ភ្នំពេញ ៖ គិតត្រឹមថ្ងៃអាទិត្យ ទី១០មីនានេះ ដំណើរការធ្វើជំរឿនទូទៅប្រជាពលរដ្ឋកម្ពុជា បានប្រព្រឹត្តទៅអស់រយៈពេល៨ថ្ងៃ ហើយ គិតចាប់ពីថ្ងៃទី៣មីនា និងបន្តដល់ថ្ងៃទី១៣ ខែមីនា ឆ្នាំ២០១៩ទៅតាមការគ្រោងទុក ដោយមន្ត្រីជំរឿនបានចុះទៅធ្វើសម្ភាសន៍ដោយផ្ទាល់ ជាមួយប្រជាពលរដ្ឋតាមខ្នងផ្ទះ,តាមទីសាធារណៈ,អង្គភាពស្ថាប័ន,គ្រឹះស្ថាននានា ដែលមាននៅកម្ពុជា ដើម្បីទទួលបានទិន្នន័យប្រជាសាស្ត្រជាក់លាក់ សម្រាប់ប្រើប្រាស់រៀបចំផែនការគោលនយោបាយឲ្យបានត្រឹមត្រូវក្នុងការអភិវឌ្ឍន៍ប្រទេសជាតិ។
នៅព្រឹកថ្ងៃអាទិត្យនេះដែរ ក្រុមមន្ត្រីជំរឿនរដ្ឋបាលរាជធានីភ្នំពេញ ដឹកនាំដោយ លោក នួន ផារត្ន័ អភិបាលរងរាជធានីភ្នំពេញ បានចុះទៅធ្វើជំរឿនដល់គេហដ្ឋាន សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
សម្តេចក្រឡាហោម បានឆ្លើយទៅនឹងសំណួរជាច្រើនទៅមន្ត្រីជំរឿនដែលចង់បានពីគោលការណ៍មួយចំនួន ពាក់ព័ន្ធទៅនឹងការធ្វើជំរឿនប្រជាជន ជាពិសេសពាក់ព័ន្ធនឹងស្ថានភាពគ្រួសារ និងជីវភាពប្រចាំថ្ងៃ។
ជាមួយគ្នានេះដែរ សម្ដេចក្រឡាហោម ស ខេង ក៏បានកោតសរសើរដល់អាជ្ញាធររាជធានីភ្នំពេញ ដែលបានយកចិត្តទុកដាក់ក្នុងការអភិវឌ្ឍន៍រាជធានីភ្នំពេញឲ្យមានការរីកចម្រើន។
ពាក់ព័ន្ធនឹងការងារជំរឿននេះដែរ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអំពាវនាវដល់បងប្អូនប្រជាពលរដ្ឋ សូមចូលរួម និងផ្តល់កិច្ចសហការជាមួយមន្ត្រីជំរឿនឲ្យបានល្អប្រសើរ និងទទួល បានលទ្ធល្អ តាមការគ្រោងទុករបស់រាជរដ្ឋាភិបាល៕
Source: Kampuchea Thmey Daily
0 Comments