ក្លិបបាល់ទាត់ណាហ្គាវើល ម្ចាស់ជើងឯកពានរង្វាន់លីគកំពូលកម្ពុជា (Metfone Cambodian League) បានបានបង្ហាញកីឡាករបរទេសទី៤ដែលជាជនជាតិទួរមីនីស្ថាន ដើម្បីត្រៀមរដូវកាលថ្មីឆ្នាំ២០១៩ ក៏ដូចជាត្រៀមប្រកួតក្នុងវគ្គចែកពូលនៃពានរង្វាន់លំដាប់ទី២ប្រចាំទ្វីបអាស៊ី AFC Cup 2019 ខាងមុខដែលនឹងចាប់ផ្តើមពីខែកុម្ភៈ តទៅ។
កីឡាករសមាជិកថ្មីរូបនេះ មានតួនាទីជាខ្សែបម្រើជនជាតិទួរមីនីស្ថាន Amir Gurbani។ រូបគេធ្លាប់រួមចំណែកជួយក្លិបស្រុកកំណើត Balkan លើកពានកម្រិតទី៣អាស៊ី AFC President's Cup 2013 និងលេងនៅក្លិបមួយចំនួនទៀតនៅអាស៊ីផងដែរ។ យោងតាមការកំណត់របស់សហព័ន្ធកីឡាបាល់ទាត់កម្ពុជា (ស.ប.ក) បានបញ្ជាក់ថា ក្លិបជាសមាជិករបស់លីគខ្លួនមានសិទ្ធិចុះបញ្ជីកីឡាករបរទេសចំនួន៥នាក់ ប៉ុន្តែដាច់ខាតក្នុងនោះ ត្រូវតែមានកីឡាករជាជនជាតិសមាជិកទ្វីបអាស៊ី ១រូប។ ចំពោះក្រុមណាហ្គាវើល វិញនៅពេលនេះមានកីឡាករបរទេស៤នាក់ហើយបូកទាំងកីឡាករ Gurbani បន្ទាប់ពីមានកីឡាករចាស់ៗដូចជា Anderson Zogbe ជនជាតិកូឌីវ័រ, Paul Esoh Omogba និង Kipson ជនជាតិនីហ្សេរីយ៉ា។
លោក មាស ចាន់ណា ដែលជាគ្រូបង្វឹកប្រចាំក្រុមណាហ្គាវើល ទើបតែដឹកនាំកីឡាករទាំងខ្មែរនិងបរទេសទៅប្រកួតមិត្តភាពនិងហ្វឹកហាត់នៅប្រទេសថៃ កាលពីពេលថ្មីៗចាប់ពីថ្ងៃទី៨ដល់១៥ ខែមករា ឆ្នាំ២០១៨ពោលគឺឆ្លងការប្រកួតមិត្តភាព៤ប្រកួតនៅទីនោះ។ សូមបញ្ជាក់ថា ក្រុមណាហ្គាវើល ស្ថិតនៅពូល F ក្នុងពានរង្វាន់ AFC Cup 2019 ជាមួយក្រុម Hanoi FC (ម្ចាស់ជើងឯកលីគកំពូលវៀតណាម) ក្រុមTampines Rovers ( ជើងឯករងលីគកំពូលសិង្ហបុរី ) និង Yangon United ( ជើងឯកលីគកំពូលមីយ៉ាន់ម៉ា) ឬ Zwekapin Unitedក្រុមលេខ៣នៅលីគមីយ៉ាន់ម៉ា ដូចគ្នា។
តាមគម្រោងការប្រកួតនឹងចាប់ផ្ដើមនាខែ កុម្ភៈ ដើមឆ្នាំក្រោយតាមរូបមន្តវិលជុំសន្សំពិន្ទុ សរុបស្មើ៦ប្រកួត (ក្នុងដីនិងក្រៅដី) ដើម្បីយកតែមួយក្រុមឡើងទៅវគ្គបន្ត ដោយគ្រោងនឹងបញ្ចប់ការប្រកួតទាំងមូលនៅដើមខែតុលា ឆ្នាំ២០១៩។ នេះជាឆ្នាំទី១ សម្រាប់ណាហ្គាវើល ក្នុងការប្រកួតនៅវគ្គបែងចែកពូលបន្ទាប់ពីបានក្លាយជាម្ចាស់ជើងឯកលីគកំពូលកម្ពុជា ឆ្នាំ២០១៨ ខណៈកាលពីឆ្នាំ២០១៧ ធ្លាប់បានចូលរួមប្រកួតម្តងតែត្រូវប្រកួតជម្រុះនៅវគ្គជម្រុះបឋម៕
Source: Kampuchea Thmey Daily
0 Comments