ភ្នំពេញ ៖ លោក គង់ គាំ អតីតឧត្តមទីប្រឹក្សាជាន់ខ្ពស់នៃអតីតគណបក្សសង្គ្រោះជាតិ និងលោក គង់ បូរ៉ា អតីតតំណាងរាស្ត្ររបស់អតីតគណបក្សសង្គ្រោះជាតិ ដែលត្រូវតុលាការកំពូលប្រកាសហាមឃាត់សិទ្ធិធ្វើនយោបាយរយៈពេល៥ឆ្នាំ កាលពីថ្ងៃទី១៦ ខែវិច្ឆិកា ឆ្នាំ២០១៧ ជាមួយអតីតថ្នាក់ដឹកនាំ CNRP ចំនួន១១៦នាក់ផ្សេងទៀតនោះ ត្រូវបានព្រះមហាក្សត្រ ចេញព្រះរាជក្រឹត្យត្រាស់បង្គាប់ផ្តល់នីតិសម្បទា ដើម្បីបន្តសកម្មភាពនយោបាយឡើងវិញហើយកាលពីថ្ងៃទី១៥ ខែមករា ឆ្នាំ២០១៩ នេះបើតាមព្រះរាជក្រឹត្យ ដែលការិយាល័យយើងទទួលបាននៅព្រឹកថ្ងៃទី១៦ ខែមករា ឆ្នាំ២០១៩។
យោងតាមព្រះរាជក្រឹត្យរបស់ព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា ចុះថ្ងៃទី១៥ ខែមករា ឆ្នាំ២០១៩ បានបញ្ជាក់ថា ទី១, “ត្រូវបានផ្តល់នីតិសម្បទាឡើងវិញឲ្យឈ្មោះ គង់ បូរ៉ា ភេទប្រុស កើតថ្ងៃទី២០ ខែកញ្ញា ឆ្នាំ១៩៧៤ដែលត្រូវបានហាមឃាត់មិនឲ្យធ្វើសកម្មភានយោបាយរយៈពេល៥ឆ្នាំ តាមអំណាចសាលដីកាលេខ៣៤០ (ឆ) ចុះថ្ងៃទី១៦ ខែវិច្ឆិកា ឆ្នាំ២០១៧ របស់តុលាការកំពូល”។ ទី២, “ត្រូវបានផ្តល់នីតិសម្បទាឡើងវិញឲ្យឈ្មោះ គង់ គាំ ភេទប្រុស កើតថ្ងៃទី០៦ ខែមេសា ឆ្នាំ១៩៤១ ដែលត្រូវបានហាមឃាត់មិនឲ្យធ្វើសកម្មភានយោបាយរយៈពេល៥ឆ្នាំ តាមអំណាចសាលដីកាលេខ៣៤០ (ឆ) ចុះថ្ងៃទី១៦ ខែវិច្ឆិកា ឆ្នាំ២០១៧ របស់តុលាការកំពូល”។
សូមបញ្ជាក់ថា ការផ្តល់សិទ្ធិធ្វើយោបាយឡើងវិញរបស់អ្នកនយោបាយទាំង២រូបនេះ ធ្វើឡើងបន្ទាប់ពីអតីតថ្នាក់ដឹកនាំគណបក្សសង្គ្រោះជាតិទាំងពីរនាក់នោះ បានដាក់ពាក្យស្នើទៅកាន់ក្រសួងមហាផ្ទៃ ដើម្បីស្នើសុំសិទ្ធិធ្វើនយោបាយកាលពីថ្មីៗនេះ និងបន្ទាប់ពីវិសោធនកម្មច្បាប់ស្តីពីគណបក្សនយោបាយ មាត្រា៤៥ថ្មី (ស្ទួន) ចូលជាធរមាន។
