្ថានភាពសិទ្ធិមនុស្សនៅក្នុងប្រទេសកូរ៉េខាងជើង”។
នៅក្នុងលិខិតមួយផ្ញើទៅកាន់ក្រុមប្រឹក្សាសន្តិសុខកាលពីសប្តាហ៍មុន ប្រទេសកូរ៉េខាងជើងបានចោទប្រកាន់សហរដ្ឋអាមេរិកថា បានប៉ុនប៉ងធ្វើបាបនិងជំរុញការប្រឈមមុខគ្នាដោយការស្នើសុំអោយមានកិច្ចប្រជុំក្រុមប្រឹក្សាថ្វីបើមានកិច្ចប្រឹងប្រែងរបស់មេដឹកនាំគីមជុងអ៊ុននិងប្រធានាធិបតីអាមេរិកលោកដូណាល់ត្រាំដើម្បីធ្វើការឆ្ពោះទៅរកការរំសាយនុយក្លេអ៊ែររបស់ក្រុងព្យុងយ៉ាងក៏ដោយ។
ប្រទេសកូរ៉េខាងជើងបានច្រានចោលការចោទប្រកាន់ពីបទរំលោភសិទិ្ធមនុស្សម្តងហើយម្តងទៀតនិងបានស្តីបន្ទោសការដាក់ទណ្ឌកម្មចំពោះស្ថានភាពមនុស្សធម៌ដ៏យ៉ាប់យ៉ឺន។
ក្រុងព្យុងយ៉ាងស្ថិតក្រោមការដាក់ទណ្ឌកម្មរបស់អង្គការសហប្រជាជាតិចាប់តាំងពីឆ្នាំ២០០៦ មកដោយសារកម្មវិធីមីស៊ីលផ្លោងនិងនុយក្លេអ៊ែររបស់ខ្លួន។
សហរដ្ឋអាមេរិកអាចព្យាយាមម្តងទៀតក្នុងខែមករានៅពេលដែលសមាជិកថ្មីចំនួន៥ប្រទេស ប្តូរវេនទៅក្រុមប្រឹក្សាសន្តិសុខ៕ REUTERS
Source: Kampuchea Thmey Daily
0 Comments