កំពង់ឆ្នាំង ៖ មន្ទីរពេទ្យបង្អែកខេត្តកំពង់ឆ្នាំង នៅរសៀលថ្ងៃទី២៤ ខែមករា ឆ្នាំ២០១៩ បានទទួលសិស្សានុសិស្ស មកពីវិទ្យាល័យព្រះបាទសុរាម្រឹត ចំនួន៤០នាក់ បានស្ម័គ្រចិត្តផ្ដល់ឈាមចំនួន៤០កំប្លោក ជូនមន្ទីរពេទ្យបង្អែកខេត្ត សម្រាប់ជួយសង្គ្រោះអាយុជីវិតជនរងគ្រោះដោយគ្រោះថ្នាក់ចរាចរណ៍ ស្ត្រីសម្រាលកូន និង អ្នកជំងឺទូទៅដែលត្រូវការឈាមជាចាំបាច់ដើម្បីសង្គ្រោះជីវិត។
លោក សូរិន្ទ ទីរ៉ាវុឌ្ឍី ប្រធានមន្ទីរពេទ្យបង្អែកខេត្តកំពង់ឆ្នាំងបានឲ្យដឹងថា បច្ចុប្បន្នមន្ទីរពេទ្យខេត្ត កំពុងតម្រូវការឈាមច្រើន ព្រោះតែអ្នកជំងឺបានកើនឡើងច្រើនជារៀងរាល់ថ្ងៃ។ ដោយឡែកខាងមន្ទីរពេទ្យកន្លងទៅ ធ្លាប់បានទទួលឈាមពីមន្ត្រីយោធា មន្ត្រីនគរបាល សាសនិកឥស្លាម និងពីក្រុមគ្រូពេទ្យខ្លួនឯងជាដើមជាបន្តបន្ទាប់ផងដែរ ប៉ុន្តែប្រើប្រាស់មិនគ្រប់គ្រាន់ឡើយ។
ជាក់ស្ដែងម្សិលមិញនេះ មន្ទីរពេទ្យខេត្ត ក៏ទទួលបានអំណោយឈាម ពីសិស្សវិទ្យាល័យព្រះបាទសុរាម្រឹត ដែលស្ម័គ្រចិត្តចំនួន៤០នាក់ដែរ។
លោកបានបញ្ជាក់ទៀតថា ចំពោះឈាម ដែលទទួលបានមក គឺត្រូវយកទៅពិនិត្យយ៉ាងយកចិត្តទុកដាក់បំផុត ហើយបើឃើញមានមេរោគ គឺមិនយកទៅប្រើប្រាស់ឡើយ។ ចំពោះឈាមដែលប្រើផ្តល់ជូនទៅលើអ្នកជំងឺ ឬជនរងគ្រោះ មិនបានគិតថ្លៃនោះទេ ប៉ុន្តែបើអ្នកជំងឺមានបងប្អូន សាច់ញាតិ ត្រូវជួយផ្តល់ឈាមត្រឡប់មកវិញ ដើម្បីទុកសង្គ្រោះជីវិតមនុស្សតទៅទៀត។ ប៉ុន្តែពេលខ្លះអ្នកជំងឺមិនមានសាច់ញាតិបងប្អូន ខាងមន្ទីរពេទ្យក៏នៅមិនយកថ្លៃអ្វីដែរ។
លោកប្រធានមន្ទីរពេទ្យខេត្ត សូមថ្លែងអំណរគុណយ៉ាងជ្រាវជ្រៅដល់ សិស្សវិទ្យាល័យ ព្រះបាទសុរាម្រឹត ដែលស្ម័គ្រចិត្តផ្តល់ឈាម ជូនមន្ទីរពេទ្យដើម្បីជួយសង្គ្រោះមនុស្ស ដែលជាកាយវិកាមនុស្សធម៌ដ៏ប្រពៃមិនអាចកាត់ថ្លៃបានឡើយ។ លោកក៏សូមអរគុណផងដែរ ដល់ លោកនាយកវិទ្យាល័យព្រះបាទសុរាម្រឹត ដែលបាននាំសិស្សចំនួន៤០នាក់ដែលបានស្ម័គ្រចិត្ត ផ្តល់ឈាមជូនមន្ទីរពេទ្យបង្អែកខេត្តកំពង់ឆ្នាំង។ ដោយការផ្តល់ឈាមនេះ បានធ្វើឡើងនៅក្នុងបរិវេណវិទ្យាល័យព្រះបាទសុរាម្រឹត ស្ថិតក្នុងភូមិស្រែព្រី សង្កាត់កំពង់ឆ្នាំង ក្រុងកំពង់ឆ្នាំង ដោយការចូលរួមដឹកនាំពីលោក ទុំ សម្បត្តិ ប្រធានអនុប្រធាន មន្ទីរពេទ្យបង្អែកខេត្តកំពង់ឆ្នាំង។
កញ្ញា ស នីតា ប្រធានផ្នែកមន្ទីរពិសោធន៍ និងផ្តល់ឈាម នៃមន្ទីរពេទ្យបង្អែកខេត្តកំពង់ឆ្នាំង បានឲ្យដឹងថា បច្ចុប្បន្ននៅមន្ទីរពេទ្យបង្អែកខេត្តកំពង់ឆ្នាំង មានតម្រូវការឈាមជាច្រើនសម្រាប់ជួយ សង្គ្រោះជីវិតអ្នកជំងឺមានគ្រោះថ្នាក់ផ្សេងៗ និងជួយដល់អ្នកជំងឺដែលគ្មានសាច់ញាតិ ដែលត្រូវការឈាមសង្គ្រោះជីវិតបន្ទាន់ផងដែរ ដែលមន្ទីរពេទ្យខេត្តមិនតម្រូវឲ្យបង់ប្រាក់ថ្លៃឈាមនោះឡើយ៕
Source: Kampuchea Thmey Daily
0 Comments