ភ្នំពេញ ៖ បងប្អូនប្រជាពលរដ្ឋជាភ្ញៀវចូលរួមក្នុងពិធីមង្គលការ គួរតែមានការប្រុងប្រយ័ត្នចំពោះប្រជាការពារភូមិ នៅពេលម្ចាស់ដើមការហៅឲ្យទៅការពារកន្លែងមង្គលការពេលគាត់ផឹកស្រវឹងបែរជាហ៊ានដកអាយកូមវាយក្បាលភ្ញៀវរយះ ដោយគ្រាន់តែភ្ញៀវមិនទាន់ចូលតុតាមការហៅរបស់លោក។ ប្រជាការពារូបនោះ ធ្វើឲ្យបរិយាកាសក្នុងមង្គលការ ក្លាយជាអាប់អួមួយរំពេច កាលពីវេលាម៉ោង៩និង២០នាទីយប់ ថ្ងៃទី២៤ ខែមករា ឆ្នាំ២០១៩ តាមបណ្ដោយផ្លូវបេតុង ដែលស្ថិតនៅភូមិ ត្រពាំងល្វា សង្កាត់កាកាបទី១ ខណ្ឌពោធិ៍សែនជ័យ។
ជនរងគ្រោះមាន ឈ្មោះ សុខ ហុក ភេទប្រុស អាយុជាង៤០ឆ្នាំ ចំណែកជនបង្កដែលស្គាល់គ្នា ឈ្មោះ ណាក់ គឺជាប្រជាការពារក្នុងភូមិកើតហេតុ។
នៅមុនពេលកើតហេតុ រូបគាត់ និងមិត្តភ័ក្ដិ២-៣នាក់ទៀត បាននាំគ្នាចូលរួមក្នុងពិធីមង្គលការ នៅកន្លែងកើតហេតុ ពេលនោះ ត្រូវបានប្រជាការពារភូមិដែលគេហៅឲ្យទៅជួយការពារកន្លែងរោងការបានហៅឲ្យជនរងគ្រោះចូលតុ ដោយគាត់ និងមិត្តភ័ក្ដិផ្សេងទៀតនិយាយថា ពួកគាត់ចាំចូលក្រោយគេក៏បានដែរ ព្រោះពួកគាត់ជាបងប្អូនម្ចាស់ដើមការទេ មិនអីនោះឡើយ។
គ្រាន់តែមានរឿងប៉ុណ្ណឹង ជនបង្ក ដែលជាប្រជាការពារភូមិនោះ បានយកអាយកូមវាយទៅលើជនរងគ្រោះមួយអាយកូម បណ្តាលឲ្យរយះចិញ្ចើមនៅមុខរោងការក្មួយ បណ្តាលឲ្យផ្អើលឆោឡោពេញរោងការតែម្ដង បន្ទាប់មកបងប្អូនម្ចាស់ដើមការខឹងវាយទៅលើជនបង្កដែលត្រូវជាបងប្អូន បណ្តាលឲ្យទ្រមខ្លួន ហើយជនបង្កត្រូវបានបងប្អូនដេញឲ្យទៅផ្ទះភ្លាមៗ កុំឲ្យមានបញ្ហាទៀត ព្រោះស្រវឹងខ្លាំងពេក។ បាតុភាពនេះ បង្កឲ្យមានការភ្ញាក់ផ្អើលឆោឡោពេញរោងការបាត់បង់ភាពថ្លៃថ្នូរ ព្រោះតែលោកប្រជាការពារភូមិ ម្នាក់នេះ ខ្លាំងមិនស្គាល់អ្នកណាជាអ្នកណាសោះនោះ។
ជនរងគ្រោះ បានទៅដាក់ពាក្យបណ្ដឹង ដើម្បីឲ្យសមត្ថកិច្ចហៅជនបង្កដែលជាប្រជាការពារភូមិមកណែនាំ ព្រោះជនរងគ្រោះប្រញាប់ឡើងយន្តហោះចេញទៅប្រទេសក្រៅ នៅថ្ងៃស្អែកផង៕
Source: Kampuchea Thmey Daily
0 Comments