ភ្នំពេញ ៖ រ៉ឺម៉កលក់បាយឆា បានក្រឡាប់ផ្ងារជើង រថយន្តមួយគ្រឿងបានទទួលរងការខូចខាត និងរបងផ្ទះប្រជាពលរដ្ឋចំនួនពីរផ្ទាំង បានបាក់ផងដែរ ខណៈដែលជនជាតិចិនស្រវឹងធ្លាក់ភ្នែកបើករថយន្តទៅបុករះយ៉ាងពេញទំហឹងនោះ។
ហេតុការណ៍នេះ បានកើតឡើងកាលពីវេលាម៉ោង២និង១០នាទីរំលងអធ្រាត្រ ឈានចូលថ្ងៃទី២៦ ខែកុម្ភៈ ឆ្នាំ២០១៩ នៅខាងជើងស្ពានអាកាសស្ទឹងមានជ័យប្រមាណ២០០ម៉ែត្រ តាមបណ្ដោយផ្លូវ២៧១ ក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ។
បើតាមជនរងគ្រោះ ដែលជាម្ចាស់រទេះលក់មីឆា បាយឆា បានប្រាប់ឲ្យដឹងថា នៅពេលកើតហេតុ រថយន្តបង្កម៉ាក ហាយឡែនឌ័រ ពណ៌ទឹកប្រាក់ ពាក់ស្លាកលេខភ្នំពេញ 2AP-8199មួយគ្រឿង ដែលបើកបរដោយបុរសម្នាក់ជាជនជាតិចិន ព្រមទាំងប្រុសស្រី៣នាក់ទៀតរួមដំណើរជាមួយ បានបើកបរតាមបណ្ដោយផ្លូវ២៧១ ទិសដៅពីត្បូង មកជើង ក្នុងល្បឿនយ៉ាងលឿន ខណៈមកដល់កន្លែងកើតហេតុ ដែលជាចំណុចផ្លូវកោង មិនបន្ថយល្បឿននោះទេ ស្រាប់តែជ្រុលចង្កូតបុករទេះលក់មីឆាបាយឆា និងរ៉ឺម៉កម៉ូតូក្រឡាប់ទៅប៉ះនឹងរថយន្តលុចស៊ីសLX470 ចតនៅចិញ្ចើមផ្លូវ និងរបងផ្ទះប្រជាពលរដ្ឋបន្ថែម បណ្ដាលឲ្យរងការខូចខាត តែសំណាងល្អ ក្នុងអំឡុងពេលកើតហេតុ មនុស្សដែលនៅកន្លែងកើតហេតុ បានឃើញទិដ្ឋភាពមិនស្រួល ក៏បានរត់ចេញភ្លាមៗ ដោយមិនបង្កឲ្យអ្នកណាម្នាក់រងរបួសនោះឡើយ។
ក្រោយកើតហេតុ បុរសជនជាតិចិន ដែលបើករថយន្តបង្កហេតុ មិនព្រមចុះដោះស្រាយនោះទេ រហូតសមត្ថកិច្ចមូលដ្ឋាន និងនគរបាលជំនាញចរាចរណ៍ខណ្ឌទួលគោក ចុះមកដល់ ទើបព្រមចុះសម្របសម្រួលជាមួយភាគីរងគ្រោះ ដោយមានតំណាងជួយដោះស្រាយ ព្រមទាំងសងថ្លៃខូចខាត ទៅលើរទេះលក់មីឆា បាយឆា និងរ៉ឺម៉កម៉ូតូចំនួន៤ពាន់ដុល្លារ និងសងទៅលើរថយន្តលុចស៊ីសLX470 និងរបងផ្ទះពលរដ្ឋជាម្ចាស់តែមួយចំនួន ៤ពាន់ដុល្លារទៀត ដើម្បីបញ្ចប់រឿង នៅនឹងកន្លែងកើតហេតុតែម្ដង៕
Source: Kampuchea Thmey Daily
0 Comments