ភ្នំពេញ ៖ កាលពីវេលាម៉ោង១០និង៣៥នាទីយប់ថ្ងៃទី១១ ខែមីនា ឆ្នាំ២០១៩ ជនសង្ស័យវ័យក្មេង២នាក់អាយុទើបតែ១៥ឆ្នាំ បានធ្វើសកម្មភាពឆក់ទូរស័ព្ទដៃពីជនជាតិចិនតាមបណ្ដោយផ្លូវរដ្ឋសភាកែងផ្លូវស្ថានទូតរុស្សីនៅចំណុចផ្សារកុងទីន័រ ចាស់ក្បែរកោះពេជ្រស្ថិតនៅក្នុងសង្កាត់ទន្លេបាសាក់ខណ្ឌចំការមន ប៉ុន្តែមិនបានសម្រេច ហើយត្រូវជាប់ខ្នោះរបស់កម្លាំងព្រហ្មទណ្ឌកម្រិតស្រាលតែម្តង។
ជនសង្ស័យទី១មានឈ្មោះយក់ ប្រាវិត ភេទប្រុស អាយុ១៥ឆ្នាំស្នាក់នៅម្តុំវត្តសន្សំកុសលសង្កាត់បឹងទំពុន២ខណ្ឌមានជ័យ(ជាអ្នកឆក់)ទី២ឈ្មោះសួររ៉ាណេតភេទប្រុសអាយុ១៥ឆ្នាំស្នាក់នៅម្តុំវត្តសន្សំកុសលសង្កាត់បឹងទំពុន២ខណ្ឌមានជ័យ(ជាអ្នកបើកម៉ូតូ)។
តាមប្រភពព័ត៌មានពីកម្លាំងព្រហ្មទណ្ឌកម្រិតស្រាលនៃស្នងការដ្ឋានរាជធានីភ្នំពេញបានអោយដឹងថា មុនពេលកើតហេតុកម្លាំងស៊ីវិលរបស់ក្រុមគាត់បានធ្វើការល្បាតនៅចំណុចកើតហេតុខាងលើនេះ លុះពេលមកដល់ចំណុចកើតហេតុកែងផ្សារកុងទីន័រ ក៏ប្រទះឃើញបុរសជនជាតិចិនគាត់កំពុងតែដើរចុចទូរស័ព្ទដៃ ហើយភ្លាមៗនោះដែរក៏ស្រាប់តែលេចមុខជនសង្ស័យ៤នាក់ជិះម៉ូតូ២គ្រឿង មួយគ្រឿងជិះគ្នា២នាក់ ធ្វើសកម្មភាពឆក់យកទូរស័ព្ទពីជនជាតិចិន តែពុំបានសម្រេចត្រូវសមត្ថកិច្ចឃាត់ខ្លួនបានចំនួន២នាក់ ជិះម៉ូតូម៉ាកហុងដាឌ្រីមសេ១២៥ពណ៌ខ្មៅស៊េរី២០១៨ពាក់ស្លាក លេខភ្នំពេញ1G-S7033ជាអ្នកធ្វើសកម្មភាពឆក់ និងមួយគ្រឿងទៀតម៉ាកហុងដាឌ្រីមសេ១២៥ពណ៌ខ្មៅស៊េរី២០១៩មិនចាំស្លាកលេខជាអ្នកបិទគូទ ហើយជនសង្ស័យក៏ធ្វើសកម្មភាពឆក់ ប៉ុន្តែមិនបានសម្រេច ក៏ត្រូវកម្លាំងសមត្ថកិច្ចដេញចាប់ប្រផាប់ប្រភីងទៅដល់ចំណុចផ្លូវព្រះនរោត្តមនៅចំណុចមុខក្រសួងមហាផ្ទៃ ទើបឃាត់បាន២នាក់ និងម៉ូតូមួយគ្រឿង។ ចំណែកឯជនសង្ស័យ២នាក់ទៀតបានរត់គេចខ្លួនបាត់ស្រមោលតែម្តង ភ្លាមៗនោះដែរក៏ត្រូវបានសមត្ថកិច្ចដឹកយកទៅសួរនាំនៅប៉ុស្តិ៍ទន្លេបាសាក់ ហើយជនសង្ស័យក៏បានឆ្លើយសារភាពប្រាប់សមត្ថកិច្ចតាមត្រង់ថា ខ្លួនពិតជាបានធ្វើសកម្មភាពឆក់ទូរស័ព្ទដៃជនជាតិចិនពិតប្រាកដមែន។
ក្រោយពេលកើតហេតុ ជនសង្ស័យត្រូវបានកម្លាំងព្រហ្មទណ្ឌកម្រិតស្រាល កសាងសំណុំរឿងបញ្ជូនទៅកាន់តុលាការដើម្បីចាត់ការទៅតាមនីតិវិធីផ្លូវច្បាប់៕
Source: Kampuchea Thmey Daily
0 Comments