រដ្ឋាភិបាលបាននិយាយកាលពីថ្ងៃសុក្រថា ទឹកជំនន់និងការរអិលបាក់ដីនៅក្នុងប្រទេសឥណ្ឌូនេស៊ីបានសម្លាប់មនុស្សយ៉ាងតិច៥៩នាក់ បន្ទាប់ពីភ្លៀងធ្លាក់ខ្លាំងបានវាយប្រហារកោះ Sulawesi ហើយបង្ខំឲ្យមនុស្សរាប់ពាន់នាក់ត្រូវភៀសខ្លួនចេញពីលំនៅដ្ឋានរបស់ពួកគេ។
លោក Syamsibar ប្រធានទីភ្នាក់ងារកាត់បន្ថយគ្រោះមហន្តរាយកោះ Sulawesi ភាគខាងត្បូងបានប្រាប់ AFP ថា “ខ្ញុំមិនធ្លាប់ឃើញអ្វីអាក្រក់បែបនេះទេ។ នេះជារឿងដ៏អាក្រក់បំផុត”។ លោកបានបន្ថែមថា មនុស្សចំនួន២៥នាក់នៅតែបាត់ខ្លួននៅឡើយ។
ដោយសារតែភ្លៀងធ្លាក់ខ្លាំង ទឹកទន្លេបានឡើងផុតច្រាំងហើយជន់លិចសហគមន៍ជាច្រើននៅក្នុងស្រុកចំនួន១១នៃកោះ Sulawesi ភាគខាងត្បូង។ ផ្នែកខ្លះនៃទីក្រុង Makassar ក៏រងផលប៉ះពាល់ផងដែរ។
ស្រុក Gowa គឺរងគ្រោះធ្ងន់ធ្ងរបំផុតដោយមានមនុស្សចំនួន៤៤នាក់ត្រូវបានគេរកឃើញស្លាប់។
មនុស្សប្រមាណ៣,៤០០នាក់ត្រូវបានជម្លៀសចេញពីលំនៅដ្ឋានរបស់ពួកគេហើយបានចូលជ្រកកោននៅក្នុងសាលារៀន វិហារឥស្លាមនិងតង់។
អ្នកជួយសង្គ្រោះនិងអ្នកស្រុកបានដើរកាត់តាមដងផ្លូវដែលពោរពេញដោយទឹកជម្រៅត្រឹមចង្កេះហើយអ្នកខ្លះមានទូលទ្រព្យសម្បត្តិនិងរបស់របររបស់ពួកគេ។
អាជ្ញាធរនិយាយថា ទឹកជំនន់កំពុងស្រកចុះប៉ុន្តែផលប៉ះពាល់នៃគ្រោះមហន្តរាយនេះបានរាលដាលយ៉ាងធំធេងដោយធ្វើឲ្យខូចខាតដល់ផ្ទះ អគាររដ្ឋាភិបាល សាលារៀននិងស្ពាន។
ការបាក់ដីនិងទឹកជំនន់នៅប្រទេសឥណ្ឌូនេស៊ីគឺជារឿងធម្មតាក្នុងរដូវមូសុងចន្លោះខែតុលាដល់ខែមេសានៅពេលដែលទឹកភ្លៀងបានធ្លាក់ចុះក្នុងប្រទេសប្រជុំកោះអាស៊ីអាគ្នេយ៍មួយនេះ។
កាលពីខែតុលា ទឹកជំនន់ភ្លាមៗនិងការបាក់ដីបានសម្លាប់មនុស្សយ៉ាងតិច២២នាក់នៅក្នុងស្រុកមួយចំនួនលើកោះស៊ូម៉ាត្រា៕ AFP
Source: Kampuchea Thmey Daily
0 Comments