ឥណ្ឌូនេស៊ី ​នឹង​ដោះលែង​មេខ្លោង​បំផ្ទុះ​គ្រាប់បែក​នៅ​កោះ​បាលី​ចេញពី​ពន្ធនាគារ

ប្រធានាធិបតី​ឥណ្ឌូនេស៊ី​ បាន​និយាយ​កាលពី​ថ្ងៃ​សុក្រ​ថា លោក​Abu Bakar Bashir ដែល​ជា​បព្វជិត​មូស្លីម​រ៉ាឌីកាល់ ​និង​ជា​មេខ្លោង​នៃ​ការ​បំផ្ទុះ​គ្រាប់បែក​លើ​កោះ​បាលី​ឆ្នាំ​២០០២​ នឹង​ទទួល​បាន​ការ​ដោះលែង​ពី​ពន្ធនាគារ​មុន​ពេល​កំណត់​លើ​មូលដ្ឋាន​មនុស្សធម៌។

លោក Bashir អាយុ​៨១​ឆ្នាំ​ដែល​ត្រូវបាន​គេ​ចាត់ទុកថា​ជា​មេដឹកនាំ​សាសនា​នៃ​ក្រុម​ឥស្លាម​និយម Jemaah Islamiah (JI) គឺ​ត្រូវបាន​កាត់ទោស​នៅក្នុង​ឆ្នាំ​២០១០​ក្រោម​ច្បាប់​ប្រឆាំង​ភេរវកម្ម​ដោយសារ​មាន​ទំនាក់ទំនង​ទៅនឹង​ជំរំ​ហ្វឹកហាត់​សកម្មប្រយុទ្ធ​នៅក្នុង​ខេត្ត Aceh ហើយ​ត្រូវ​ជាប់ពន្ធនាគារ​រយៈពេល​១៥​ឆ្នាំ​។​

លោក​ប្រធានាធិបតី Joko Widodo ដែល​កំពុង​ស្វែងរក​ការជាប់ឆ្នោត​ជាថ្មី​នៅ​ខែមេសា​ខាងមុខនេះ​គឺ​ត្រូវបាន​រិះគន់​ដោយ​គណបក្សប្រឆាំង​ដែល​បាន​ចោទសួរ​អំពី​អត្តសញ្ញាណ​ឥស្លាម​របស់គាត់​ហើយ​បាន​ចោទប្រកាន់​គាត់​ពី​ការគាំទ្រ “​អំពើ​ឧក្រិដ្ឋកម្ម​” របស់​បព្វជិត​។​

ទោះបីជា​យ៉ាងណាក៏ដោយ លោក Widodo បាន​ប្រាប់​អ្នកយកព័ត៌មាន​ថា “​មូលហេតុ​ទី​១​គឺ​បញ្ហា​មនុស្សធម៌​។ គាត់​ជា​មនុស្ស​ចាស់​ហើយ​សុខភាព​របស់គាត់​ក៏​ជាការ​ពិចារណា​ផងដែរ​”​។​

លោក Widodo ក៏បាន​លើកឡើង​ពី​បញ្ហា​សន្តិសុខ​ផងដែរ​ប៉ុន្តែ​លោក​មិនបាន​បញ្ជាក់​លម្អិត​ទេ​។​
​ទីប្រឹក្សា​ផ្នែក​ច្បាប់​នៅ​ក្រុម​យុទ្ធនាការ​របស់លោក Widodo គឺ​លោក Yusril Mahendra បាន​និយាយថា លោក​បាន​បញ្ចុះបញ្ចូល​លោក​ប្រធានាធិបតី​ចំពោះ​ការដោះលែង​លោក Bashir ។​

លោក Mahendra ត្រូវបាន​ដកស្រង់​សម្តី​ដោយ​ប្រព័ន្ធ​ផ្សព្វផ្សាយ​ឥណ្ឌូនេស៊ី​ដែល​បាន​និយាយថា “​នេះ​បាន​បង្ហាញ​ដល់​សាធារណជន​ថា វា​ជា​ការ​មិន​ត្រឹមត្រូវ​ទេ​ដែល​លោក Widodo ធ្វើទុក្ខបុកម្នេញ​ឬក៏​ដាក់ទោស​បព្វជិត​”​។​

គួរ​បញ្ជាក់​ថា មនុស្ស​មួយ​ចំនួន​ក្នុងចំណោម​អ្នក​ស្លាប់​ជាង​២០០​នាក់​ក្នុងការ​បំផ្ទុះ​គ្រាប់បែក​នៅ​ក្លឹប​រាត្រី​កោះ​បាលី​កាលពី​ឆ្នាំ​២០០២​គឺជា​ជនជាតិ​អូស្ត្រាលី​ហើយ​រដ្ឋាភិបាល​ក្រុង​អង់កា​រ៉ា​ធ្លាប់បាន​ជំរុញ​ឲ្យ​ប្រឆាំង​នឹង​ការ​អត់ឱន​ចំពោះ​លោក Bashir៕ REUTERS


​

Source: Kampuchea Thmey Daily