រហូតមកដល់ថ្ងៃទី១០ ខែមករា ឆ្នាំ២០១៩ មានអតីតមន្ត្រីជាន់ខ្ពស់ CNRP ដែលត្រូវបានហាមឃាត់សកម្មភាណនយោបាយចំនួន២នាក់ហើយ បានដាក់លិខិតទៅក្រសួងមហាផ្ទៃ ដើម្បីសុំសិទ្ធិធ្វើនយោបាយឡើងវិញ នេះបើតាមការបញ្ជាក់ពីអ្នកនាំពាក្យក្រសួងមហាផ្ទៃ ហើយអ្នកទាំងពីរនោះ គឺទី១.លោក គង់ គាំ អតីតឧត្តមទីប្រឹក្សាជាន់ខ្ពស់អតីតគណបក្សសង្គ្រោះជាតិ និងជាអតីតមនុស្សជំនិតរបស់លោក សម រង្ស៉ី និងលោក គង់ បូរ៉ា អតីតសមាជិកគណៈកម្មាធិការនាយក និងជាតំណាងរាស្ត្រមណ្ឌលព្រៃវែង នៃអតីតគណបក្សសង្គ្រោះជាតិ បានដាក់លិខិតទៅក្រសួងមហាផ្ទៃ ដើម្បីសុំសិទ្ធិធ្វើនយោបាយឡើងវិញ កាលពីថ្ងៃទី០៩ ខែមករា ឆ្នាំ២០១៩។
នៅក្នុងលិខិតរបស់លោក គង់ គាំ និងលោក គង់ បូរ៉ា ដែលបានដាក់ជូនក្រសួងមហាផ្ទៃ កាលពីថ្ងៃទី០៩ ខែមករា បានបញ្ជាក់ប្រហាក់ប្រហែលគ្នាថា លោកមានសេចក្តីរីករាយ ចំពោះវិសោធនកម្មច្បាប់គណបក្សនយោបាយមាត្រា៤៥ ថ្មី(ស្ទួនមួយ) បើកឲ្យអ្នកនយោបាយជាប់គំរាម អាចទទួលនីតិសម្បទាធ្វើនយោបាយឡើងវិញ ដោយព្រះមហាក្សត្រ តាមសំណើរបស់នាយករដ្ឋមន្ត្រី និងតាមសេចក្តីស្នើសុំរបស់នាយករដ្ឋមន្ត្រីក្រសួងមហាផ្ទៃ។ លិខិតបញ្ជាក់ថា “តាមសំណើដូចបានជម្រាបជូនខាងលើសូមសម្ដេចក្រឡាហោម ឧបនាយករដ្ឋមន្ត្រី មេត្តាពិនិត្យ និងស្នើសុំដើម្បីសម្ដេចនាយករដ្ឋមន្ត្រី បន្តទូលថ្វាយព្រះមហាក្សត្រសូមព្រះអង្គព្រះមេត្តាជួយឲ្យខ្ញុំរួចផុតពីបម្រាមនយោបាយមុនកាលកំណត់របស់សាលដីកាតុលាការកំពូល ដោយអនុគ្រោះ”។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ធ្លាប់បានលើកឡើងថា “ទ្វារបើកហើយ ចង់ចូលចូល មិនបាច់អូសទាញទេ”។ លោកបញ្ជាក់ថា ច្បាប់វិសោធនកម្មច្បាប់ស្តីពីគណបក្សនយោបាយ ត្រូវបានស្ថាប័ននីតិប្បញ្ញត្តិអនុម័តរួចហើយ។ ចំណែកព្រះមហាក្សត្រក៏បានទ្រង់ឡាយព្រះហស្ថលេខាលើព្រះរាជក្រមប្រកាសដាក់ឲ្យប្រើប្រាស់រួចហើយដែរ ដូច្នេះទ្វារបានបើកចំហរហើយ អ្នកនយោបាយណាចង់បានសិទ្ធិធ្វើនយោបាយឡើងវិញ អាចមានសិទ្ធិសុំបានដោយសេរី តែបើមិនចង់បានទេ ក៏ជាសិទ្ធិរបស់សាមីជនម្នាក់ៗដែរ គ្មានពាក់ព័ន្ធនឹងគណបក្សប្រជាជនកម្ពុជាទេ ហើយគណបក្សប្រជាជនកម្ពុជា ក៏គ្មានប្រយោជន៍អីទៅធ្វើការអូសទាញដោយប្រការណាមួយដែរ។ ដូច្នេះរឿងនេះ គឺជារឿង និងជាសិទ្ធិរបស់សាមីជនម្នាក់ៗតែប៉ុណ្ណោះ៕
Source: Kampuchea Thmey Daily
0 Comments