ឧត្តរមានជ័យ ៖ លោកឧត្ដមសេនីយ៍ត្រី ប៉ុក សុផល មេបញ្ជាការវរការពារព្រំដែនលេខ៤០២ រងការចោទប្រកាន់ពីប្រជាពលរដ្ឋចំនួន១៤គ្រួសារថា បានរំលោភយកដីធ្លីរបស់ពួកគាត់ទាំងភ្នែកស្រស់ លើដីទំហំជាង៤០ហិកតា ស្ថិតនៅភូមិចំការចេក សង្កាត់អូរស្មាច់ ក្រុងសំរោង ខេត្តឧត្តរមានជ័យ។
លោក ប៊ូ ប៊ុនថា តំណាងប្រជាពលរដ្ឋ១៤គ្រួសារ បានឲ្យដឹងថា ពួកគាត់ជាប្រជាពលរដ្ឋទាំង១៤គ្រួសារបានបានអះអាងថា បានកាន់កាប់ដីធ្លី និងអាស្រ័យផលលើទីតាំងដីទំហំចំនួន៤៣,៥ហិកតាចាប់ពីឆ្នាំ២០០៤.២០០៥មកម្ល៉េះ(ពោលគឺមានរយៈពេលជាង១០ឆ្នាំ) លុះមកដល់ពាក់កណ្តាលខែធ្នូឆ្នាំ២០១៨ថ្មីៗនេះ លោក ប៉ុក សុផល ដែលទើបនឹងផ្លាស់មកកាន់តំណែងជាមេបញ្ជាការវរៈការពារព្រំដែនលេខ៤០២(ថ្មី)បាននាំកម្លាំង ដើរសម្លុតគំរាមកំហែង និងបំផ្លិចបំផ្លាញទ្រព្យសម្បត្តិ និងរំលោភយកដីធ្លីរបស់ពួកគាត់។
លោកបន្តថា ជាក់ស្ដែងនូវថ្ងៃទី១៨ ខែធ្នូ ឆ្នាំ២០១៨កន្លងមកនេះ លោកមេបញ្ជាការរូបនេះ បានចេញបញ្ជាដល់កម្លាំងចំនួន៦នាក់ ប្រដាប់ដោយអាវុធវែងខ្លីគ្រប់ដៃ បានយកគ្រឿងចក្រ(អេស្ការវ៉ូទ័រ)មួយគ្រឿងចូលទៅឈូសឆាយទន្ទ្រានលើដីពួកគាត់ ថាធ្វើផ្លូវសម្រាប់កងទ័ព។
លោក អ៊ុក ប៊ុនហេង ចៅសង្កាត់អូរស្មាច់ បានឲ្យដឹងថា ពលរដ្ឋចំនួន១៤គ្រួសារ លោកទទួលស្គាល់នូវលិខិតបញ្ជាក់កាន់កាប់ដីធ្លីជាកម្មសិទ្ធិរបស់ពួកគាត់ពិតជាត្រឹមត្រូវ។
ទាក់ទងនឹងការរិះគន់ពីប្រជាពលរដ្ឋដែលមានទំនាស់ដីធ្លីទាំងចំនួន១៤គ្រួសារនេះ លោក ប៉ុក សុផល មេបញ្ជាការវរៈការពារព្រំដែនលេខ៤០២ បានឲ្យដឹងថា គ្រឿងចក្រទៅឈូសឆាយនោះ គឺធ្វើផ្លូវសម្រាប់កងទ័ព តែមិនបានហ៊ុមព័ទ្ធយកដីពលរដ្ឋនោះទេ។
តំណាងពលរដ្ឋខាងលើ ការលើកឡើងខាងភាគីកងទ័ពនោះ គ្រាន់តែជាលេសដើម្បីរំលោភយកដីធ្លីរបស់ពួកគាត់ទៅធ្វើជាកម្មសិទ្ធិផ្ទាល់ខ្លួន និងបម្រុងលក់ឲ្យឈ្មួញតែប៉ុណ្ណោះ ដែលជាហេតុធ្វើឲ្យប៉ះពាល់ដល់ផលប្រយោជន៍ និងជីវភាពរស់នៅប្រចាំថ្ងៃរបស់ពួកគាត់យ៉ាងធ្ងន់ធ្ងរ និងសុំបញ្ឈប់សកម្មភាពគំរាមកំហែងទៅលើពួកគាត់៕
Source: Kampuchea Thmey Daily
0 Comments