បាត់ដំបង ៖ លោកឧត្ដមសេនីយ៍ត្រី សៅ សាម៉ុន ស្នងការរង ទទួលផែនធនធានមនុស្ស បានមានប្រសាសន៍កាលពីព្រឹកថ្ងៃទី១៩ ខែមករា ឆ្នាំ២០១៩នេះថា មន្ត្រីនគរបាលមួយរូប ដែលមានផ្ទុកសារធាតុញៀនក្នុងខ្លួន ហើយត្រូវបានលោកស្នងការបញ្ជាឲ្យបញ្ជូនទៅកាន់មជ្ឈមណ្ឌលពិភព នៃក្តីសង្ឃឹម ដើម្បីបន្សាបថ្នាំញៀននោះ គឺមិនទាន់ដឹងថាតើត្រូវរក្សាឈ្មោះឲ្យនៅដដែល ឬក៏ត្រូវលុបឈ្មោះចេញពីក្របខណ្ឌនគរបាលជាតិនោះទេ ដោយរង់ចាំការសម្រេចពីលោកឧត្ដមសេនីយ៍ទោ ស្នងការ អ៊ុច សុខុន។
គួរបញ្ជាក់ដែរថា កាលពីថ្ងៃទី៣១ ខែធ្នូ ឆ្នាំ២០១៨ វេលាម៉ោង៤និង១០នាទីល្ងាច កម្លាំងជំនាញផ្នែកប្រឆាំងគ្រឿងញៀន នៃអធិការដ្ឋាន នគរបាលស្រុកសង្កែ បានចេញប្រតិបត្តិការបង្ក្រាបករណីប្រើប្រាស់ថ្នាំញៀនមួយកន្លែង ស្ថិតក្នុងភូមិច្រាបវាល ឃុំអន្លង់វិល ស្រុកសង្កែ ខេត្តបាត់ដំបង។
នៅក្នុងកិច្ចប្រតិបត្តិការនោះ សមត្ថកិច្ចបានឃាត់ខ្លួនជនសង្ស័យម្នាក់ ដែលមាន ឈ្មោះ អ៊ាន កិត្យា ភេទប្រុស អាយុ២៥ឆ្នាំ និងមានមុខងារជាមន្ត្រីនគរបាលជាតិ ឋានៈព្រឹន្ទបាលឯក នៅក្នុងផ្នែកសេនាធិការ នៃអធិការដ្ឋាននគរបាលស្រុកសង្កែ ត្រូវជាកូនរបស់អតីតអធិការដែលបានចូលនិវត្តន៍ គឺលោក ប៊ុត ប៊ុនធឿន និងអ្នកស្រី ឡាយ ច័ន្ទណាត រស់នៅភូមិច្រាបវាល ឃុំអន្លង់វិល ស្រុកសង្កែ ។
បន្ទាប់ពីបាននាំខ្លួនមន្ត្រីនគរបាលដែលជាប់ពាក់ព័ន្ធនឹងករណីប្រើប្រាស់ថ្នាំញៀន និងមិនដែលមានមុខ ចូលបម្រើការងារក្នុងអង្គភាព មកកាន់អធិការដ្ឋាន រួចមក គេក៏បានសារភាពថា រូបគេបានប្រើប្រាស់ថ្នាំញៀនតាំងពីអំឡុងឆ្នាំ២០១៥ មកម្ល៉េះ ដោយថ្នាំញៀនទាំងនេះគេបានទិញពីមុខសញ្ញាក្នុងក្រុងបាត់ដំបង។
ក្រោយពេលធ្វើការបង្ក្រាប សមត្ថកិច្ចបានរកឃើញថ្នាំញៀនប្រភេទម៉ាទឹកកក ៖
១.កញ្ចប់នៅក្នុងហោប៉ៅ រួមនឹងសម្ភារៈសម្រាប់ប្រើប្រាស់ថែមទៀត ដោយភ្លាមៗនោះដែរ កម្លាំងជំនាញស្រុកបានដកហូតនូវរបស់របរមួយចំនួន ដែលក្នុងនោះមាន ទូរស័ព្ទ ម៉ាកអាយហ្វូន X មួយគ្រឿង ខ្សែ ក១ខ្សែ និង ខ្សែដៃ១ខ្សែ ព្រមទាំងបានធ្វើកំណត់ហេតុប្រគល់ទ្រព្យសម្បត្តិទាំងអស់នេះ ទៅឲ្យ អ្នកស្រី ឡាយ ច័ន្ទណាត ដែលត្រូវជាម្តាយ នៅវេលាម៉ោង៥ល្ងាច ថ្ងៃដដែលនោះផងដែរ។
