ភ្នំពេញ ៖ រាជរដ្ឋាភិបាល បានអនុវត្តកម្មវិធីផ្តល់ប្រាក់ឧបត្ថម្ភប្រមាណជិត ៦លាន ៦សែនដុល្លារអាមេរិកដល់កម្មការិនីសម្រាលកូនចំនួន ៦៥.០៥៤នាក់ ដែលមានកូនចំនួន ៦៥.៥៣៤នាក់ក្នុងនោះកូនភ្លោះ២ចំនួន ៩៤០នាក់ និងកូនភ្លោះ៣ ចំនួន ១៥ នាក់នៅឆ្នាំ២០១៨កន្លងទៅនេះ។
លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈបានថ្លែងក្នុងពិធីបើកសន្និបាតបូកសរុបលទ្ធផលការងារឆ្នាំ២០១៨ និងលើកទិសដៅការងារឆ្នាំ២០១៩ និងការប្រកាសដាក់ឲ្យអនុវត្តផែនការយុទ្ធសាស្ត្រអភិវឌ្ឍន៍វិស័យការងារ និងបណ្ដុះបណ្ដាលវិជ្ជាជីវៈ ២០១៩ ២០២៣ ឲ្យដឹងថា ថវិកាទាំងនោះចំណាយទៅលើការឧបត្ថម្ភដល់កម្មការិនីក្រោយពេលសម្រាលកូន ដោយ ផ្តល់ជូនកូន ១នាក់ ថវិកា ៤០ម៉ឺនរៀល, កូន២នាក់ ៨០ម៉ឺនរៀល និងកូន៣នាក់ ១,២លានរៀល ព្រមទាំងទទួលបានថវិកាបន្ថែមចំនួន ៥លានរៀល ពី សម្ដេចតេជោ និង សម្តេចកិត្តិព្រឹទ្ធបណ្ឌិត ផ្ទាល់។
ក្រៅពីនេះ កម្មការិនី ក៏ទទួលបានប្រាក់ឈ្នួល ១២០ភាគរយ និងឈប់សម្រាករយៈពេល៣ខែ ក្នុងពេលសម្រាលកូន បន្តជំរុញដល់ម្ចាស់សហគ្រាស គ្រឹះស្ថាននានា អនុញ្ញាតឲ្យបងប្អូនកម្មការិនីមានផ្ទៃពោះ ចាប់ពី៣ខែឡើង ចេញមុនម៉ោងយ៉ាងតិច ១៥នាទី និងអនុញ្ញាតឲ្យបងប្អូនកម្មករនិយោជិតជាស្ត្រីខ្មែរឥស្លាម អាចប្រើប្រាស់សម្លៀកបំពាក់តាមប្រពៃណីឥស្លាម។
បានជំរុញគ្រប់រោងចក្រត្រូវរៀបចំបន្ទប់បំបៅកូន សម្រាប់កម្មការីនីដែលមានកូនក្រោមអាយុ ១២ខែ និងត្រូវមានទារកដ្ឋានសម្រាប់កម្មការិនីដែលមានកូនអាយុលើស១៨ខែ។ គ្រប់តំបន់សេដ្ឋកិច្ចពិសេស ឬសួនឧស្សាហកម្មត្រូវរៀបចំឲ្យមានទារកដ្ឋានមួយក្នុងតំបន់របស់ខ្លួន។
ជាមួយគ្នានេះដែរ បានដាក់ចេញវិធានការដោះស្រាយទប់ស្កាត់ករណីដួលសន្លប់ ដោយតម្រូវឲ្យគ្រប់រោងចក្រសហគ្រាសទាំងអស់ ពិនិត្យលក្ខណៈបច្ចេកទេស និង ស្ថានភាពជុំវិញរោងចក្រឲ្យមានសុវត្ថិភាពមុនពេលចូលធ្វើការ។
ដើម្បីលើកកម្ពស់ជីវភាពរស់នៅរបស់កម្មករនិយោជិតលោករដ្ឋមន្ត្រីបានបញ្ជាក់ថា រាជរដ្ឋាភិបាលក៏បានដំឡើងប្រាក់ឈ្នួលអប្បបរមាដល់កម្មករនិយោជិតផ្នែកវាយ-នភណ្ឌ កាត់ដេរ និងផលិតស្បែកជើង ពី ១៧០ដុល្លារអាមេរិក ដល់ ១៨២ ដុល្លារអាមេរិកក្នុងមួយខែ សម្រាប់ឆ្នាំ២០១៩ បូករួមប្រាក់អត្ថប្រយោជន៍ផ្សេងៗ កម្មករនិយោជិតម្នាក់ៗអាចទទួលបានប្រាក់ឈ្នួលចាប់ពី ១៩៩ដុល្លារអាមេរិក ដល់ ២១០ដុល្លារអាមេរិក ក្នុងមួយខែ។
ទន្ទឹមនឹងនេះ ក្រសួង ក៏បានរៀបចំច្បាប់ស្តីពីប្រាក់ ឈ្នួលអប្បបរមា ក្នុងបរិបទដែលប្រទេសក្នុងតំបន់កំពុងមានការប្រកួតប្រជែងកាន់តែខ្លាំង ក្នុងវិស័យពាណិជ្ជកម្មអន្តរជាតិ ជាពិសេសផ្នែកវាយនភណ្ឌ កាត់ដេរ និងផលិតស្បែកជើង ការគ្រប់គ្រងលើតម្លៃពលកម្មដ៏សមស្របមួយ គឺជាចំណុចអាទិភាពដែលប្រទេសកម្ពុជាត្រូវផ្តោតការយកចិត្តទុកដាក់ជាចាំបាច់បំផុត។
ជាងនេះទៅទៀត ក្រសួង បានបន្តរៀបចំកម្មវិធីសំណេះសំណាលរបស់ សម្តេចតេជោនាយករដ្ឋមន្ត្រី ជាមួយបងប្អូនប្រធានរដ្ឋបាល ប្រធានផ្នែក ប្រធានក្រុម និងបងប្អូនកម្មករនិយោជិតទាំងក្នុង និងក្រៅប្រព័ន្ធចាប់តាំងពីថ្ងៃអាទិត្យ ទី២០ ខែសីហា ឆ្នាំ២០១៧ រហូតដល់ថ្ងៃទី២០ ខែកុម្ភៈ ឆ្នាំ២០១៩ ចំនួន ៦៤លើក សរុបចំនួន៩១៧ ៧១២នាក់៕
Source: Kampuchea Thmey Daily
0 Comments