ភ្នំពេញ ៖ ស្ត្រីខ្មែរម្នាក់ បានប្ដីចិន សង្ឃឹមថា មានលុយចាយសប្បាយ មានសេចក្ដីសុខដូចគេ តែផ្ទុយទៅវិញ ក្រោយពីនាងសម្រាលបានកូន១នាក់ មិនទាន់បានប៉ុន្មានខែផង លោកប្ដីជាជនជាតិចិននោះបានរករឿងនាងឥតល្ហែ ដោយជួលផ្ទះសំណាក់ដេកស្នាក់នៅជាប្រចាំ។ នៅយប់កើតហេតុនេះដោយសារជម្លោះវាធ្ងន់ធ្ងរពេក នាងទ្រាំមិនបាន ក៏សម្រេចចិត្តបីកូនតូចនៅនឹងដៃ រួចប៉ុនប៉ងលោតសម្លាប់ខ្លួនពីលើផ្ទះសំណាក់ជាន់ទី១ តែបានប្រជាពលរដ្ឋ និងសមត្ថកិច្ចជួយឃាត់ទាន់ពេល។
ហេតុការណ៍នេះ បង្កឲ្យមានការភ្ញាក់ផ្អើល កាលពីយប់ថ្ងៃទី២៥ ខែកុម្ភៈ ឆ្នាំ២០១៩ ស្ថិតនៅតាមផ្លូវសហព័ន្ធរុស្ស៊ី មុខបុរីញ៉ូថោន ភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ។
ស្ត្រីនេះជាជនជាតិខ្មែរ មានកូនប្រុសតូចម្នាក់ នៅជាប់នឹងដៃ មានប្តីជាជនជាតិចិន ទៅជួលបន្ទប់ផ្ទះសំណាក់សុមនា ស្នាក់នៅជាប្រចាំ តែនាងសុំមិនប្រាប់ឈ្មោះនោះទេ។
ប្រជាពលរដ្ឋបានឲ្យដឹងថា មុនកើតហេតុ ប្តីជាជនជាតិចិនស្រវឹងស្រា បានរករឿងឈ្លោះប្រពន្ធទាំងគ្មានហេតុផល ដោយស្រែកឡូឡាសម្លុតស្ត្រីជាប្រពន្ធ និង ជេរ រហូតដល់ម្ចាស់ផ្ទះសំណាក់ទៅឃាត់បំបែកបុរសជាប្តីចេញពីនាង។ ដោយសារពេលនោះនាងជាប្រពន្ធខឹងខ្លាំងពេក និងតូចចិត្តប្ដីធ្វើបាបផងនោះ នាងបានបីកូនតូចឱបនឹងដៃប៉ុនប៉ងលោតសម្លាប់ខ្លួនពីលើផ្ទះសំណាក់នៅជាន់ទី១ បង្កឲ្យមានការភ្ញាក់ផ្អើលដល់ប្រជាពលរដ្ឋ សមត្ថកិច្ច នាំគ្នារកវិធីសាស្ត្រលួងលោមឃាត់បាននាងព្រមចុះមកវិញភ្លាមៗតាមសម្រួល។ ខណៈពេលដែលស្ដ្រីរូបនេះកំពុងប៉ុនប៉ងលោតសម្លាប់ខ្លួននោះប្ដីជនជាតិចិននោះមិននៅកន្លែងកើតហេតុទេ គឺបានបើកឡានចាកចេញទៅណាបាត់ហើយ។
សមត្ថកិច្ចនគរបាលប៉ុស្តិ៍ និងសមត្ថកិច្ចជំនាញអន្តរាគមន៍ខណ្ឌពោធិ៍សែនជ័យ បានណែនាំស្ត្រីខាងលើ កុំឲ្យគិតខ្លីចង់សម្លាប់ខ្លួន អាណិតកូនតូច និងឲ្យតាមរកប្តីដើម្បីមកដោះស្រាយបញ្ហាគ្នាទៅតាមសម្រួលកុំប្រើអំពើហិង្សាលើគ្នាឲ្យសោះ៕
Source: Kampuchea Thmey Daily
0 Comments