អង្គការ UNIDO សហការ​ជាមួយ ក្រសួងកសិកម្ម កម្ពុជា ដើម្បី​អភិវឌ្ឍន៍​វិស័យ​កសិកម្ម​ប្រកបដោយ​ចីរភាព

ភ្នំពេញ​ ៖ លោក Michele Clara មន្ត្រីជាន់ខ្ពស់​ផ្នែក​សម្របសម្រួល​អញ្ជើញ​មកពី​អង្គការ United Nations Industral Development Organization (UNIDO) បាន ថ្លែង​ដោយ​សន្យា​ថា (UNIDO) នឹង សហការ​យ៉ាង​ជិតស្និទ្ធ ជាមួយ ក្រសួង​កិ​សកម្ម និង​អង្គការ UNIDO ដើម្បី​អភិវឌ្ឍន៍​វិស័យ​កសិកម្ម​ប្រកបដោយ​ចីរភាព​។

កិច្ច​ជំនួប ពិភាក្សា ពង្រឹង និង​ពង្រីក​កិច្ច​សហប្រតិបត្តិការ​រ​វាង​ក្រសួងកសិកម្ម រុក្ខាប្រមាញ់ និង​នេសាទ និង​អង្គការ UNIDO ដើម្បី​អភិវឌ្ឍន៍​វិស័យ​កសិកម្ម​ប្រកបដោយ​ចីរភាព បានធ្វើ​ឡើង កាលពី​ថ្ងៃ​ព្រ​ហ​ស្បតិ៍ ៤​រោច ខែបុស្ស ឆ្នាំច សំរឹទ្ធិស័ក ព​.​ស ២៥៦២ ត្រូវ​នឹង​ថ្ងៃទី​២៤ ខែមករា ឆ្នាំ​២០១៩ នៅ​ទីស្តីការ​ក្រសួងកសិកម្ម រុក្ខាប្រមាញ់ និង​នេសាទ រវាង លោក រដ្ឋមន្ត្រី វេ​ង សាខុន និង លោក Michele Clara​។



មាន​មតិ​ស្វាគមន៍ លោក រដ្ឋមន្ត្រី បាន​សម្តែង​អំណរគុណ​ជូន​ចំពោះ​អង្គការ UNIDO ដែល​កន្លងមក​បាន​ជួយឧបត្ថម្ភ​គាំទ្រ​ដល់​វិស័យ​កសិកម្ម​នៅ​កម្ពុជា ហើយ​សាទរ​ចំពោះ​កិច្ច​ខិតខំ​ប្រឹងប្រែង និង​ការ​សហការ​ជាមួយ​សហភាព​អឺរ៉ុប ក្នុង​គម្រោង​អភិវឌ្ឍន៍​វិស័យ​ជលផល​ប្រកបដោយ​ចីរភាព និង​បរិ​យា​ប័ន្ន ហើយ​លោក​សង្ឃឹមថា​អង្គការ UNIDO នឹង​បន្ត​ជួយ​ដល់​វិស័យ​ជលផល និង​វិស័យ​ផ្សេងៗ​ទៀត​ដូចជា​វិស័យ​កែច្នៃ​ផលិតផល​កសិកម្ម និង​ការ​វិច​ខ្ចប់​ប្រកបដោយ​គុណភាព និង​សុវត្ថិភាព​ចំណីអាហារ​ឱ្យ​កាន់តែ​មានការ​រីកចម្រើន​សមស្រប​តាម​កំណើនសេដ្ឋកិច្ច ប្រជាជន ការប្រកួតប្រជែង​ទីផ្សារ​។

