ប៉ៃលិន ៖ ជនសង្ស័យម្នាក់ ត្រូវកម្លាំងសមត្ថកិច្ចនគរបាលក្រុងប៉ៃលិន ចាប់ឃាត់ខ្លួន រួមនឹងថ្នាំញៀន៤កញ្ចប់ កាលពីវេលាម៉ោង១០និង៣០នាទីព្រឹក ថ្ងៃចន្ទ ៦រោច ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៥ ខែកុម្ភៈ ឆ្នាំ២០១៩ ស្ថិតនៅចំណុចតាបប៊ីយ៉ា ក្បែរស្ពានអូរតាវ៉ៅ ក្នុងភូមិកូនភ្នំ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។
ជនសង្ស័យ ដែលសមត្ថកិច្ចឃាត់ខ្លួន ឈ្មោះ ថេង ថារិទ្ធ ភេទប្រុស អាយុ៣០ឆ្នាំ ជនជាតិខ្មែរ មុខរបរមិនពិតប្រាកដ រស់ភូមិ/ឃុំ កើតហេតុខាងលើ ព្រមទាំងដកហូតបានវត្ថុតាង រួមមាន ម្សៅក្រាម ពណ៌សថ្លា ប្រភេទម៉ាទឹកកកចំនួន០៤កញ្ចប់ ដោយ០១កញ្ចប់ធំ និង ០៣កញ្ចប់តូច។
លោកវរសេនីយ៍ត្រី យ៉ែម សារិទ្ធ អធិការនគរបាលក្រុងប៉ៃលិនមានប្រសាសន៍ឲ្យដឹង ដោយយោងតាមសំដីរបស់ជនសង្ស័យថា ជនសង្ស័យខាងលើ ទើបតែរកស៊ីគ្រឿងញៀននេះ បានកន្លះខែប៉ុណ្ណោះ ដោយពីមុនជាអ្នកដឹកត្រីលក់។
លោកបានបន្តថា គ្រឿងញៀនដែលជនសង្ស័យយកមកជួញដូរនេះ បានទិញឈ្មោះម្នាក់ផ្សេងទៀត ក្នុងតម្លៃ១លានរៀល ហើយរូបគេ(ជនសង្ស័យ)លក់វិញ បានតម្លៃ១លាន៧សែនរៀល ប្រការដែលជនសង្ស័យរកស៊ីជួញដូរគ្រឿងនៅពេលនេះ ដោយសារតែជនសង្ស័យជំពាក់ប្រាក់គេច្រើន ទើបបែកគំនិតរកស៊ីមុខរបរនេះតែម្ដង។
បច្ចុប្បន្ន ជនសង្ស័យខាងលើ ត្រូវបានកម្លាំងសមត្ថកិច្ចជំនាញ នៃអធិការដ្ឋាននគរបាលក្រុងប៉ៃលិន រៀបចំ និងកសាងសំណុំរឿង បញ្ជូនបន្តទៅស្នងការនគរបាលខេត្តចាត់ការតាមនីតិវិធី៕
Source: Kampuchea Thmey Daily
0 Comments