ឃាត់​ជនសង្ស័យ​២​នាក់​ ករណី​អំពើ​លួច​មាន​ស្ថាន​ទម្ងន់ទោស ឆក់​កាបូបស្ពាយ

ភ្នំពេញ ៖ ជនសង្ស័យ​២​នាក់ ត្រូវ​នគរបាល​ការិយាល័យ​ព្រហ្មទណ្ឌ​កម្រិត​ស្រាល រាជធានី​ភ្នំពេញ ឃាត់ខ្លួន កសាង​សំណុំ​បញ្ជូន​ទៅ​តុលាការ ករណី​អំពើ​លួច​មាន​ស្ថាន​ទម្ងន់ទោស ឆក់​កាបូបស្ពាយ។

សមត្ថកិច្ច​ប្រាប់​ឲ្យ​ដឹង​ថា ជនសង្ស័យ​ទាំង ២​នាក់ ១-​ឈ្មោះ សេង សុខ​លាង ភេទ ប្រុស អាយុ ១៩ ឆ្នាំ មុខរបរ​នៅផ្ទះ និង​ស្នាក់នៅ​ផ្ទះជួល​បន្ទប់​លេខ៨ ផ្លូវបេតុង សង្កាត់​ទួល​សង្កែ​២ ខណ្ឌ​ឫស្សី​កែវ។ ២-​ឈ្មោះ ផាន់ សារុន ភេទ ប្រុស អាយុ ២២ ឆ្នាំ មុខរបរ មិន​ពិតប្រាកដ ស្នាក់​នៅផ្ទះ​លេខ​២៩ ផ្លូវលំ ភូមិ​បឹង​សាឡាង សង្កាត់​បឹង​សាឡាង ខណ្ឌទួលគោក រាជធានី​ភ្នំពេញ ។ ភស្តុតាង​ចាប់យក ម៉ូតូ ម៉ាក ហុងដា ឃ្លី​ក ពណ៌ ខ្មៅ លេខ​តួ​-​លេខ​ម៉ាស៊ីន ៥០២៩៩០៨ ពាក់​ស្លាក​លេខ ភ្នំពេញ ១HJ-៨២៧៨ (​មធ្យោបាយ​ជិះ​ធ្វើ​សកម្មភាព​ឆក់ ចាប់យក​ពី​ឈ្មោះ ផាន់ សារុន​) ទូរ​សព្ទ័​ដៃ ម៉ាក​សាំ​សុង ពណ៌ ផ្កាឈូក ចំនួន ០១ គ្រឿង (​របស់​ជនរងគ្រោះ​ចាប់យក​ពី​ឈ្មោះ ផាន់ សារុន ) ម៉ូតូ មួយគ្រឿង ម៉ាក ស៊ុយ​ហ្សុ​យ​គី ឡេ​ត ពណ៌​ស​លាយ​ក្រហម លេខ​តួ ៤២៤៧៤១ -​លេខ​ម៉ាស៊ីន ៤២៤៨២៥ ពាក់​ស្លាក​លេខ ភ្នំពេញ ១HI-១៣៩៨ ចាប់​យក​ពី​ឈ្មោះ សេង សុខ​លាង។

ប្រភព​ព័ត៌មាន​ប្រាប់​បន្ត​ថា កាលពី​ថ្ងៃទី​២៣ ខែមករា ឆ្នាំ ២០១៩ វេលា​ម៉ោង ១៧ និង២៥នាទី កម្លាំង​ការិយាល័យ​បាន​ស្រាវជ្រាវ ឃាត់ខ្លួន​ជនសង្ស័យ​បាន ០២ នាក់ នៅ​ចំណុច​ផ្ទះ​លេខ ៤៣៧ ផ្លូវលំ ភូមិ​មានជ័យ​១ ខណ្ឌមានជ័យ រាជធានី​ភ្នំពេញ ដែល​បាន​ប្រព្រឹត្ត​បទល្មើស អំពើ​លួច​មាន​ស្ថាន​ទម្ងន់ទោស (​ឆក់​កាបូបស្ពាយ​) ចំនួន ០២ ករណី រួមមាន ករណី​ទី​១ អំពើ​លួច​មាន​ស្ថាន​ទម្ងន់ទោស (​ឆក់​កាបូបស្ពាយ ពណ៌ ទឹកប៊ិច​) ប្រព្រឹត្ត​នៅ​ចំណុច​មុខ​ផ្ទះ​លេខ​៩០CE០ ផ្លូវ​លេខ ២១៤ ភូមិ​២ ក្រុមទី៩ សង្កាត់បឹង​ព្រលិត ខណ្ឌ៧​មករា រាជធានី​ភ្នំពេញ​កាលពី​ថ្ងៃទី ២៨ ខែ កញ្ញា ឆ្នាំ ២០១៨ វេលា​ម៉ោង ២០ និង ០០ នាទី។

