ភ្នំពេញ ៖ ប្រជាពលរដ្ឋ ក៏ដូចជាអ្នកដំណើរជាច្រើន បានសំដែងការរិះគន់យ៉ាងខ្លាំង ទៅលើគណៈកម្មការគ្រប់គ្រងផ្សារ ហេង លី ក៏ដូចជាអាជ្ញាធរសង្កាត់ និងអាជ្ញាធរខណ្ឌទួលគោក ដែលបណ្ដែតបណ្ដោយឲ្យបងប្អូនអាជីវករលក់ដូររំលោភលើចិញ្ចើមផ្លូវមុខផ្សារនេះ យ៉ាងអនាធិបតេយ្យរកកន្លែងដើរមិនឃើញទេ។
បងប្អូនប្រជាពលរដ្ឋបានបន្តឲ្យដឹងទៀតថា កំណាត់ផ្លូវលេខ២៧១ ចាប់ពីស្តុបnokia ដល់ផ្លូវទេពផនក្នុងសង្កាត់ ទឹកល្អក់ទី៣ ឃើញថា ប្រជាពលរដ្ឋបានមករំលោភយកចិញ្ចើមផ្លូវស្ទើរទាំងស្រុង មិនឲ្យអ្នកដំណើរថ្មើរជើងដើរលើចិញ្ចើមផ្លូវនេះបានឡើយ។
ហេតុនេះហើយ បងប្អូនប្រជាពលរដ្ឋ សុំឲ្យអាជ្ញាធរខណ្ឌទួលគោក ចុះពិនិត្យ និងរៀបចំសណ្ដាប់ធ្នាប់លើផ្លូវនេះឲ្យបានល្អឡើងវិញផង ដើម្បីឲ្យប្រជាពលរដ្ឋ អាចធ្វើដំណើរដោយថ្មើរជើងបានងាយស្រួលឡើងវិញ។
គួរបញ្ជាក់ផងដែរថា កន្លងមកនេះ អាជ្ញាធររាជធានីភ្នំពេញ ក្រោមការដឹកនាំរបស់ លោក ឃួង ស្រេង អភិបាល តែងបានណែនាំដូចជា កោះប្រជុំជារឿយៗ ដើម្បីជំរុញអាជ្ញាធរខណ្ឌទាំង១២រៀបចំសណ្ដាប់ធ្នាប់ឲ្យបានល្អប្រសើរ ពិសេសកំណាត់ផ្លូវទាំង១១ នៅកណ្ដាលក្រុងតែម្ដង។ ប៉ុន្តែការណែនាំទាំងនេះហាក់ដូចជាមិនសូវមានប្រសិទ្ធភាពសោះ ដោយសារតែខណ្ឌមួយចំនួនបានអនុវត្តតាម តែខណ្ឌផ្សេងទៀតមិន ព្រមអនុវត្ត ដោយបណ្ដែតបណ្ដោយឲ្យមានការរំលោភបំពាននៅឡើយ ពិសេស គឺលើទីតាំងដែលមានខ្នងបង្អែកក្រាស់ស្រាប់តែម្ដង ដោយពួកគេហាក់ដូចជា មិនអើពើនឹងចំណាត់ការរបស់អាជ្ញាធររាជធានីភ្នំពេញឡើយ។
គេបានកត់សម្គាល់ឃើញហើយថា កន្លងមកនេះ អាជ្ញាធរខណ្ឌទួលគោក ដឹកនាំដោយ លោក ឯកឃុន ដឿន ជាអភិបាលខណ្ឌ គឺពិតជាបានដឹកនាំ និងណែនាំឲ្យមន្ត្រីរបស់ខ្លួនឲ្យរៀបចំសណ្ដាប់ធ្នាប់ជាច្រើនផ្លូវនៅក្នុងមូលដ្ឋានរបស់ខ្លួន។ ប៉ុន្តែមិនដឹងថាហេតុអ្វីបានជានៅលើកំណាត់ផ្លូវលេខ២៧១មុខផ្សារហេងលី នេះ បែរជាបណ្ដែតបណ្ដោយឲ្យបងប្អូនអាជីវកររំលោភយកធ្វើជាកម្មសិទ្ធិរបស់ខ្លួនយ៉ាងដូច្នេះឡើយ។
ដូច្នេះទេ ប្រជាពលរដ្ឋទាំងអស់ សូមឲ្យអាជ្ញាធរខណ្ឌទួលគោក មានវិធានការរៀបចំសណ្ដាប់ធ្នាប់នៅមុខផ្សារហេងលីនេះឲ្យបានល្អប្រសើរផង ឲ្យដូចពាក្យណែនាំរបស់ លោក ឯក ឃុន ដឿនថា ឲ្យមន្ត្រីទាំងអស់ ដាក់ខ្លួនដាក់កាយប្រឹងប្រែងធ្វើយ៉ាងណាដើម្បីដណ្ដើមឲ្យបានផ្ការំដួលបីទង៕
Source: Kampuchea Thmey Daily
0 Comments