តំបន់ជនមូស្លីមភាគច្រើននៅភាគខាងត្បូងប្រទេសហ្វីលីពីន បានឆ្លើយតបជាថ្មីជាមួយពាក្យថា “Yes” នៅក្នុងការធ្វើប្រជាមតិនៅសប្ដាហ៍នេះ លើស្វ័យភាពកាន់តែធំជាងមុនដែលជំរុញក្តីសង្ឃឹមសម្រាប់សន្តិភាពក្នុងតំបន់ដែលរងការបំផ្លិចបំផ្លាញដោយជម្លោះខ្លាំងបំផុតមួយនៅអាស៊ី។
គណៈកម្មការរៀបចំការបោះឆ្នោតបាននិយាយនៅល្ងាចថ្ងៃសុក្រថា ផែនការដើម្បីបង្កើតតំបន់គ្រប់គ្រងដោយខ្លួនឯងសម្រាប់ផ្នែកសម្បូរជនមូស្លីមនៅលើកោះ Mindanao គឺត្រូវបានគាំទ្រដោយអ្នកបោះឆ្នោត៨៥ភាគរយដែលជាហេតុត្រួសត្រាយផ្លូវសម្រាប់ការផ្លាស់ប្តូររយៈពេល៣ឆ្នាំឆ្ពោះទៅរកការបោះឆ្នោតសម្រាប់អង្គនីតិប្បញ្ញត្តិមួយដែលនឹងជ្រើសរើសនាយកប្រតិបត្តិ។
ការធ្វើប្រជាមតិថ្ងៃចន្ទគឺជាចំណុចខ្ពស់បំផុតនៃដំណើរការសន្តិភាពរវាងក្រុមបំបែកខ្លួននិងរដ្ឋាភិបាលដែលមានគោលបំណងដោះស្រាយជម្លោះរយៈពេលច្រើនទសវត្សដែលបានរារាំងដល់ការអភិវឌ្ឍនិងរក្សាផ្នែកខ្លះនៃកោះ Mindanao ឲ្យស្ថិតក្នុងចំណោមតំបន់ក្រីក្របំផុតនៅអាស៊ី។
បញ្ហាអស្ថិរភាព អត្រាខ្ពស់នៃអ្នកគ្មានការងារធ្វើនិងយុវជនដែលមិនបានរៀនសូត្របានធ្វើឲ្យតំបន់នេះក្លាយជាកន្លែងជ្រើសរើសសមាជិកសម្រាប់ក្រុមឧទ្ទាមនិងពួកជ្រុលនិយមឥស្លាម។
ការយល់ព្រមពីអ្នកបោះឆ្នោតប្រមាណ១.៧៤លាននាក់មិនមានអ្វីគួរឲ្យភ្ញាក់ផ្អើលទេហើយតំបន់ថ្មីដែលត្រូវបានគេហៅថា Bangsamoro (ប្រទេសម៉ូរ៉ូស) មួយនេះនឹងមានអំណាចកាន់តែច្រើនក្នុងការបង្កើតនិងវិនិយោគប្រាក់បន្ថែមទៀតសម្រាប់ហេដ្ឋារចនាសម្ព័ន្ធ សាលារៀន ការថែទាំសុខភាពនិងសុខុមាលភាពសង្គមសម្រាប់ប្រជាជនរបស់ខ្លួនប្រមាណ៥លាននាក់ ។
ការបោះឆ្នោតមួយនឹងត្រូវធ្វើឡើងនៅថ្ងៃទី៦ខែកុម្ភៈដើម្បីសាកសួរតំបន់មួយចំនួនផ្សេងទៀតថាតើពួកគេចង់ចូលរួមដែរឬក៏អត់។
រដ្ឋាភិបាលមជ្ឈិមនឹងត្រួតពិនិត្យលើកិច្ចការការពារជាតិ សន្តិសុខនិងគោលនយោបាយរូបិយវត្ថុនិងបរទេសហើយតែងតាំងអាជ្ញាធរអន្តរកាលមួយដែលត្រូវបានជ្រើសរើសដោយរណសិរ្សរំដោះឥស្លាមម៉ូរ៉ូ (MILF) ។
លោកស្រីអនុប្រធានាធិបតី Leni Robredo បាននិយាយថា វាជាការសំខាន់ណាស់ដែលរដ្ឋាភិបាលកណ្តាលជួយ Bangsamoro ដើម្បីបង្កើតសេដ្ឋកិច្ចរីកចម្រើននិងរដ្ឋាភិបាលដែលមានការទទួលខុសត្រូវ។ លោកស្រី Robredo បានបន្ថែមថា “ចូរយើងការពារនិងគាំទ្រការរីកចម្រើននៃដំណើរការនេះពីព្រោះនេះមិនមែនជាទីបញ្ចប់នៃការប្រយុទ្ធដើម្បីសន្តិភាពទេ”។
ការបោះឆ្នោតនេះបានកើតឡើងចំពេលវេលាដ៏សំខាន់មួយសម្រាប់ប្រទេសហ្វីលីពីនដោយក្រុម MILF បានបំបែកខ្លួនហើយធ្វើតាមក្រុមប្រដាប់អាវុធដទៃទៀតក្នុងការសន្យាភក្តីភាពចំពោះក្រុមរដ្ឋឥស្លាម៕ REUTERS
Source: Kampuchea Thmey Daily
0 Comments