ប្រដាល់ ៖ អ្នកប្រដាល់ជើងចាស់របស់កម្ពុជា គឺចាន់ ប៊ុនលាភ ក្លិបនិរោធមានជ័យ ដែលជួបប្រកួតជាមួយអ្នកប្រដាល់ថៃកូលាប ដាំ ប្រាន២៦(Kolabdam Phran26 ) ក្នុងព្រឹត្តិការណ៍ប្រដាល់ជើងឯកគូបូតា នៅលើសង្វៀនបាយ័នស្ទឹងមានជ័យ កាលពីយប់ថ្ងៃសៅរ៍ ទី០៨ ខែមីនា ឆ្នាំ២០១៩នោះ បានវាយចាញ់ កូលាប ដាំ ដោយពិន្ទុ។
អ្នកប្រដាល់ជើងចាស់ ចាន់ ប៊ុនលាភ ក្លិបនិរោធមានជ័យ ត្រូវគេអោយជំនួសផល សោភ័ណ្ឌ ដែលមានបញ្ហាសុខភាពមិនអាចឡើងប្រកួតបាននោះ។ ក្នុងការប្រកួតគ្នា៥ទឹក ចាន់ ប៊ុនលាភ បានចាញ់ប្រៀបកូលាប ដាំ សឹងតែគ្រប់ទឹក។
អ្នកប្រដាល់ថៃនេះ ធ្លាប់មកប្រកួតនៅស្រុកខ្មែរច្រើនលើកហើយកន្លងមក។ កូលាប ដាំ ប្រាន២៦ គេធ្លាប់មកស្រុកខ្មែរច្រើនលើកហើយកន្លងមក តែមិនដែលប៉ះប្រកួតជាមួយចាន់ ប៊ុនលាភ ទេ។ អ្នកប្រដាល់ថៃនេះ កាលពីបីឆ្នាំមុន គេធ្លាប់ផ្ដួលអ្នកប្រដាល់ជើងខ្លាំងរបស់កម្ពុជាបីរូប ដែលមកលើកទី១ គេបានវាយឈ្នះ ផាន់ គ្រាន់ ដោយពិន្ទុ(២៤មេសា២០១៦) លើកទី២ បានវាយឈ្នះ សេក គឹមរួន អ្នកប្រដាល់ក្លិបអង្គរមានជ័យដោយពិន្ទុ(២៤កក្កដា២០១៦ ) លើកទី៣ ថ្ងៃទី០៩ ខែតុលា ឆ្នាំ២០១៦ គេបានវាយឈ្នះ សូត្រ ប៊ុនធី ជើងខ្លាំងក្លិបបក្សីស្លាបដែកដោយពិន្ទុ និងលើកទី៤ថ្មីៗកន្លងទៅនេះ គេបានវាយឈ្នះ សេង ស្រឿន ក្លិបមហិទ្ធរិទ្ធមាសរថ្ងក ខេត្តស្វាយរៀង ក្នុងទឹកទី៤ទៀត ហើយក៏ធ្លាប់ចាញ់ ផល សោភ័ណ្ឌ ម្តងដែរ។
ចំពោះ អ្នកប្រដាល់ជើងខ្លាំងស្រករក្រោយ រិទ្ធ ភូលូ ក្លិបអាណាចក្រគុនខ្មែរ បានផ្ដួលអ្នកប្រដាល់ថៃជើងខ្លាំងឈ្មោះ ហ្វា នីមិត្ត ប្រាន២៦ (Fa Nimith Phran26) ក្នុងទឹកទី៤។ ពួកគេទាំងពីរប្រកួតគ្នាក្នុងទម្ងន់៦៣,៥០០គីឡូក្រាម។
ស្ថានភាព ការប្រកួត រិទ្ធ ភូលូ បានដេញវាយហ្វា នីមិត្ត ជានិច្ច តាំងពីទឹកទី១ដល់ទឹកទី៣ តែពុំអាចផ្តួលហ្វា នីមិត្ត បាន។ ទើបតែមកដល់ដើមទឹកទី៤ រិទ្ធ ភូលូ គេធ្វើបានយ៉ាងល្អ ដោយប្រើកណ្តាប់ដៃដាល់ចំថ្គាមហ្វា នីមិត្ត ធ្វើឲ្យអ្នកប្រដាល់ថៃរូបនេះ ដួលសន្លប់លែងក្រោកតែម្តង។
ដោយឡែក ការប្រកួតរវាងអ្នកប្រដាល់រួមជាតិវិញ មាឃ វណ្ណារ៉ា អ្នកប្រដាល់ក្លិបរាជសីហ៍ខេត្តរតនគិរី បានប្រកួតឈ្នះ ចាន់ រក្សា អ្នកប្រដាល់ក្លិបអេភូថងកីឡាដោយពិន្ទុ បន្ទាប់ពីវាយគ្នា៥ទឹកពេញនោះ។ ចំណែក ម៉ិល សារុន អ្នកប្រដាល់ក្លិបអាណាចក្រគុនខ្មែរ បានវាយចាញ់ អៀប លីឆា អ្នកប្រដាល់ក្លិបតាឯកដំបងដែកមានរិទ្ធខេត្តព្រៃវែង ដោយពិន្ទុ។ ម៉ិល សារុន ត្រូវអាជ្ញាកណ្ដាលរាប់៨ចំនួនពីរដងក្នុងទឹកទី១ ប៉ុន្តែគេអាចតស៊ូជាមួយ លីឆា រហូតដល់ចប់ទឹក៥ និងចាញ់ត្រឹមពិន្ទុប៉ុណ្ណោះ៕
Source: Kampuchea Thmey Daily
0 Comments