ភ្នំពេញ ៖ នៅព្រឹកថ្ងៃទី២៥ ខែកុម្ភៈ ឆ្នាំ២០១៩នេះ ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ បានសម្រេចឲ្យអនុរក្សពន្ធនាគារបញ្ជូន ទណ្ឌិត ថោង សារ៉ាត់ ចេញពីតុលាការ យកទៅកាន់មន្ទីរពេទ្យព្រះកុសុមៈវិញ បន្ទាប់ពីទណ្ឌិតរូបនេះយំឡាំប៉ារំខានដល់អង្គសវនាការ។
នាព្រឹកថ្ងៃទី២៥ ខែកុម្ភៈ ឆ្នាំ២០១៩ ចៅក្រមសាលាដំបូង បានលើកយកសំណុំរឿងឃាតកម្មលើឧកញ៉ា អ៊ឹង ម៉េងជឺ កាលពីចុងឆ្នាំ២០១៤ មកបើកសវនាការបន្ត ដោយតម្រូវឲ្យនាំយក ទណ្ឌិត ថោង សារ៉ាត់មកនៅក្នុងរង្វង់ក្រចកសេះ។ នីតិវិធីដំបូង តុលាការ បានកំណត់ធ្វើការសាកសួរអតីតក្រុមអង្គរក្សជាមុន ទើបសាកសួរ ទណ្ឌិត ថោង សារ៉ាត់ តាមក្រោយ ប៉ុន្តែពេលដែលគេនាំ ថោង សារ៉ាត់ ចូលដល់ក្នុងសវនាការ ទណ្ឌិតរូបនេះទាមទារឆ្លើយមុន វាខុសទៅនឹងនីតិវិធីរបស់តុលាការ ទើបក្រុមប្រឹក្សាតុលាការមិនឯកភាពឲ្យឆ្លើយ ស្រាប់តែទណ្ឌិត ថោង សារ៉ាត់ ស្រែកយំខ្លាំងៗដូចកូនក្មេង ជាហេតុឡើងសម្ពាធឈាម ហើយតុលាការក៏អនុញ្ញាតឲ្យអនុរក្សនាំទណ្ឌិត ថោង សារ៉ាត់ ទៅមន្ទីរពេទ្យវិញ ប៉ុន្តែសវនាការនៅតែបន្ត ដោយតុលាការសាកសួរក្រុមអង្គរក្សបានចំនួន២នាក់ទៀត។
ជនជាប់ចោទ ឈ្មោះ មាស សម្បត្តិ និង ឈ្មោះ ឈុន ចិត្រា ត្រូវបានតុលាការបន្តការសាកសួរបញ្ជាក់បន្ថែមជុំវិញឃាតកម្មលើជនរងគ្រោះ អ៊ឹង ម៉េងជឺ។
ព្រឹកនេះ ជនជាប់ចោទ មាស សម្បត្តិ បានឆ្លើយបដិសេធចម្លើយសារភាពទាំងនៅសមត្ថកិច្ចនគរបាល និងនៅតុលាការចំនួន៥ដង ដោយទទួលតែចម្លើយសារភាពនៅក្នុងសវនាការដែលតុលាការចេញសាលក្រមរបៀបប៉ុណ្ណោះ។ ចំណែកជនជាប់ចោទ ឈ្មោះ ឈុន ចិត្រា បានបដិសេធមិនឆ្លើយនឹងសំណួររបស់តុលាការតែម្ដង ដោយជនជាប់ចោទបានឆ្លើយយ៉ាងខ្លីថា ខ្លួនបានឆ្លើយសំណួរដដែលៗចំនួន៥ , ៦ ដងរួចមកហើយ ។ ដោយសាររឿងក្ដីនេះមានសភាពស្មុគស្មាញ និងអង្គហេតុវែងអន្លាយ តុលាការបានសម្រេចផ្អាកសវនាការនៅម៉ោង១១និង៣០នាទី ហើយនឹងបន្តនៅថ្ងៃទី០៥ ខែមិនា ឆ្នាំ២០១៩ខាងមុខទៀត។ សូមបញ្ជាក់ថា តុលាការ បានសម្រេចចោទប្រកាន់ទី១-ឈ្មោះ ថោង សារ៉ាត់ ភេទប្រុស អាយុ៣៨ឆ្នាំ ថៅកែក្រុមហ៊ុន ៩៩៩ ជាប់ចោទពីបទ ផ្តើមគំនិតក្នុងអំពើឃាតកម្មគិតទុកជាមុន។
