ព្រៃវែង ៖ ផ្ទះមួយខ្នង និងម៉ូតូ២គ្រឿងរបស់ប្រជាពលរដ្ឋ រស់នៅក្នុងស្រុកព្រះស្ដេច ត្រូវបានអគ្គិភ័យឆាបឆេះខ្ទេចហ្មត់ គ្មានសល់។
អគ្គិភ័យឆាបឆេះផ្ទះប្រជាពលរដ្ឋខាងលើ បានកើតឡើង កាលពីយប់ថ្ងៃទី២៥ ខែមករា ឆ្នាំ២០១៩ វេលាម៉ោង២១និង២៥នាទី ស្ថិតក្នុងភូមិត្រពាំងប្រប្រស់ ឃុំសេនារាជឧត្តម ស្រុកព្រះស្ដេច ខេត្តព្រៃវែង។
សមត្ថកិច្ច នៃអធិការដ្ឋាននគរបាលស្រុកព្រះស្ដេចបានឲ្យដឹងថា ម្ចាស់ផ្ទះ ដែលត្រូវបានអគ្គិភ័យឆាបឆេះខាងលើមាន ឈ្មោះ ផុន ខឿន ភេទប្រុស អាយុ៥៧ឆ្នាំ និងប្រពន្ធ ឈ្មោះស៊ុំ វ៉ុន អាយុ៦០ឆ្នាំមុខរបរធ្វើស្រែ រស់នៅភូមិ/ឃុំកើតហេតុខាងលើ។
សមត្ថកិច្ចបានឲ្យដឹងទៀតថា មូលហេតុ ដែលបណ្តាលឲ្យមានអគ្គិភ័យឆាបឆេះផ្ទះ កើតឡើង គឺបណ្តាលមកពីការធ្វេសប្រហែសរបស់ម្ចាស់ផ្ទះ ដោយម្ចាស់ផ្ទះបានដុតភ្លើងទៀន ដើម្បីបំភ្លឺហូបបាយពេលល្ងាច ហើយក្រោយពេលហូបបាយរួច ម្ចាស់ផ្ទះមិនបានពន្លត់ភ្លើងទៀន ធ្វើឲ្យភ្លើងទៀនហូរតាមប្រហោងរនាប ធ្លាក់មកលើចំបើង ដែលម្ចាស់ផ្ទះទុក ដើម្បីឲ្យគោស៊ី នារដូវប្រាំង ទើបបង្កជាអគ្គិភ័យឆាបឆេះឡើងតែម្ដង។ ពេលនោះ ប្រជាពលរដ្ឋជាច្រើនក៏បាននាំគ្នាជួយបាញ់ទឹកពន្លត់ដែរ ប៉ុន្តែមិនអាចជួយសង្គ្រោះបាននោះទេ ព្រោះនៅខាងក្រោមផ្ទះក្រោយ មានចំបើងច្រើន ទើបបណ្ដាលឲ្យភ្លើងឆាបឆេះឡើងសន្ធោសន្ធៅយ៉ាងឆាប់រហ័ស ដែលមានទំហំទទឹង៨ម៉ែត្រ បណ្តោយ ៧ម៉ែត្រកន្លះ រួមនឹងម៉ូតូឌ្រីមសង់ ២គ្រឿង ឆេះខ្ទេចគ្មានសល់។ តែទោះជាយ៉ាងណា នៅក្នុងហេតុការណ៍អគ្គិភ័យឆាបឆេះផ្ទះប្រជាពលរដ្ឋខាងលើ មិនបណ្ដាលឲ្យប្រជាពលរដ្ឋណាម្នាក់រងរបួសនោះទេ៕
Source: Kampuchea Thmey Daily
0 Comments