ជនសង្ស័យចំនួន៦នាក់រួមទាំងជនជាតិកាណាដាម្នាក់ផងដែរ បានបង្ហាញខ្លួននៅតុលាការកេនយ៉ាកាលពីថ្ងៃសុក្រ ពាក់ព័ន្ធនឹងការវាយប្រហារឥស្លាមនិយមរ៉ាឌីកាល់លើសណ្ឋាគារមួយក្នុងទីក្រុង Nairobi ដែលបានសម្លាប់មនុស្សចំនួន២១នាក់។
ចៅក្រមបានទទួលសំណើពីរដ្ឋអាជ្ញាដើម្បីឃុំខ្លួនបុរសបួននាក់និងស្ត្រីម្នាក់សម្រាប់រយៈពេល៣០ថ្ងៃខណៈដែលការស៊ើបអង្កេតនៅតែបន្ត។ ជនសង្ស័យទី៦នឹងត្រូវឃុំខ្លួនរហូតដល់សប្តាហ៍ក្រោយ។
ឯកសារតុលាការបានបង្ហាញថា ជនសង្ស័យត្រូវបានគេចោទប្រកាន់ពីបទជាប់ពាក់ព័ន្ធក្នុងការឡោមព័ទ្ធរយៈពេលជិត២០ម៉ោងនៅសណ្ឋាគារ DusitD2 និងអគារការិយាល័យដោយអ្នកបំផ្ទុះគ្រាប់បែកអត្តឃាតម្នាក់និងខ្មាន់កាំភ្លើង៤នាក់ដែលត្រូវបានសម្លាប់ដោយកងកម្លាំងសន្តិសុខ។
សេចក្តីថ្លែងការណ៍ពីនាយកអយ្យការសាធារណៈលោក Noordin Haji បាននិយាយថា “ការស៊ើបអង្កេតលើបញ្ហានេះគឺមានភាពស្មុគស្មាញនិងឆ្លងប្រទេសហើយដូច្នេះនឹងត្រូវការពេលវេលានិងធនធានគ្រប់គ្រាន់ដើម្បីរកឲ្យឃើញនូវសម្បុកឧក្រិដ្ឋជនទាំងមូល”។
រដ្ឋាភិបាលកាណាដាបាននិយាយថាខ្លួនសូមថ្កោលទោសចំពោះការវាយប្រហារដ៏រន្ធត់នេះហើយបន្ថែមថា ខ្លួនបានទាក់ទងទៅអាជ្ញាធរកេនយ៉ាសម្រាប់ព័ត៌មានអំពីជនសង្ស័យកាណាដា។
ជនសង្ស័យសរុបចំនួន១១នាក់ត្រូវបានចាប់ខ្លួនបន្ទាប់ពីការវាយប្រហារកាលពីថ្ងៃអង្គារប៉ុន្តែការស៊ើបអង្កេតទៅលើអ្នកដទៃទៀតកំពុងបន្ត។
អ្នកដែលបានបង្ហាញខ្លួននៅក្នុងតុលាការរួមមានអ្នកបើកតាក់ស៊ីឈ្មោះ Joel Ng'ang'a Wainaina ដែលបានដឹកអ្នកវាយប្រហារជាច្រើនដងនិងអ្នកបើកតាក់ស៊ីម្នាក់ទៀតឈ្មោះ Oliver Kanyango Muthee ដែលបានបើកឡានដឹកអ្នកវាយប្រហារម្នាក់ទៅកាន់កន្លែងនៃការវាយប្រហារ។
លោក Gladys Kaari Justus កំពុងត្រូវបានស៊ើបអង្កេតលើការផ្ទេរប្រាក់ខណៈ Guleid Abdihakim ដែលមានសញ្ជាតិកាណាដាកំពុងត្រូវបានគេស៊ើបអង្កេតលើទំនាក់ទំនងគួរឲ្យសង្ស័យ។
លោក Hussein Muhamed ដែលទូរស័ព្ទរបស់គាត់បានបង្ហាញពីទំនាក់ទំនងជាមួយពួកជ្រុលនិយមឥស្លាមដែលគេស្គាល់គឺនឹងត្រូវឃុំខ្លួនរហូតដល់ថ្ងៃពុធក្រោយ៕ AFP
Source: Kampuchea Thmey Daily
0 Comments