នា​ឱកាស​នេះ លោក Michele Clara បាន​ឯកភាព​ចំពោះ​ការ​លើក​ឡើង​របស់​លោក រដ្ឋមន្ត្រី ហើយ​បាន​បញ្ជាក់​បន្ថែម​ផង​ដែរ​ថា ក្រសួងកសិកម្ម រុក្ខាប្រមាញ់ និង​នេសាទ​មាន​តួនាទី​សំខាន់​ក្នុង​ការ​អភិវឌ្ឍន៍​វិស័យ​កសិកម្ម ជាពិសេស​ជំរុញ​ការកែច្នៃ​ផលិតផល​កសិកម្ម​នៅ​កម្ពុជា ដើម្បី​ផ្គត់ផ្គង់​ទីផ្សារ​ក្នុងស្រុក និង​ធ្វើការ​នាំចេញ​។ ដោយឡែក ភាព​ជោគជ័យ​នៃ​វិស័យ​កែច្នៃ គឺ​មិនអាច​រំពឹង​តែ​ក្រសួង​មួយ​ដើម្បី​សម្រេច​បាន​តែប៉ុណ្ណោះ​នោះ​ទេ គឺ​ត្រូវការ​ការ​សហការ និង​ការចូលរួម​ពី​គ្រប់​ភាគី​ពាក់ព័ន្ធ​ដូចជា រដ្ឋ វិស័យ​ឯកជន ដៃគូ​អភិវឌ្ឍន៍ និង​ប្រជាកសិករ រួមជាមួយ​ហេដ្ឋារចនាសម្ព័ន្ធ​សំខាន់ៗ​គាំទ្រ​ផងដែរ​។



លោក Michele Clara បាន​បន្ត​ថា ​ទស្សនកិច្ច​របស់​លោក និង​សហការី​នា​ពេល​នេះ​ពាក់ព័ន្ធ​នឹង​វិស័យ​កសិកម្ម គឺ​ដើម្បី​សិក្សា រៀបចំ​គម្រោង និង​ផ្តល់​កិច្ច​សហប្រតិបត្តិការ​បន្ថែម​ទៀត​ជាមួយ​ក្រសួងកសិកម្ម រុក្ខាប្រមាញ់ និង​នេសាទ ធ្វើ​យ៉ាង​ណា​អភិវឌ្ឍន៍​វិស័យ​កសិកម្ម​នៅ​កម្ពុជា​ឲ្យ​មាន​ការ​រីកចម្រើន​ថែម​មួយកម្រិត​ទៀត​។

​ពាក់ព័ន្ធ​នឹង​ការសិក្សា​រៀបចំ​គម្រោង​ថ្មី លោក រដ្ឋមន្ត្រី​បាន​គូសបញ្ជាក់​ផង​ដែរ​ថា ក្រសួង​នឹង​ផ្តល់​កិច្ចសហការ​ឲ្យ​អស់​លទ្ធ​ភាព ហើយ​លោក​ក៏បាន​ធ្វើការ​ណែនាំ​ដល់​ក្រុមការងារ​របស់​អង្គការ UNIDO ក៏ដូចជា​មន្ត្រី​ជំនាញ​របស់​ក្រសួង​ឲ្យ​ពិនិត្យ ពិចារណា​ជា​សំខាន់​ក្នុង​ការ​កសាង​ហេដ្ឋារចនាសម្ព័ន្ធ​ដែល​ជួយ​គាំទ្រ​ដល់​វិស័យ​កសិកម្ម ការ​បញ្ចូល​បច្ចេកវិទ្យា​ថ្មីៗ ការ​ធ្វើ​ទំនើបកម្ម​កសិកម្ម និង​ការ​ធ្វើ​យន្តូបនីយកម្ម​កសិកម្ម ដែល​សកម្មភាព​ទាំងនេះ​គឺជា​ការ​ឆ្លើយតប​យ៉ាង​សមស្រប​ក្នុង​សម័យ​បដិវត្ត​ឧស្សាហកម្ម​ទី ៤ និង​ឌីជីថល​រូបនីយកម្ម​ដែល​ពិភពលោក​កំពុង​ជួបប្រទះ៕

Source: Kampuchea Thmey Daily