ជនរងគ្រោះ​ឈ្មោះ សុខ ឡេង ភេទ​ស្រី អាយុ ៣៩ ឆ្នាំ ជនជាតិ​ខ្មែរ មុខរបរ លក់ដូរ​​ស្នាក់​នៅផ្ទះ​លេខ​៩០CE០ ផ្លូវ​លេខ ២១៤ ភូមិ​២ ក្រុមទី ៩ សង្កាត់ បឹង​ព្រលិត ខណ្ឌ ៧​មករា រាជធានី​ភ្នំពេញ សម្ភារៈ​បាត់បង់ មាន​កាបូបស្ពាយ ពណ៌ ទឹកប៊ិច ចំនួន ០១ ប្រាក់​ដុល្លារ និង​ប្រាក់រៀល​ប្រហែល​៥,០០០​ដុល្លារ​អាមេរិក ខ្សែក​ផ្លាក​ទិន​ទម្ងន់ មួយ​ជី មាន​បន្តោង​គុជ​ចំនួន ០១ ទូរ​ស័ព្ទ​ដៃ​ម៉ាក OPPO F៥ ចំនួន ០១ គ្រឿង អត្តសញ្ញាណប័ណ្ណ​សញ្ជាតិ​ខ្មែរ​ចំនួន ០១ សន្លឹក​ លិខិតឆ្លងដែន​មួយ​ក្បាល ​សៀវភៅ​ធនាគារ ចំនួន ០៣ ក្បាល។

ករណី​ទី​២ អំពើ​លួច​មាន​ស្ថាន​ទម្ងន់ទោស (​ឆក់​កាបូបស្ពាយ​) នៅ​ចំណុច​មុខ​ផ្សារ​ស៊ុប​ភើ​ស្ទ័​រ ផ្លូវ​ទ្រុងមាន់ ភូមិ​ទ្រុងមាន់ សង្កាត់​អូរ​បែកក្អម ខណ្ឌ​សែន​សុខ រាជធានី​ភ្នំពេញ កាលពី​ថ្ងៃទី ២៣ ខែមករា ឆ្នាំ២០១៩ វេលា​ម៉ោង ១៥និង២៣ នាទី។

ជនរងគ្រោះ​ឈ្មោះ ស្រ៊ា​ន ទី​ណែ​ត ភេទស្រី អាយុ៣២ឆ្នាំ ជនជាតិខ្មែរ មុខរបរ​មេផ្ទះ​ស្នាក់​នៅផ្ទះ​លេខ ១៦E០ ផ្លូវលំ ភូមិ​ត្រពាំង​ថ្លឹង សង្កាត់​ចោមចៅ ខណ្ឌ​ពោធិ៍​សែន​ជ័យ រាជធានី​ភ្នំពេញ
​សម្ភារៈ​បាត់បង់ ​កាបូបស្ពាយ ចំនួន ០១ អត្តសញ្ញាណ​ប័ណ្ណ​សញ្ជាតិ​ខ្មែរ​ឈ្មោះ ស្រ៊ា​ន ទី​ណែ​ត ចំនួន ០១ ​ប័ណ្ណបើកបរ​រថយន្ត​ឈ្មោះ ស្រ៊ា​ន ទី​ណែ​ត ចំនួន ០១ ទូរ​ស័ព្ទ​ដៃ​ម៉ាក​សាំ​សុង ស៊ីម​កាត​លេខ ០៨៩ ២៧១ ០៧៩ , ០៩៦ ៧ ៣២២ ៥៨៩ ប្រាក់​ដុល្លារ ចំនួន ៨០០​ដុល្លារ​អាមេរិក៕

Source: Kampuchea Thmey Daily