ភ្នំពេញ ៖ ក្នុងគោលបំណងពង្រឹងពង្រីកចំណងមិត្តភាព សាមគ្គីភាព និងកិច្ចសហប្រតិបត្តិការរវាងប្រទេសទាំងពីរ ពិសេសរវាងរដ្ឋសភាប្រទេសទាំងពីរឲ្យកាន់តែរឹងមាំថែមទៀត លោកស្រី ឃួន សុដារី អនុប្រធានទី២ រដ្ឋសភា នឹងដឹកនាំគណៈប្រតិភូជាន់ខ្ពស់រដ្ឋសភា នៃព្រះរាជាណាចក្រកម្ពុជា ទៅបំពេញទស្សនកិច្ចជាផ្លូវការ និងមិត្តភាពនៅទីក្រុងហាណូយ នៃសាធារណរដ្ឋសង្គមនិយមវៀតណាម ចាប់ពីថ្ងៃទី២១ ដល់ ថ្ងៃទី២៥ ខែមីនា ឆ្នាំ២០១៩។
សេចក្ដីជូនដំណឹងរបស់អគ្គលេខាធិការដ្ឋានរដ្ឋសភាបានឲ្យដឹងដែរថា ដំណើរទស្សនកិច្ចនេះគណៈប្រតិភូជាន់ខ្ពស់រដ្ឋសភា នៃព្រះរាជាណាចក្រកម្ពុជា គ្រោងនឹងចូលជួបសម្ដែងការគួរសមជាមួយថ្នាក់ដឹកនាំសំខាន់ៗ នៃសាធារណរដ្ឋសង្គមនិយមវៀតណាម និងមានជំនួបទ្វេភាគីរវាងរដ្ឋសភាប្រទេសទាំងពីរ។
ក្រៅពីនេះ គណៈប្រតិភូជាន់ខ្ពស់រដ្ឋសភា នៃព្រះរាជាណាចក្រកម្ពុជា ក៏នឹងអញ្ជើញទៅទស្សនាតំបន់កសិឧស្សាហកម្មមួយនៅទីក្រុងហាណូយ ឬ ខេត្តជិតខាង និងទស្សនាតំបន់ប្រវត្តិសាស្ត្រ នៅខេត្ត និញ ប៊ិញ (Ninh Binh) វៀតណាមផងដែរ។
សូមបញ្ជាក់ថា ដំណើរទស្សនកិច្ចនេះគឺធ្វើឡើងតបតាមការអញ្ជើញរបស់លោកស្រី Tong Thi Phong អនុប្រធានរដ្ឋសភា នៃសាធារណរដ្ឋសង្គមនិយមវៀតណាមផងដែរ៕
Source: Kampuchea Thmey Daily
0 Comments