ទី២-ឈ្មោះ សៀង វាសនា ភេទប្រុស អាយុ៤៤ឆ្នាំ និងទី៣-ឈ្មោះ លី សៅ ហៅវី ភេទប្រុស អាយុ ៤២ឆ្នាំ (ស្លាប់) ជាប់ចោទពីបទ ឃាតកម្មគិតទុកជាមុន។ ទី៤-ឈ្មោះ កូយ ចាន់ថុល ភេទប្រុស អាយុ ២៩ឆ្នាំ។ ទី៥-ឈ្មោះ មាស សម្បត្តិ ភេទប្រុស អាយុ២៧ឆ្នាំ និងទី៦-ឈ្មោះ ឈុន ចិត្រា ភេទប្រុស ជាប់ចោទពីបទ សមគំនិត ក្នុងអំពើឃាតកម្មគិតទុកជាមុន។ ចំពោះការសួរដេញដោល តុលាការនឹងបន្តនៅព្រឹកថ្ងៃទី១៦មករានេះ។
សូមរំលឹកថា ជនរងគ្រោះមាន ឈ្មោះ អ៊ឹង ម៉េងជឺ ថៅកែក្រុមហ៊ុន ស៊ីម៉ងត៍ពេជ្រ ត្រូវឃាតកបាញ់សម្លាប់ កាលពីម៉ោងប្រមាណជាជាង៧ល្ងាច ថ្ងៃទី២២ ខែវិច្ឆិកា ឆ្នាំ២០១៤កន្លងទៅ នៅមុខតូបលក់ផ្លែឈើស្រស់ យីហោ ឡោ តិចសេង ក្បែរផ្សារអូឡាំពិក។
ក្នុងសវនាការចំនួន២២លើកកន្លងទៅ ក្រុមជនជាប់ចោទបានបដិសេធថា ពួកគេមិនជាប់ពាក់ព័ន្ធនឹងការសម្លាប់ លោកឧកញ៉ា អ៊ឹង ម៉េងជឺ ទេ ប៉ុន្តែពួកគេមិនមានភស្តុតាងដោះបន្ទុកទាល់តែសោះ។
គួររំឭកដែរថា ជនជាប់ចោទ ឈ្មោះ ថោង សារ៉ាត់ និងឈ្មោះ ថោង ចំរើន (ជាឪពុក) និងឈ្មោះ កែវ សារី (ជាម្តាយ) ក៏ធ្លាប់ត្រូវបាន លោក ឃី ឆៃ ចៅក្រមសាលារាជធានីភ្នំពេញ សម្រេចផ្ដន្ទាទោស ដាក់ពន្ធនាគារ ពី២ឆ្នាំ ទៅ២ឆ្នាំកន្លះ និងពិន័យជាប្រាក់ក្នុងម្នាក់ៗ ៦លានរៀលចូលជាថវិការដ្ឋ ក្រោមបទចោទប្រកាន់ កាន់កាប់អាវុធដោយគ្មានការអនុញ្ញាត យោងតាមមាត្រា ៤៩០ នៃក្រមព្រហ្មទណ្ឌ។
ចំពោះសំណុំរឿងឃាតកម្ម បើកក្នុងករណីតុលាការរកឃើញថា លោក ថោង សារ៉ាត់ ជាអ្នកបញ្ជាឲ្យសម្លាប់លោកឧកញ៉ា អ៊ឹង ម៉េងជឺ ដូចការចោទប្រកាន់របស់តុលាការ នោះក្រុមជនជាប់ចោទអាចប្រឈមមុខការជាប់ពន្ធនាគារអស់មួយជីវិត។ នេះបើយោងតាមមាត្រា២០០ នៃក្រមព្រហ្មទណ្ឌ៕
Source: Kampuchea Thmey Daily
0 Comments