ប្រើត្រសេះ វាយរបួសធ្ងន់ម្នាក់ ព្រោះខឹងអួតតែពីរឿងវាយកែងដូចកីឡាប្រដាល់ វង្ស ណយ

ឧត្តរមានជ័យ ៖ នៅថ្ងៃទី០៩ ខែមីនា ឆ្នាំ២០១៩ វេលាម៉ោង១២និង១៥នាទី នៅចំណុចផ្ទះថ្ម កំពុងសាងសង់របស់ឈ្មោះ សារៀម ស្ថិតក្នុងភូមិគោកច្រេស សង្កាត់-ក្រុងសំរោង មានកើត ករណីហិង្សាដោយចេតនា មានស្ថានទម្ងន់ទោស ដែលបង្កឡើងដោយជនសង្ស័យ ឈ្មោះ សំ រដ្ឋា ភេទប្រុស អាយុ២៥ឆ្នាំ រស់នៅភូមិ-សង្កាត់-ក្រុងសំរោង មុខរបរ កម្មករសំណង់ បានយកត្រសេះ វាយទៅលើឈ្មោះ ធី វុធ ភេទប្រុស អាយុ៣០ឆ្នាំ រស់នៅភូមិគោកច្រេស សង្កាត់-ក្រុងសំរោង មុខរបរកម្មករសំណង់ ត្រូវចំចង្កេះខាងឆ្វេង និង ក្បាលផ្នែកខាងក្រោយ បណ្ដាលឲ្យរងរបួសធ្ងន់។ មូលហេតុ ផឹកស៊ីទាស់សំដីគ្នា។

សមត្ថកិច្ចបានឲ្យដឹងថា តាមការសាកសួរបឋមលើ ជនសង្ស័យខាងលើ បានសារភាពថា រាល់ថ្ងៃរូបខ្លួនធ្វើការជាជាងសំណង់ជាមួយជនរងគ្រោះ លុះនៅថ្ងៃទី០៨ ខែមីនា ឆ្នាំ២០១៩ វេលាម៉ោងប្រហែល ១៩និង០០នាទី រូបខ្លួន និងជនរងគ្រោះបានផឹកស្រាជាមួយគ្នា។

សមត្ថកិច្ចបានបន្តថា ក្នុងពេលនោះជនរងគ្រោះ បាននិយាយអួតតែពីរឿងវាយកែងដូចកីឡាប្រដាល់ ឈ្មោះ វង្ស ណយ ហើយក៏បានទាស់សំដីគ្នា ដោយជនសង្ស័យបាននិយាយថា ខ្ញុំមិនចេះវាយកែងទេ ចេះតែប្រើត្រសេះ។

សមត្ថកិច្ចបានបន្តឲ្យដឹងទៀតថា បន្ទាប់មកក៏ឈប់ផឹក ហើយជនសង្ស័យ បានឡើងទៅដេកលើគ្រែក្បែរនោះ ចំណែកជនរងគ្រោះនៅផឹកស្រាបន្តជាមួយ ឈ្មោះ រ៉ើន រស់នៅភូមិគោកច្រេស (ជាកម្មករសំណង់ជាមួយគ្នា) ហើយបាននិយាយដៀមដាមមកលើជនសង្ស័យទៀត។ ពេលនោះនៅវេលាម៉ោងប្រហែល០០និង១០នាទី ឈានចូល ថ្ងៃទី០៩ ខែមីនា ឆ្នាំ២០១៩ ជនសង្ស័យក៏ដើរចេញក្នុងបំណងទៅផ្ទះនៅភូមិសំរោងវិញ តែពេលដើរចេញបានប្រហែលជា២០០ម៉ែត្រ ដោយអន់ចិត្ត និងខឹងជនរងគ្រោះ រូបខ្លួនក៏ដើរត្រឡប់មកវិញ ហើយបានទាញយកត្រសេះនៅលើគំនរដែកក្បែរកន្លែងជនរងគ្រោះ អង្គុយ ក៏វាយទៅលើត្រូវចំចង្កេះខាងឆ្វេង។ ភ្លាមនោះ ជនរងគ្រោះ ក៏ស្ទុះរត់ទៅចម្ការដំឡូងខាងកើតផ្ទះ ជនសង្ស័យក៏រត់ដេញតាម ហើយបានលើកត្រសេះបម្រុងវាយទៀត ចៃដន្យផ្លែត្រសេះរបូតពីដងខ្ទាតត្រូវចំក្បាលរបស់ជនរងគ្រោះ។ ជនសង្ស័យ បានឃើញសភាពមិនស្រួលក៏បោះដងត្រសេះចោល ដើរចេញពីនោះត្រឡប់ទៅផ្ទះតាមផ្លូវជាតិលេខ៦៨និញ។ ពេលមកដល់ចំណុចមុខផ្ទះលក់ត្រាក់ទ័ររបស់ ឈ្មោះ ម៉ៃ សត់ ក៏ត្រូវសមត្ថកិច្ចឃាត់ខ្លួនតែម្តង យកមកសាកសួរនៅអធិការដ្ឋាននគរបាលក្រុងសំរោង។

បច្ចុប្បន្ន ជនសង្ស័យ ឈ្មោះ សំ រដ្ឋា ត្រូវបានឃាត់ខ្លួននៅអធិការដ្ឋាននគរក្រុងសំរោង ដើម្បីសួរនាំ និងកសាងសំណុំរឿងតាមនីតិវិធី៕