ស្ទឹងត្រែង ៖ សត្វត្មាតចំនួនបីប្រភេទ កំពុងរស់នៅតំបន់ព្រៃអភិរក្សសៀមប៉ាងលិច និងសៀមប៉ាងកើត ត្រូវបានមន្ត្រីអង្គការអភិរក្ស សត្វស្លាបអន្តរជាតិប្រចាំនៅស្រុកសៀមប៉ាង ផ្តល់ចំណីបន្ថែមនៅថ្ងៃទី២៥ ខែកុម្ភៈ ដើម្បីថែរក្សាវាកុំឲ្យចាកចេញ ពីតំបន់ធ្លាប់រស់នៅទៅតំបន់ផ្សេងនាំឲ្យរងការបាញ់សម្លាប់ពីពពួកព្រានផ្សេងៗ។
លោក ទី ស្រុន ប្រធានប្រចាំតំបន់ នៃអង្គការជីវិតសត្វស្លាបអន្តរជាតិសៀមប៉ាងបានបញ្ជាក់ថា ការផ្តល់ចំណីនេះ ដើម្បីថែទាំសត្វត្មាត និងសត្វស្លាបផ្សេងៗទៀត ឲ្យគង់វង្សនៅក្នុងតំបន់អភិរក្ស ដែលក្រសួងបរិស្ថាន បានកំណត់រួចមកនេះ កុំឲ្យវាទៅរស់នៅតំបន់ព្រៃនៃទឹកដី ប្រទេសឡាវ ខ្លាចត្រូវគេសម្លាប់វា និងនាំឲ្យបាត់បង់សម្បត្តិធម្មជាតិរបស់យើង។
លោកបន្តថា នៅចន្លោះចាប់ពីថ្ងៃទៅ១០ ដល់ថ្ងៃទី២៥ជារៀងរាល់ខែ ក្រុមអភិរក្សសត្វត្មាត បានផ្តល់ចំណីជាគោ ឬក្របី បន្ថែម ឲ្យពួកវាក្នុងមួយខែ២ដង ដែលត្រូវចំណាយថវិកាជាង១.០០០ដុល្លារជាប្រចាំ ព្រោះបច្ចុប្បន្នពេលយើងដាក់ចំណីឲ្យម្តងៗ សង្កេតឃើញមានចន្លោះចាប់ពី៥០ក្បាល ទៅ៩០ក្បាលតែប៉ុណ្ណោះ។
លោក ស៊ីន ដាន មេឃុំថ្មកែវ ស្រុកសៀមប៉ាង ខេត្តស្ទឹងត្រែងបានបញ្ជាក់ថា ការអភិរក្សសត្វស្លាបនេះ បងប្អូនប្រជាពលរដ្ឋ បានភ្ញាក់រឭកចូលរួមច្រើន ព្រោះពួកគាត់បានចាត់ទុកថា ពពួកសត្វទាំងនេះ វាអាចបម្រើឲ្យវិស័យទេសចរណ៍ ដោយសារភ្ញៀវទេសចរមកលេងចង់មើលសត្វស្លាបប្រភេទធំៗបែបនេះ។
លោក ប៊ុន ឌីណា មន្ត្រីអង្គការជីវិតសត្វស្លាបអន្តរជាតិនេះដែរបញ្ជាក់ថា ប្រជាពលរដ្ឋនៅឃុំថ្មកែវនិងឃុំព្រែកមាស បានងាកមកធ្វើស្រូវត្រយ៉ងយក្ស ដែលអង្គការផ្តល់ពូជឲ្យបានស្ទើរគ្រប់ៗគ្នា ហើយ ព្រោះនៅពេលបានផលក្រុមអភិរក្សសត្វត្មាតប្រមូលទិញយកវិញ ក្នុងតម្លៃ១៣៥០រៀល នៅឆ្នាំ២០១៨ ហើយឆ្នាំ២០១៩ នឹងលើកទឹកចិត្តកសិករទិញរហូតដល់ទៅ១.៥០០រៀល ក្នុងមួយគីឡូក្រាម។
លោកថា នេះជាយន្តការមួយជំរុញឲ្យប្រជាពលរដ្ឋយើងបញ្ឈប់ការចូលព្រៃបរបាញ់សត្វ និងពឹងផ្អែកលើផលអនុផលព្រៃឈើទៀត។
សូមបញ្ជាក់ថា តំបន់អភិរក្សសត្វស្លាប់សៀមប៉ាងរស់នៅទាំងពីរនេះ មាន-សត្វត្រយ៉ងយក្ស- សត្វចំកំកស-សត្វត្រដក់តូច-និងត្រដក់ធំ-ផងដែរ៕
Source: Kampuchea Thmey Daily
0 Comments