ជនជាតិ​ចិន​៤​នាក់​ ត្រូវបាន​សមត្ថកិច្ច​ឃាត់ខ្លួន ​ករណី​លួច​បើក​កាស៊ីណូ​នៅ​កណ្តាល​ក្រុង​សៀមរាប​

​សៀមរាប ​៖ ជនជាតិ​ចិន​ចំនួន​៤​នាក់ ​ត្រូវបាន​កម្លាំង​នគរបាល​ជំនាញ ខេត្ត​សៀមរាប​ ឃាត់ខ្លួន​ករណី​បើក​ល្បែងស៊ីសង​ខុសច្បាប់ ជ្រក​ក្រោម​ស្លាក​មជ្ឈមណ្ឌល​កម្សាន្ត​ ឈឹង​ស៊ី​អ៊ីង​ស៊ា​ង​។​

ប្រតិបត្តិការ​នេះ ​ធ្វើឡើង​នៅវេលា​ម៉ោង​ប្រមាណ​ជា​១០​យប់ ​ថ្ងៃទី​២៤ ខែ​មករា​ ឆ្នាំ​២០១៩ ​ក្រោម​ការ​ដឹកនាំ​ដោយ​ លោក​ ជួន សុ​បញ្ញា ព្រះរាជអាជ្ញា​រង អម​សាលាដំបូង​ខេត្ត​សៀមរាប ដែល​មាន​ទីតាំង​ស្ថិត​សង្កាត់​ស្វាយដង្គំ ក្រុង​សៀមរាប ក្បែរ​ផ្សារ​រាត្រី​នួន​ណៃ។​

នៅក្នុង​ប្រតិបត្តិ​ការបង្ក្រាប​នេះ សមត្ថកិច្ច​បាន​ដកហូតយក​វត្ថុតាង​បាន​ចំនួន​៣២​គ្រឿង និង​វត្ថុតាង​ផ្សេងៗ​មួយចំនួនទៀត​ បញ្ជូន​មក​សាកសួរ​នៅ​ស្នងការដ្ឋាន​នគរបាល​ខេត្ត​។​

សមត្ថកិច្ច​បន្តថា ជនសង្ស័យ​ទាំង​៤​នាក់​នោះ​មាន ឈ្មោះ​ទី​១-​ឈ្មោះ JIANG JIANCHUN ភេទ​ប្រុស អាយុ​៣៩​ឆ្នាំ ជនជាតិ​ចិន កាន់​លិខិតឆ្លងដែន​លេខ EE១៣៦២៩៤៥, ២-​ឈ្មោះ TONG CHAO ភេទ ប្រុស អាយុ​២៩​ឆ្នាំ ជនជាតិ​ចិន មិនមាន​លិខិតឆ្លងដែន​ជាប់​ខ្លួន​, ៣-​ឈ្មោះ XU HONGXING ភេទ ប្រុស អាយុ​៣៩​ឆ្នាំ ជនជាតិ ចិន កាន់​លិខិតឆ្លងដែន​លេខ EC៤៧៦៧៣៨៨ និង ៤-​ឈ្មោះ HAO BIN ភេទ​ប្រុស អាយុ​៣៦​ឆ្នាំ ជនជាតិ ចិន មិន​មាន​លិខិតឆ្លងដែន​ជាប់​ខ្លួន​។​

ជនសង្ស័យ​ទាំង​៤​នាក់ ត្រូវបាន​ការិយាល័យ​ស៊ើបអង្កេត និង​អនុវត្ត​នីតិវិធី នៃ​ស្នងការដ្ឋាន​ខេត្ត​សៀម​រាប បញ្ជូន​មកកាន់​តុលាការ​ខេត្ត​សៀមរាប​ នៅ​ព្រឹក​ថ្ងៃទី​២៦​មករា​នេះ​ ដើម្បី​ចាត់ការ​បន្ត​តាម​នីតិវិធី​។​

ទាក់ទិន​នឹង​ករណី​នេះដែរ​ មហាជន​បាន​ងឿងឆ្ងល់​ថា មួយរយៈ​នេះ​គេ​មិនដែល​ឃើញ​មាន​វត្តមាន​កម្លាំង​អាវុធហត្ថ​ចុះបង្ក្រាប​បទល្មើស​សោះ​ ឃើញតែ​កម្លាំង​ប៉ូលិស​៕​

​

Source: Kampuchea Thmey Daily