កណ្តាល ៖ ឡានវីហ្គោ ព្រលះជាមួយឡានសាំយ៉ុង លាន់សូរឆាំង លើបណ្ដោយផ្លូវជាតិលេខ១បណ្តាលឲ្យមនុស្ស២នាក់ រងរបួសស្រាល។ ចំណែករថយន្ត០២គ្រឿង រងខូចខាតយ៉ាងដំណំ។
ករណីគ្រោះថ្នាក់ចរាចរណ៍នេះ កើតឡើងថ្ងៃទី១១ ខែមីនា ឆ្នាំ២០១៩ វេលាម៉ោង០១និង០៥នាទីយប់ ចំណុចលើផ្លូវជាតិលេខ១ ក្នុងចន្លោះគីឡូម៉ែត្រលេខ១៩-២០ ភូមិគគីរ ឃុំគគីរ ស្រុកកៀនស្វាយ ខេត្តកណ្តាល។
សាក្សីកន្លែងកើតហេតុបានឲ្យដឹងថា មុនពេលកើតហេតុ គេឃើញរថយន្ត០១គ្រឿង ម៉ាក Vigo ពណ៌ទឹកប្រាក់ ពាក់ស្លាក លេខ រដ្ឋ.17.2 .0649 អ្នកបើកបរ មិនស្គាល់អត្តសញ្ញាណ ទិសដៅពីកើតទៅលិច បានបុកជាមួយរថយន្តម៉ាកសាំយ៉ុង ពណ៌ទឹកប្រាក់ ពាក់ស្លាកលេខ ព្រះសីហនុ 2A.5561ដែលមានទិសដៅផ្ទុយ (ទិសដៅពីលិចទៅកើតលាន់សូរឆាំង បណ្ដាលឲ្យអ្នកបើកបរ ឈ្មោះ ឯក ខំ ភេទប្រុស អាយុ៤១ឆ្នាំ(ខ្មែរ) មានទីលំនៅ ភូមិវាលរបង ឃុំ អង្គរអង្គ ស្រុកពាមជរ៍ ខេត្តព្រៃវែង (របួសស្រាល) អ្នករួមដំណើរ ឈ្មោះ ជិន ចាន់ធូ ភេទស្រី អាយុ៣៩ឆ្នាំ(ខ្មែរ) មានទីលំនៅភូមិ/ឃុំជាមួយគ្នា (ត្រូវជាប្រពន្ធ) របួសស្រាល ខូចខាតរថយន្ត ចំនួន០២គ្រឿងយ៉ាងដំណំ។ ក្រោយកើតហេតុរួច សមត្ថកិច្ចចុះទៅដល់កន្លែងកើតហេតុ ធ្វើការវាស់វែងតាមនីតិវិធីច្បាប់ចរាចរណ៍ រួចយករថយន្តទាំង០២គ្រឿង មករក្សាទុក នៅអធិការដ្ឋាននគរបាលស្រុកកៀនស្វាយ រង់ចាំការដោះស្រាយគ្នាតាមច្បាប់៕
Source: Kampuchea Thmey Daily
0 Comments