បន្ទាប់ពីបានធ្វើតេស្តទៅលើទឹកនោមរបស់ជនសង្ស័យរួចមក គឺទទួលបានជាវិជ្ជមាន ដោយមានផ្ទុកនូវសារធាតុញៀន ទើបសមត្ថកិច្ចបានសុំការអនុញ្ញាតពីលោកស្នងការដើម្បីបញ្ជូនមន្ត្រីនគរបាលរូបនេះ ទៅកាន់មជ្ឈមណ្ឌល ពិភព នៃក្តីសង្ឃឹម ទាំងយប់។ ប៉ុន្តែបើតាមប្រភពជាច្រើនបានអះអាងថា មន្ត្រីនគរបាលរូបនេះមិនមែនត្រឹមតែប្រើប្រាស់ប៉ុណ្ណោះទេ គេក៏ជាមុខសញ្ញាចែកចាយថ្នាំញៀន
យ៉ាងសកម្មផងដែរ នៅក្នុងមូលដ្ឋានតែម្តង ដោយមិនសូវមានវត្តមាននៅក្នុងអង្គភាពនោះទេ។
ផ្ទុយទៅវិញ រឿងដែលសមត្ថកិច្ចស្រុកស្មានមិនដល់ គឺស្អែកឡើង លោក ប៊ុត ប៊ុនធឿន អតីត អធិការនគរបាលស្រុកសង្កែ ដែលបានចូលនិវត្តន៍ បានទៅប្តឹងនៅការិយាល័យបុគ្គលិក ថា នគរបាលដែលចាប់ខ្លួនកូនប្រុសរបស់លោកបានដកហូតយកទ្រព្យសម្បត្តិកូនរបស់លោកអស់រលីងទៅហើយ។
ពាក្យមួយឃ្លារបស់អតីតលោកអធិការរូបនេះ បានធ្វើឲ្យមន្ត្រីនគរបាលជាច្រើន សំដែងនូវប្រតិកម្មយ៉ាងខ្លាំង ព្រោះការប្រគល់ទ្រព្យសម្បត្តិទាំងនេះសុទ្ធតែមានកំណត់ហេតុត្រឹមត្រូវ បែរជាមានពាក្យបែបនេះទៅវិញ។
បើទោះបីជាមានពាក្យចោទប្រកាន់បែបនេះក្តី ក៏ប្រភពមួយចំនួនបានលួចបង្ហើបថា នេះគឺជាចរិត លក្ខណៈរបស់មនុស្សទៅហើយ ព្រោះកាលដែលលោកត្រូវបានចូលនិវត្តន៍ ក៏បានប្រមូលបញ្ជីខ្មៅ ដែលសម្រាប់កត់ត្រាមុខសញ្ញានានា យកទៅដុតចោលគ្មានសល់ ដែលជាចេតនាបំផ្លាញភស្តុតាងកុំឲ្យអធិការឡើងថ្មី ស្គាល់ពីក្រុមមុខសញ្ញានៅក្នុងមូលដ្ឋាន នេះហើយដែលគេហៅថា ចរិត លក្ខណៈរបស់មនុស្ស។
ប៉ុន្តែបើតាមមតិរបស់អ្នកច្បាប់គេបានលើកឡើងថា មន្ត្រីនគរបាលដែលជាប់ពាក់ព័ន្ធទៅនឹងសារធាតុញៀន គឺបានកំណត់នៅក្នុងវិន័យរបស់កងកម្លាំងថា អាចមានទោសរួចបាត់ទៅហើយ ដោយមិនចាំបាច់បញ្ជូនទៅមណ្ឌលកែប្រែនោះឡើយ ដូច្នេះត្រង់ពាក្យថារង់ចាំការសម្រេចរបស់ លោកស្នងការ គឺវាហាក់ដូចជាប្រើមនោសញ្ចេតនាខ្លាំងពេក ហើយក៏អាចទុកឱកាសឲ្យគេស្រង់ដើមសាជាថ្មីផងដែរ ប្រសិនបើលោកស្នងការមិនព្រមបញ្ឈប់បុគ្គលរូបនេះចេញពីក្របខណ្ឌ របស់កងកម្លាំង ទេនោះ៕
Source: Kampuchea Thmey Daily
0 Comments