កណ្តាល ៖ ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋ កិច្ច និងហិរញ្ញវត្ថុ អមដំណើរ ដោយ លោកបណ្ឌិត ម៉ៅ ភិរុណ អភិបាល នៃគណៈអភិបាលខេត្តកណ្តាល កាលពីថ្ងៃទី៦ ខែមីនា ឆ្នាំ២០១៩ បានអញ្ជើញចុះសួរសុខទុក្ខដល់មន្ត្រីគយ និងរដ្ឋាករ ដែលកំពុងឈរជើងនៅច្រកព្រំដែនជាប់នឹងប្រទេសវៀតណាម ក្នុងភូមិសាស្ត្រឃុំជ្រៃធំ ស្រុកកោះធំ ខេត្តកណ្តាល ព្រមទាំងបានពិនិត្យអំពីស្ថានភាពនៃការចរាចរណ៍ទំនិញតាមច្រក មួយនេះផងដែរ។
ក្នុងឱកាសនោះ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានជំរុញដល់មន្ត្រី គយដែលប្រចាំការនៅទីនោះទាំងអស់ ត្រូវទប់ស្កាត់ឲ្យខាងតែបាននូវការរត់ពន្ធខុសច្បាប់ ដែលជាហេតុធ្វើឲ្យបាត់ចំណូល។
ឯកឧត្តមបានលើកឡើងផងដែរថា កន្លងទៅមន្ត្រីគយរបស់យើងនៅតាមច្រកព្រំដែនទាំងអស់ទូទាំងប្រទេស អនុវត្តការងារបានល្អប្រសើរហើយ ដែលធ្វើឲ្យចំណូលបានមកពីពន្ធគយសម្រាប់ឆ្នាំ២០១៨កន្លងទៅមានប្រមាណជាង២.៥០០លានដុល្លារអាមេរិក កើនឡើងជាង ៣២% ធៀបនឹងឆ្នាំ២០១៧ ដែលលទ្ធផល នៃចំណូលនេះត្រូវប្រមាណ ជា ១២១,៤% នៃផែនការឆ្នាំ ដែលកំណត់ដោយច្បាប់ស្តីពីហិរញ្ញវត្ថុសម្រាប់ការគ្រប់គ្រងប្រចាំ ឆ្នាំ២០១៨។
ឯកឧត្ដមឧបនាយករដ្ឋមន្ត្រីបានគូសបញ្ជាក់ថា ប្រទេសណា ក៏ដូចប្រទេសណាដែរ ការគ្រប់គ្រងបាននូវចំណូលពន្ធ គឺជារឿងសំខាន់ ដោយថវិកាដែលយើងទទួលបានពីការបង់ពន្ធនេះត្រូវយកទៅចាក់បញ្ចូលទៅក្នុងថវិកាជាតិ ហើយត្រូវយកទៅប្រើប្រាស់ក្នុងការចំណាយផ្សេងៗ មានដូចជា បើកបៀវត្សរ៍ជូនអ្នករាជការ និងការចំណាយទៅលើការកសាងហេដ្ឋារចនាសម្ព័ន្ធចាំបាច់នានាសំដៅដល់ការអភិវឌ្ឍប្រទេសជាតិ។
ក្នុងឱកាសនោះដែរ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោកបណ្ឌិត ម៉ៅ ភិរុណ អភិបាល នៃគណៈអភិបាលខេត្តកណ្តាល បានថ្លែងអំណរគុណ និងលើកទឹកចិត្តដល់មន្ត្រីគយ ក៏ដូចជាកម្លាំងពាក់ព័ន្ធដទៃទៀត ឲ្យខិតខំបំពេញតួនាទី ភារកិច្ចរបស់ខ្លួនប្រកបដោយភាពស្មោះត្រង់ និងភាពសកម្មក្នុងនាមខ្លួនជាមន្ត្រីរាជការសាធារណៈ ដែលជាអ្នកធ្វើការបម្រើប្រទេសជាតិ៕
Source: Kampuchea Thmey Daily
0 Comments