ការប្រកួតប្រដាល់ដណ្តើមពានរង្វាន់ជើងឯកTV5 Knock Out Series by K.cement ទម្ងន់៥៤គីឡូក្រាម លើសង្វៀនTV5 ព្រែកកំពឹស នាថ្ងៃសៅរិ៍ទី១៦មីនា២០១៩នេះ ជាការប្រកួតលើកទី៣ ក្នុងជម្រុះជុំទី១ ដែលមានអ្នកប្រដាល់ ៤ រូប ដើម្បីប្រជែងយកកៅអីសម្រាប់ជុំទី២ទៀតនោះ។
សម្រាប់ការប្រកួតជម្រុះលើកទី៣នេះ អេ ហនុមាន អ្នកប្រដាល់ក្លិបអេភូថងកីឡា នឹងជួបប្រកួតជាមួយរិន ដេវីត អ្នកប្រដាល់ក្លិបចតុមុខកីឡា ។ ការប្រកួតក្នុងជុំទី១នេះ គឺប្រកួតតែបីទឹកទេ ដោយក្នុងមួយទឹកមាន៣នាទី សម្រាក២នាទី ហើយអ្នកដែលឈ្នះបានឡើង និងអ្នកដែលចាញ់ត្រូវជ្រុះធ្លាក់ត្រឹមនេះ។
សម្រាប់ការជួបគ្នារវាងអេ ហនុមាន និង រិន ដេវីតនេះ តាមក្រុមអ្នកវិភាគប្រដាល់អះអាងនោះថា រិន ដេវីត ទំនងជាមិនឈ្នះអេ ហនុមាន នោះឡើយ ។ ព្រោះអេ ហនុមាន វាយបុកខ្លាំងនិងមានផ្លែល្អជាងដេវីត ហើយមួយទៀតហនុមាន គេជាអ្នកប្រដាល់ដែលស្គាល់រេញមុនដេវីត ។ ចាំមើល តើអេ ហនុមាន អាចយកឈ្នះរិន ដេវីត បានដែរឬអត់ ?។
ចំពោះការប្រកួតមួយគូទៀតនោះ ជាការជួបគ្នារវាង ផាន់ សុផាត អ្នកប្រដាល់ក្លិបពុទ្ធសេរីវង្សកីឡា និង សំរាំង ភក្តី អ្នកប្រដាល់ក្លិបព្រៃទទឹងខេត្តបាត់ដំបង។ ពីរនាក់នេះ មិនធ្លាប់ប៉ះគ្នាទេកន្លងមក ។ ពួកគេទាំងពីរ ជាអ្នកប្រដាល់ជើងថ្មីដូចគ្នា។
ទោះជាយ៉ាងនេះក្តី សម្រាប់ការជួបគ្នាលើកនេះ មិនដឹងថា ផាន់ សុផាត អាចយកឈ្នះសំរាំង ភក្តី បានឬអត់នោះទេ ? ព្រោះថា សំរាំង ភក្តីគេមានស្នៀតប្រដាល់ល្អ និងមានកម្លាំងកាយសម្បទាខ្លាំងជាងផាន់ សុផាត ហើយណាមួយលើកនេះ ជាការប្រកួតដែលមិនអាចធ្វេសប្រហែសបាន គឺត្រូវមានការប្រយ័ត្នរៀងៗខ្លួន ។ យ៉ាងណា ការប្រកួតរវាងអ្នកប្រដាល់ទាំងពីរ ពុំដឹងថានរណាជាអ្នកមានសំណាងបានឡើងទៅប្រកួតបន្តទៀតនោះទេ ?។
ព្រឹត្តិការណ៍ប្រកួតប្រដាល់ដណ្តើមពានរង្វាន់ជើងឯក TV5 Knock Out Series by K.cement ទម្ងន់៥៤គីឡូក្រាម មានអ្នកប្រដាល់ចំនួន ៣២ នាក់ចូលរួម ហើយចែកចេញជា ៤ ជុំ និងមានរូបមន្តប្រកួត គឺជុំទី១ជាការប្រកួតជម្រុះក្នុងចំណោម៣២នាក់ ទុកតែ១៦នាក់។ ជុំទី២ ជាការជម្រុះក្នុងចំណោម១៦នាក់ ទុក៨នាក់ ហើយជុំទី៣ គឺជម្រុះក្នុង៨នាក់ទុក៤នាក់ និងជុំទី៤ ជាការប្រកួតដំណាក់កាលផ្តាច់ព្រ័ត្រ គឺពាក់កណ្តាលផ្តាច់ព្រ័ត្រនិងផ្តាច់ព្រ័ត្រ។
ចំពោះការប្រកួតរវាងខ្មែរនិងខ្មែរវិញនោះ ចៅ ផលឌឿ អ្នកប្រដាល់ក្លិបសំរោងកោងខេត្តបាត់ដំបង ត្រូវគេផ្តល់ឱកាស អោយជួបប្រកួតជាមួយអ្នកប្រដាល់ជើងចាស់វ៉ាន់ ចាន់វ៉េត ។ពីរនាក់នេះ ជួបគ្នាក្នុងប្រភេទទម្ងន់៦៧ គីឡូក្រាម។
ចៅ ផលឌឿ វិញ គេក៏ជាអ្នកប្រដាល់ជើងខ្លាំងមួយរូបដែរនៅស្រុកខ្មែរ ។ ចាំមើល តើចៅ ផលឌឿ អាចយកឈ្នះវ៉ាន់ ចាន់វ៉េត បានឬអត់ សម្រាប់ការជួបគ្នាលើកដំបូងនេះ ?។
សូមបញ្ជាក់ថា មកដល់ពេលនេះ គេរកឃើញអ្នកខ្លាំងទម្ងន់៥៤គីឡូក្រាមចំនួន៤រូបហើយ ដែលបានកក់កៅអីនៅក្នុងវគ្គប្រកួតជុំទី២។ ក្នុងនោះ មានម៉ន ភារម្យ ក្លិបការិយាល័យទី៥ កងទ័ពជើងគោក,ចាន់ សាន់ អ្នកប្រដាល់ក្លិបតាព្រហ្មមានជ័យ,ឡុង ណងសៅ ក្លិបសាលវ័ន្តកីឡា និង គួន សុវណ្ណ ក្លិបយុវវាលស្បូវខណ្ឌច្បារអំពៅ៕
Source: Kampuchea Thmey Daily
0 Comments