កម្ពុជាកង្វះខាតថាមពលអគ្គិសនីប្រមាណ៤០០មេហ្កាវ៉ាត់ ស្មើនឹង១៣ភាគរយ ហើយបញ្ហាប្រឈមនេះ អាចអូសបន្លាយដល់ចុងខែឧសភា

ភ្នំពេញ ៖ សេចក្តីថ្លែងការណ៍របស់អង្គភាពអ្នកនាំពាក្យរាជរដ្ឋាភិបាល ចុះថ្ងៃទី២២ ខែមីនា ឆ្នាំ២០១៩ បានឲ្យដឹងថា បច្ចុប្បន្នកម្ពុជាកង្វះខាតថាមពលអគ្គិសនី ដើម្បីផ្គត់ផ្គង់ជាទូទៅប្រមាណ៤០០មេហ្កាវ៉ាត់ ដែលស្មើនឹង១៣ភាគរយ ហើយបញ្ហាប្រឈមនេះ អាចអូសបន្លាយដល់ចុងខែឧសភា។ បញ្ហានេះ បណ្ដាលមកពីអាកាសធាតុក្ដៅខ្លាំង កើតចេញពីបម្រែបម្រួលអាកាសធាតុ នាំឱ្យមានការខ្វះទឹកខុសប្រក្រតី រួមផ្សំនឹងការកើនឡើង នូវការប្រើប្រាស់យ៉ាងគំហុកក្នុងវិស័យសំណង់ ទើបធ្វើឱ្យប្រភពថាមពលអគ្គិសនី ពុំអាចផ្គត់ផ្គង់បានគ្រប់គ្រាន់ដូចរដូវប្រាំងសព្វមួយដង។

អង្គភាពអ្នកនាំពាក្យរាជរដ្ឋាភិបាលបានលើកឡើងយ៉ាងនេះថា “អភូតហេតុនេះ គឺបណ្ដាលមកពីអាកាសធាតុក្ដៅខ្លាំងកើតចេញពីបម្រែបម្រួលអាកាសធាតុ គឺនាំឱ្យមានការខ្វះទឹកខុសប្រក្រតី រួមផ្សំនឹងការកើនឡើង នូវការប្រើប្រាស់យ៉ាងគំហុក ក្នុងវិស័យសំណង់ផងដែរ ដែលមានកំណើន៧០០ភាគរយ បានធ្វើឱ្យប្រភពថាមពលអគ្គិសនី ពុំអាចផ្គត់ផ្គង់បានគ្រប់គ្រាន់ដូចរដូវប្រាំងសព្វមួយដង។ ទោះជាយ៉ាងណា នេះគឺជាការប្រឈមក្នុងរយៈពេលខ្លីមួយសម្រាប់កម្ពុជា ហើយអាចអូសបន្លាយដល់ត្រឹមចុងខែឧសភា ពោលគឺមានរយៈពេល៧២ថ្ងៃ ដែលមានកង្វះខាតថាមពលអគ្គិសនីចំនួន៤០០មេហ្កាវ៉ាត់ ស្មើនឹង១៣% សម្រាប់ផ្គត់ផ្គង់ជាទូទៅ”។

ទាក់ទងបញ្ហានេះ សម្ដេចអគ្គមហាសេនាបតីតេជោ ហ៊ុន សែន ធ្លាប់បានអំពាវនាវឱ្យប្រជាពលរដ្ឋ ដែលមានម៉ាស៊ីនភ្លើង អាចប្រើប្រាស់ម៉ាស៊ីនភ្លើងជំនួស នៅពេលដែលមានការដាច់ភ្លើង ឬត្រូវការផ្ដាច់ភ្លើង។ ជាមួយគ្នានោះ សម្ដេចតេជោ លោកបានចាត់ឲ្យលោក កែវ រតនៈ រដ្ឋមន្ដ្រីប្រតិភូអមនាយករដ្ឋមន្ដ្រី ក្នុងការចាកចេញទៅប្រទេសតួរគីជាបន្ទាន់ ដើម្បីចរចានាំនាវាផលិតអគ្គិសនី (២០០មេហ្កាវ៉ាត់) មកកាន់កម្ពុជា ក្នុងការឆ្លើយតបនឹងបញ្ហាប្រឈមនេះផងដែរ។

អ្វីដែលជាផលលំបាក និងការប្រឈមក្នុងរយៈពេលខ្លីនេះ ទឹកក៏ជាបញ្ហារួមផ្សំនឹងអគ្គិសនីផងដែរ ដូច្នេះសម្តេចបានស្នើឲ្យប្រជាពលរដ្ឋ នាំគ្នាខិតខំសន្សំសំចៃការប្រើប្រាស់ទឹក ទាំងនៅទីក្រុង ក៏ដូចនៅជនបទ ដោយសារឆ្នាំនេះ គឺជាឆ្នាំដែលរាំងស្ងួតក្នុងរយៈពេលវែង ហើយអូសបន្លាយរហូតដល់ចុងខែឧសភា។

ទាក់ទងបញ្ហានេះ លោក ទី នរិន្ទ រដ្ឋលេខាធិការក្រសួងរ៉ែ និងថាមពល បានថ្លែងនៅក្នុងសន្និសីទសារព័ត៌មានកាលពីថ្ងៃទី២២ ខែមីនា ថា នៅឆ្នាំ២០២០ ខាងមុខនេះ បញ្ហាកង្វះខាតថាមពលអគ្គិសនីនៅកម្ពុជា នឹងមិនចោទជាបញ្ហាទៀតទេ ដោយសារតែកម្ពុជា ចាប់ផ្តើមដំណើរការម៉ាស៊ីនប្រើថាមពលសូឡា និងទិញអគ្គិសនីពីប្រទេសថៃ និងប្រទេសឡាវ ដែលមានថាមពលអគ្គិសនី សរុប៥៤០មេហ្គាវ៉ាត់។

លោកបញ្ជាក់ដែរថា នៅចុងឆ្នាំ២០១៩នេះ នឹងមានម៉ាស៊ីនថ្មីៗដែលកម្ពុជាបានត្រៀម នឹងចាប់ផ្តើមដំណើរការ ជាមួយនឹងថាមពលអគ្គិសនី១៥០មេហ្គាវ៉ាត់ បញ្ចេញសូឡាថាមពលពន្លឺព្រះអាទិត្យ៦០មេហ្គាវ៉ាត់ ទិញពីថៃ២៥០ មេហ្គាវ៉ាត់ និងទិញពីឡាវជាង២០០មេហ្គាវ៉ាត់ផងដែរ៕