ភ្នំពេញ ៖ ផ្ទះជនជាតិចិនមួយកន្លែង ត្រង់ចំណុចផ្ទះលេខ២៩BA ផ្លូវលេខ៣៤៨ សង្កាត់បឹងកេងកងទី៣ ខណ្ឌចំការមន រាជធានីភ្នំពេញ ត្រូវបានអគ្គិភ័យលេបត្របាក់ឆេះយ៉ាងសន្ធោសន្ធៅ កាលពីវេលាម៉ោង ៩យប់ ថ្ងៃចន្ទ ទី១១ ខែមីនា ឆ្នាំ២០១៩ ខណៈម្ចាស់ផ្ទះ ជនជាតិចិន ២នាក់ប្តីប្រពន្ធ ចាក់សោចោលមិននៅផ្ទះ។
តាមប្រភពពីប្រជាពលរដ្ឋដែលរស់នៅជាប់ផ្ទះកើតហេតុខាងលើ បានរៀបរាប់ប្រាប់ឲ្យដឹងថា នៅមុនពេលកើតហេតុ ពួកគាត់ បានឃើញផ្សែងហុយចេញពីផ្ទះកើតហេតុខាងលើ ជាន់ទី១ ខណៈពេលនោះក៏មានអណ្តាតភ្លើងឆេះយ៉ាងសន្ធោសន្ធៅ និងឮសំឡេងផ្ទុះចេញពី កន្លែងស្តុបអីវ៉ាន់សម្រាប់លក់។ បន្ទាប់មកពួកគាត់ក៏បានស្រែកឆោឡោឡើង បង្កការភ្ញាក់ផ្អើលយ៉ាងខ្លាំង ហើយ ភ្លាមៗនោះពួកគាត់ក៏ប្រញាប់ប្រញាល់នាំគ្នាដួសទឹកជះពន្លត់ តែដោយមិនរលត់ក៏ប្រញាប់រាយការណ៍ជូនសមត្ថកិច្ចមូលដ្ឋាន និងរថយន្តពន្លត់អគ្គិភ័យអោយចុះមកអន្តរាគមន៍។
ប្រភពដដែលបន្តថា បន្ទាប់មកក៏មានសមត្ថកិច្ចមូលដ្ឋាន រួមទាំងរថយន្តពន្លត់អគ្គិភ័យបានចុះមកជួយធ្វើការអន្តរាគមន៍បាញ់ពន្លត់។ ប៉ុន្តែដោយជាន់ទី១កើតហេតុខាងលើ ជាជាន់ដែលស្តុបអីវ៉ាន់សម្រាប់លក់ពេញណែន មានទាំងជ័រ ក្រដាសឡាំ និងសម្ភារៈ អគ្គិសនីផ្សេងៗទៀត ទើបធ្វើឲ្យពិបាកដល់ការអន្តរាគមន៍បាញ់ទឹកពន្លត់ ដោយបាន ប្រើពេល បាញ់ទឹកពន្លត់អស់រយៈពេលប្រមាណជាង២ម៉ោង ទើបភ្លើងបានរលត់ទៅវិញជាស្ថាពរនៅម៉ោង១១និង៣០ នាទីយប់ថ្ងៃខែ ឆ្នាំដដែល ដោយប្រើប្រាស់រថយន្តពន្លត់អគ្គិភ័យអស់ចំនួន២៤គ្រឿង។
សមត្ថកិច្ចបន្ថែមទៀតថា ករណីអគ្គិភ័យខាងលើនេះ មិនបានបង្កអោយឆេះរាលដាលដល់ផ្ទះអ្នកជិតខាងនោះទេ គ្រាន់តែរោលផ្សែងខ្មៅតែប៉ុណ្ណោះ គឺខូចខាតតែសម្ភារៈ គ្រឿងអគ្គិសនីសម្រាប់លក់មួយចំនួនធំ ដែលនៅក្នុងផ្ទះជាន់ទី១ ដែលមានទំហំ៤ម៉ែត្រគុណ១៦ម៉ែត្រ ជាប្រភេទផ្ទះថ្មល្វែង ត្រូវឆេះខូចខាតអស់ទាំងស្រុង ចំពោះមូលហេតុគឺបណ្តាលមកពីឆ្លងចរន្តអគ្គិសនី(ផ្ទុះស៊េខ្សែភ្លើង)។
បើតាមប្រភពពីសមត្ថកិច្ចមូលដ្ឋានបានប្រាប់ឲ្យថា ក្រោយពីកើតហេតុ ម្ចាស់ផ្ទះជនជាតិចិនក៏បាន ទៅមើល ហើយក៏ត្រូវបានសមត្ថកិច្ចនាំខ្លួនយក ទៅប៉ុស្តិ៍នគរបាលរដ្ឋបាលបឹងកេងកងទី៣ ដើម្បីសួរនាំ៕
Source: Kampuchea Thmey Daily
0 Comments