ភ្នំពេញ ៖ ក្រោយពីមានការប្រកាស ក៏ដូចជាការអំពាវនាវរបស់ទណ្ឌិត សម រង្ស៉ី ឲ្យកងកម្លាំងប្រដាប់អាវុធ កុំស្តាប់បទបញ្ជារបស់ប្រមុខរាជរដ្ឋាភិបាលនោះ បាននាំឲ្យមានប្រតិកម្មយ៉ាងខ្លាំងពីមេបញ្ជាការ និងនាយទាហានទាំងអស់ នៅក្នុងកងពលតូចលេខ៧០ និងបានអះអាងថា កងទ័ពស្ម័គ្រស្មោះចំពោះរាជរដ្ឋាភិបាលជានិច្ច និងស្តាប់រាល់បទបញ្ជារបស់សម្តេចតេជោ ហ៊ុន សែន ជានិច្ច ដូច្នេះពូជក្បត់ជាតិ បំផ្លាញជាតិ ដូចលោក សម រង្ស៊ី ជាគ្មាននរណាស្តាប់តាមការអំពាវនាវនោះទេ នេះបើតាមការបញ្ជាក់របស់លោកឧត្តមសេនីយ៍ឯក ម៉ៅ សុផាន់ មេបញ្ជាការរងកងទ័ពជើងគោក និងជាមេបញ្ជាការកងពលតូចលេខ៧០ ទៅកាន់អ្នកសារព័ត៌មាន ហើយដែលបានបង្ហោះនៅលើបណ្តាញសង្គមហ្វេសប៊ុករបស់កងពល នាថ្ងៃទី២៦ ខែមករា ឆ្នាំ២០១៩។
ទណ្ឌិត សម រង្ស៊ី ដែលកំពុងនិរទេសខ្លួនឯងនៅបរទេសនោះ កាលពីថ្ងៃទី២៥ ខែមករា បានធ្វើសេចក្តីអំពាវនាវមួយដល់កងកម្លាំងប្រដាប់អាវុធទាំងអស់ កុំឲ្យស្តាប់បញ្ជាសម្តេចនាយករដ្ឋមន្ត្រី ដោយសំអាងថា សម្តេចតេជោជាជនផ្តាច់ការ ហ៊ុន សែន ជាជនផ្តាច់ការ ដោយសារតែបានបានណែនាំកងកម្លាំងប្រដាប់អាវុធ ឲ្យចាប់ខ្លួនលោក នៅពេលវិលត្រឡប់មកប្រទេសកម្ពុជាវិញនៅឆ្នាំ២០១៩នេះ។
ទាក់ទងការអំពាវនាវនេះ លោកឧត្តមសេនីយ៍ឯក ម៉ៅ សុផាន់ បានលើកឡើងថា កងទ័ពស្មោះត្រង់ជានិច្ចចំពោះជាតិ សាសនា ព្រះមហាក្សត្រ និងត្រៀមខ្លួនជានិច្ចក្នុងការការពារសុខសន្តិភាព ការពារសេចក្តីសុខរបស់ប្រជាពលរដ្ឋ។ ជាពិសេសកងទ័ពតែងតែស្តាប់នូវបទបញ្ជារបស់អគ្គមេបញ្ជាការកំពូលសម្តេចតេជោ ហ៊ុន សែន ក្នុងការអនុវត្តន៍ច្បាប់ និងចាត់វិធានការចំពោះក្រុមជនទណ្ឌិត ដែលមានមហិច្ឆតាប៉ុនប៉ងបំផ្លាញនូវសុខសន្តិភាព ស្ថេរភាព និងសេចក្តីសុខរបស់ប្រជាពលរដ្ឋ។ លោកឧត្តមសេនីយ៍បញ្ជាក់ថា “ពួកយើងជាកងទ័ពកងពលតូចលេខ៧០ សូមប្រាប់ទៅទណ្ឌិតរត់ចោលច្បាប់ និងបក្ខពួកថា កងទ័ពស្តាប់ និងគោរពជានិច្ចនូវបទបញ្ជា របស់សម្តេចតេជោ នាយឧត្តមសេនីយ៍ផុតលេខផ្កាយមាស៥ ហ៊ុន សែន ដែលជាមេបញ្ជាការកំពូលរបស់កងទ័ព។
ពួកយើងត្រៀមខ្លួនជានិច្ចក្នុងការអនុវត្តន៍ច្បាប់ អនុវត្តន៍តាមដីការបស់តុលាការ ចំពោះជនប៉ុនប៉ងធ្វើបដិវត្តន៍បំផ្លាញសុខសន្តិភាព និងសេចក្តីសុខរបស់ប្រជាពលរដ្ឋ ដូចជាទណ្ឌិត សម រង្ស៉ី នេះ។ សូមលោកឯងកុំប្រឹងប្រែងញុះញង់កងទ័ព គ្មានកងទ័ពណាគេស្តាប់លោកឯងជាជនកំសាកក្បត់ជាតិនោះឡើយ។ កងទ័ពគេដឹងច្បាស់ថា លោកឯងជាពូជក្បត់ជាតិ បំផ្លាញជាតិគ្មាននរណាទៅស្តាប់តាមការអំពាវនាវឆ្កួតលេលារបស់លោកឯងនោះទេ។ ពួកយើងខ្ញុំជាកងទ័ពនៅកងពលតូចអន្តរាគមន៍លេខ១ សូមអញ្ជើញទណ្ឌិត សម រង្ស៉ី ចូលស្រុកកុំបានតែស្រែក។ សូមអញ្ជើញចូលមកចុះពួកយើងខ្ញុំជាកងទ័ពរង់ចាំលោកត្រឡប់មកវិញគ្រប់ពេល រង់ចាំក្នុងការអនុវត្តន៍ច្បាប់យ៉ាងខ្ជាប់ខ្ជួនចំពោះរូបលោក”។
ឆ្លើយតបសេចក្តីអំពាវនាវរបស់ទណ្ឌិត សម រង្ស៉ី ដែលកុំឲ្យកងទ័ពចាត់ការចំពោះប្រជាពលរដ្ឋ ដែលនឹងទៅទទួលរូបលោក នៅពេលត្រឡប់ចូលស្រុកនោះ លោក ម៉ៅ សុផាន់ បានអះអាងថា ដូចដែលសម្តេចតេជោនាយករដ្ឋមន្ត្រីបានលើកឡើងហើយ គឺឲ្យកងទ័ពគោរពស្រឡាញ់ និងជួយរាល់ទុក្ខលំបាករបស់ប្រជាពលរដ្ឋ ព្រោះកងទ័ពកើតចេញពីប្រជាជន។ ដូច្នេះគ្មានហេតុផលណាមួយឲ្យកងទ័ពទៅធ្វើបាបប្រជាពលរដ្ឋស្លូតត្រង់នោះឡើយ គឺមានតែការពារប្រជាពលរដ្ឋ ប៉ុន្តែសម្រាប់ជនសមគំនិត និងចូលរួមក្នុងចលនាបដិវត្តន៍តាមការអំពាវនាវរបស់មេបដិវត្តន៍ដូចជាទណ្ឌិត សម រង្ស៉ី គឺមិនអាចលើកលែងនោះឡើយ៕
Source: Kampuchea Thmey Daily
0 Comments