កណ្តាល ៖ ក្នុងរយៈពេលតែមួយនគរបាលស្រុកកោះធំដឹកនាំដោយលោកវរសេនីយ៍ ខាន់ ចាន់ថា អធិការរងទទួលផែនគ្រឿងញៀន សហការជាមួយកម្លាំងប៉ុស្តិ៍រដ្ឋបាលសំពៅពូន ធ្វើការបង្ក្រាបអ្នកប្រើប្រាស់គ្រឿង ឈានដល់បង្ក្រាបអ្នកជួញដូរបានជាបន្តបន្ទាប់ចំនួន៤នាក់ រួមនឹងថ្នាំញៀន០៧កញ្ចប់ធំ និងវត្ថុតាងមួយចំនួនទៀត។
ហេតុការណ៍ចុះបង្ក្រាបនេះ ធ្វើឡើងកាលពីព្រឹកថ្ងៃទី១៨ ខែមករា ឆ្នាំ២០១៩ វេលាម៉ោង០៨និង៥០នាទី នៅចំណុចផ្ទះជួល ភូមិព្រែកស្បូវ ឃុំសំពៅពូន ស្រុកកោះធំ ខេត្តកណ្តាល។
ជនសង្ស័យចំនួន០៤នាក់ ទី១ឈ្មោះ ហៃ ប៉ុក ភេទប្រុស អាយុ២៣ឆ្នាំ ជនជាតិខ្មែរ មានទីលំនៅ ភូមិកប៉ាល់គឿង ឃុំសំពៅពូន ស្រុកកោះធំ ខេត្តកណ្តាលមុខរបរ (មិនពិតប្រាកដ) ទី២ឈ្មោះ ឆាន សុផា ភេទប្រុស អាយុ ៣៤ឆ្នាំ ជនជាតិខ្មែរ មានទីលំនៅ ភូមិទ្រា សង្កាត់ស្ទឹងមានជ័យ ខណ្ឌមានជ័យ ក្រុងភ្នំពេញ មុខរបរបើករថយន្តដឹកទំនិញ ទី០៣ឈ្មោះ ខន សំអូន ភេទស្រី អាយុ២៩ឆ្នាំ ជនជាតិខ្មែរ មានទីលំនៅ ភូមិត្អួរលំ ឃុំកំពង់ហៅ ស្រុកកំពង់លែង ខេត្តកំពង់ឆ្នាំង មុខរបរ Karaoke និងទី០៤ឈ្មោះសាម សីហា ភេទប្រុស អាយុ២៨ឆ្នាំ ជនជាតិខ្មែរមានទីលំនៅ ភូមិកប៉ាល់គឿង ឃុំសំពៅពូន ស្រុកកោះធំ ខេត្តកណ្តាល មុខរបរ (មិនពិតប្រាកដ)។
នគរបាលស្រុកកោះធំបានឲ្យដឹងថា កាលពីព្រឹកថ្ងៃសុក្រ ១៣ កើត ខែបុស្ស ឆ្នាំ ច សំរិទ្ធិស័ក ព.ស ២៥៦២ ត្រូវនឹងថ្ងៃទី១៨ ខែមករា ឆ្នាំ២០១៩ វេលាម៉ោង០៨និង៥០នាទី មានប្រជាពលរដ្ឋល្អបានរាយការណ៍ថា មានមុខសញ្ញាប្រើប្រាស់ថ្នាំញៀននៅក្នុងបន្ទប់ផ្ទះជួល ស្ថិតនៅភូមិព្រែកស្បូវ ឃុំសំពៅពូន ស្រុកកោះធំ ខេត្តកណ្តាល។
ក្រោយពេលទទួលបានព័ត៌មានរួច សមត្ថកិច្ចយើងបានចុះទៅដល់កន្លែងកើតហេតុហើយបានចាប់ឃាត់ខ្លួនបានមុខសញ្ញាម្នាក់ឈ្មោះ ហៃ ប៉ុក ដែលជាអ្នកប្រើប្រាស់ថ្នាំញៀន។ យោងតាមចម្លើយសារភាពរបស់ឈ្មោះហៃ ប៉ុក បានឆ្លើយសារភាពថា ថ្នាំញៀនដែលគេបានទិញយកមកប្រើប្រាស់នោះ គឺបានទិញពីអ្នកលក់ថ្នាំញៀនម្នាក់ឈ្មោះ ឆាន សុផា ភេទប្រុស អាយុ៣៤ឆ្នាំ ដែលបានស្នាក់នៅផ្ទះជួលភូមិព្រែក ស្បូវ ឃុំសំពៅពូន ស្រុកកោះធំ ខេត្តកណ្តាល។
ក្រោយពេលចាប់ឃាត់ខ្លួនមេក្លោងជួញដូរថ្នាំញៀនឈ្មោះឆាន សុផា គឺគេបានឆ្លើយសារភាពថា ថ្នាំញៀនរបស់គេដែលបានយកមកលក់នោះ គឺគេបានឲ្យឈ្មោះសាម សីហា ភេទប្រុស អាយុ២៨ឆ្នាំជាអ្នកលាក់ទុកដើម្បីលក់នឹងចែកចាយបន្តឲ្យទៅគេ។
ក្រោយពេលទទួលបានចម្លើយសារភាពរួចសមត្ថកិច្ចយើងបានបន្តចុះចាប់ឈ្មោះ សាម សីហា នឹងបានឆែកឆេររកឃើញមានលាក់ទុកថ្នាំញៀនចំនួន០៧កញ្ចប់ធំ នឹងជញ្ជីងថ្លឹងថ្នាំញៀនចំនួន០១នឹងដាវសាំម៉ូរៃចំនួន០១ដើម ដែលបានលាក់ទុកនៅក្នុងរោងដេកយាមខាងមុខផ្ទះរបស់ឈ្មោះសាម សីហា។ ស្ថិតនៅក្នុងភូមិកប៉ាល់គឿង ឃុំសំពៅពូន ស្រុកកោះធំ ខេត្តកណ្តាល។
ក្រោយពេញចាប់ឃាត់ខ្លួនបាន មុខសញ្ញាខាងលើរួមទាំងវត្ថុតាងថ្នាំញៀនបានបញ្ជូនមកកាន់អធិការដ្ឋាននគរបាលស្រុកកោះធំ ដើម្បីធ្វើការស្រាវជ្រាវស៊ើបអង្កេតនឹងកសាងសំណុំរឿងទៅតាមនីតិវិធី៕
Source: Kampuchea Thmey Daily
0 Comments