កំពង់ឆ្នាំង ៖ សមត្ថកិច្ចនគរបាលសណ្ដាប់ធ្នាប់ក្រុង និងខេត្តកំពង់ឆ្នាំងនៅព្រឹកថ្ងៃទី១៣ ខែកុម្ភៈ បានសហការគ្នាចុះផ្សព្វផ្សាយឲ្យប្រជាពលរដ្ឋដែលមានលំនៅដ្ឋានតាមមាត់ច្រាំងទន្លេក្នុងភូមិចុងកោះអោយរើរុះផ្ទះសម្បែងរបស់ខ្លួនចេញឲ្យអស់ នៅមុនថ្ងៃ២៥ ខែកុម្ភៈនេះ តាមផែនការរបស់អាជ្ញាធរខេត្ត ដើម្បីរួមគ្នាប្រារព្ធធ្វើបុណ្យទន្លេនៅក្នុងក្រុងកំពង់ឆ្នាំង នៅថ្ងៃទី១៥ ខែមីនា ខាងមុខនេះ។
លោកហង្ស ប៊ុនហាក់ អធិការរងនគរបាលក្រុងកំពង់ឆ្នាំង ជាអ្នកដឹកនាំក្រុមការងារសមត្ថកិច្ចចម្រុះ បាននិយាយដឹងថា ៖ អនុវត្តតាមផែនការរបស់គណៈបញ្ជាការឯកភាពរដ្ឋបាលខេត្តកំពង់ឆ្នាំងបានកំណត់អោយអាជ្ញាធរក្រុង និងសមត្ថកិច្ច សហការគ្នាផ្សព្វផ្សាយឲ្យប្រជាពលរដ្ឋដែលមានផ្ទះនៅតាមច្រាំងទន្លេក្នុងភូមិចុងកោះ សង្កាត់ផ្សារឆ្នាំង ត្រូវរុះរើផ្ទះរបស់ខ្លួនឲ្យបានអស់នៅមុន ថ្ងៃទី២៥ ខែកុម្ភៈនេះ ព្រោះថា តាមផែនការបន្លាស់ទីផ្ទះនៅតាមច្រាំងទន្លេ ប្រជាពលរដ្ឋជាង២៥០គ្រួសារ សុទ្ធបានទទួលគោលនយោបាយដីធ្លីនៅជិតផ្សារកំពង់ឆ្នាំងថ្មីពីអាជ្ញាធរខេត្តរួចអស់ហើយ។
ករណីមានការរឹងរូសមិនអនុវត្តតាមផែនការនេះ សមត្ថកិច្ច និងអាជ្ញាធរ នឹងចាត់វិធានការរដ្ឋបាលប្រើប្រាស់កម្លាំងចម្រុះចុះរើផ្ទះសម្បែងទាំងអស់នោះចេញ ដោយមិនទទួលការខុសត្រូវលើការខូចខាតបាក់បែកឡើយ។ ដោយឡែកសំណង់តូចតាចនៅមុខវត្តយាយទេព ក៏ត្រូវអោយរុះរើចេញអោយអស់ផងដែរ។ ចំណែកផ្ទះស្នាក់នៅរបស់កម្មករកំពង់ផែនៅជិតកំពង់ផែចាស់ចុងកោះ មួយចំនួន ម្ចាស់គាត់បានស្ម័គ្រចិត្តរុះរើដោយខ្លួនឯងហើយ ដោយឡែកមួយចំនួនទៀតបានសន្យាថា នឹងរុះរើជាបន្ទាប់អោយបានមុនផែនការរបស់ខេត្ត។
អាជ្ញាធរខេត្តកំពង់ឆ្នាំង សូមអំពាវនាវដល់ប្រជាពលរដ្ឋមេត្តាចូលរួមអនុវត្តន៍ផែនការរៀបចំធ្វើបុណ្យទន្លេនៅក្នុងក្រុងកំពង់ឆ្នាំង ដែលនឹងធ្វើឡើងចាប់ពីថ្ងៃទី១៥ដល់១៧ ខែមីនា ឆ្នាំ២០១៩ ខាងមុខនេះអោយទទួលបានជោគជ័យ ដែលក្នុងពិធីបុណ្យទន្លេនេះ សម្តេច ហ៊ុន សែន និងសម្តេចកត្តិព្រឹទ្ធបណ្ឌិតប៊ុន រ៉ានី ហ៊ុនសែន នឹងអញ្ជើញចូលរួមជាអធិបតីភាពផងដែរ។
នៅក្នុងពិធីបុណ្យនេះដែរ ប្រជាពលរដ្ឋនៅក្នុងខេត្តកំពង់ឆ្នាំងសង្ឃឹមថា នឹងទទួលបាននូវចំណងដៃអ្វីមួយពីសម្តេច ហើយអ្វីដែលប្រជាពលរដ្ឋក្នុងខេត្តកំពង់ឆ្នាំងចង់បានជាងគេនោះ គឺស្ពានឆ្លងទន្លេផ្សារក្រោម ឆ្ពោះទៅកាន់ស្រុកកំពង់លែង ដែលអាចឆ្លងទៅកាត់ខេត្តកំពង់ធំ និងខេត្តសៀមរាប បានឆាប់រហ័ស ចំណេញពេលវេលា និងអាចលើកស្ទួយជីវភាពប្រជាពលរដ្ឋកាន់តែប្រសើរឡើង៕
Source: Kampuchea Thmey Daily
0 Comments